அன்றைய காலகட்டத்தில் பேச்சிலர்களுக்கு வீடு கொடுக்க பலரும் தயங்குவார்கள். அந்த கான்செப்டை வைத்து நகைச்சுவை கலந்த திரைப்படமாக 1995ம் ஆண்டு வெளியான திரைப்படம் தான் 'ஆணழகன்'. பிரசாந்த், சுனேகா, வடிவேலு, சார்லி, சின்னி ஜெயந்த், கே.ஆர். விஜயா மற்றும் பலர் நடித்த இப்படத்தை நடிகர் பிரஷாந்த் தந்தையும் பிரபல தயாரிப்பாளரான தியாகராஜன் இயக்கி இருந்தார்.
வாடகைக்கு வீடு கிடைக்காத காரணத்தினால் நான்கு நண்பர்கள் இணைந்து ஒரே குடும்பம் போல நடித்து வீடு ஒன்றில் குடியேறுகிறார்கள். நடிகர் பிரஷாந்த் இந்த படத்தில் பெண் வேடமிட்டு நடிக்க அவரின் சகோதரர், கணவர், தந்தை என மற்ற மூவரும் ஒரு குடும்பம் போல காட்டிக்கொண்டு வீட்டு உரிமையாளரான கே.ஆர். விஜயாவை ஏமாற்றுகிறார்கள்.
இப்படத்தில் பெண் வேடத்தில் நடிகர் பிரஷாந்த் படாதபாடு படுகிறார். ஹவுஸ் ஓனர் அம்மாவிடம் அவர் படாதபாடு படும் போது பார்வையாளர்கள் வயிறு குலுங்க குலுங்க சிரித்து மகிழ்ந்தனர். ஆணழகன் பிரஷாந்த் பெண் வேடத்திலும் மிகவும் அழகான ஹீரோயின் போல காட்சியளித்தார். இப்படத்தில் பெண் வேடத்தில் நடித்த அனுபவம் குறித்தும் அவர் செய்த லூட்டிகள் குறித்தும் நேர்காணல் ஒன்றில் அவர் பேசி இருந்தார்.
ஆணழகன் படத்தில் ஒரு பெண் கெட்டப்பில் நடிக்கும் போது அதில் நான் ஜெயிக்க வேண்டிய கட்டாயம் இருந்தது. அந்த நேரத்தில் என்னுடைய வயது மிகவும் முக்கியமான விஷயமாக இருந்தது. அந்த கேரக்டரில் நடிப்பதற்காக நான் த்ரெடிங், வாக்சிங் எல்லாம் செய்து கொண்டேன். நானும் அந்த வேதனைகளை அனுபவித்ததால் பெண்கள் அனைவரும் எப்படி எல்லாம் கஷ்டப்படுகிறார்கள் என்பதை அன்று தான் நான் தெரிந்து கொண்டேன்.
பெண் கெட்டப் போட்டுட்டு நான் நிக்கும் போது பல பேர் என்னை கிண்டல் பண்ணுவாங்க, சைட் அடிப்பாங்க. "யாரு இந்த கட்டை? நல்லா இருக்கு இல்ல" என கமெண்ட் எல்லாம் அடிப்பாங்க. அந்த நேரத்தில் நான் என்ன பண்ணுவேன் அவர்கள் பக்கத்தில் போய் நிற்பேன். ஒரு பொண்ணு கிட்ட வந்து நின்றதும் அவர்கள் ஒரு நிமிடம் பயந்து போய் அதிர்ச்சியுடன் பார்ப்பார்கள். வேணும் என்றே அவர்கள் மீது நான் கை போடுவேன். உடனே அங்கிருந்து அலறி அடித்து கொண்டு ஓடுவார்கள். "யோவ் நான் தான்யா" என அப்போது தான் சொல்வேன். ஷூட்டிங் ஸ்பாட்ல இப்படி எல்லாம் நிறைய பிராங்க் பண்ணி இருக்கேன் என கூறியிருந்தார் நடிகர் பிரஷாந்த்.