தமிழ் திரையுலகின் முன்னணி நடிகர் விஜய். இவரது நடிப்பில் உருவாகிய பீஸ்ட் திரைப்படம் கடந்த ஏப்ரல் 13-ந் தேதி வெளியாகியது. இந்த படத்திற்கு பிறகு நடிகர் விஜய் பிரபல தெலுங்கு பட இயக்குனர் வம்சி இயக்கத்தில் நடித்து வருகிறார்.
பெயரிடப்படாத அந்த படத்தில் நடிகர் விஜய்யுடன் சரத்குமார், ராஷ்மிகா மந்தனா உள்ளிட்ட பலர் நடித்து வருகின்றனர். தளபதி 66 என்று அழைக்கப்படும் இந்த படத்தின் படப்பிடிப்பு ஹைதராபாத்தில் நடைபெற்று வருகிறது. இந்த படத்தின் படப்பிடிப்புக்காக நடிகர் விஜய் கடந்த ஓரிரு தினங்களுக்கு முன்பு ஹைதரபாத் புறப்பட்டுச் சென்றார்.
இந்த நிலையில், ஹைதரபாத்தில் படப்பிடிப்புக்கு நடிகர் விஜய் காரில் சென்றபோது எடுக்கப்பட்ட புகைப்படம் சமூக வலைதளங்களில் வெளியாகியுள்ளது. இந்த படத்தை அவரது ரசிகர்கள் சமூக வலைதளங்களில் பகிர்ந்து வருகின்றனர். தளபதி 66 படத்தில் விஜய்க்கு அண்ணன் கதாபாத்திரத்தில் நடிக்க முன்னாள் கதாநாயகன் மோகனிடம் பேச்சுவார்த்தை நடத்தப்பட்டது. ஆனால், அவர் விஜய்க்கு அண்ணனாக நடிக்க மறுத்துவிட்டதாக கூறப்படுகிறது.
இதனால், நடிகர் விஜய்க்கு அண்ணனாக நடிகர் ஷ்யாம் நடிக்க உள்ளதாக தகவல்கள் வெளியாகியுள்ளது. இயக்குனர் வம்சி பைடபல்லி தெலுங்கில் ஏராளமான குடும்பப்பாங்கான திரைப்படங்களை எடுத்தவர். இவர் தமிழில் தோழா என்ற படத்தை இயக்கியுள்ளார். கார்த்தி, நாகார்ஜூனா இணைந்து நடித்த இந்த படம் மாபெரும் வெற்றிப்படமாக தமிழில் அமைந்தது. இதனால், விஜயின் 66வது படமும் குடும்பப்பாங்கான படமாக அமையும் என்று எதிர்பார்க்கப்படுகிறது.
நடிகர் விஜய்யின் பீஸ்ட் படம் எதிர்பார்த்த வெற்றியை பெறாததால் இந்த படத்தின் வெற்றியை அவரது ரசிகர்கள் மிகுந்த ஆவலுடன் எதிர்பார்த்து காத்துள்ளனர்.
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைதள பக்கங்களிலும் பின் தொடரலாம்