கே.ஜி. எஃப் திரைப்பட இயக்குநர் பிரசாந்த் நீல் இயக்கும் சலார் படக்குழுவினர் அனைவருக்கும் பரிசு கொடுத்து சர்ப்ரைஸ் செய்துள்ளார் நடிகர் பிரபாஸ்.
கே.ஜி.எஃப் திரைப்படத்தைத் தொடர்ந்து இயக்குநர் பிரசாந்த் நீல் இயக்கும் அடுத்தப் படம் சலார். நடிகர் பிரபாஸ் இந்தப் படத்தில் நடித்து வருகிறார். இந்தியத் திரைப்பட ரசிகர்கள் மிக ஆர்வமாக எதிர்பார்த்து வரும் பான் இந்தியத் திரைப்படமான இந்தப் படத்தின் படப்பிடிப்பு அண்மையில் நிறைவடைந்துள்ளது. இந்நிலையில் நடிகர் பிரபாஸ் படத்தில் பணியாற்றிய அனைவரது மனதைக் கவரும் வகையில் ஒரு செயலை செய்திருக்கிறார்.
சலார் படத்தில் ஒவ்வொரு துறையிலும் பணிபுரிந்த ஊழியர்களின் வங்கிக் கணக்கிற்கும் நடிகர் பிரபாஸ் 10,000 ரூபாய் அனுப்பி வைத்துள்ளதாகத் தகவல்கள் வெளியாகியுள்ளன. இவரது செயலால் மகிழ்ச்சியடைந்த ரசிகர்கள் பாராட்டு மழையைப் பொழிந்து வருகிறார்கள்.
சலார்
பிரபாஸ், ஸ்ருதி ஹாசன், ப்ரித்விராஜ் சுகுமாரன், ஜகபதி பாபு, மது குருசாமி, ஈஸ்வரி ராவ் ஆகியோர் நடிப்பில் உருவாகும் திரைப்படம் சலார்.
சுமார் 250 கோடி செலவில் உருவாகி வருகிறது சலார் திரைப்படம். இந்தப் படத்தின் மீதான ஆர்வம் நாளுக்கு நாள் அதிகரித்தபடி உள்ளது. இந்நிலையில், படம் குறித்து பெரும் எதிர்பார்ப்பில் இருக்கும் ரசிகர்கள் தொடர்ச்சியாக படத்தின் இயக்குநர் பிரசாந்த் நீல் மற்றும் தயாரிப்பாளன் கிரகண்டூர் ஆகிய இருவரிடமும் ட்விட்டரில் அப்டேட் கேட்டு வருகின்றனர்
இந்நிலையில் பிரசாந்த் நீல், கிரகண்டூர் இருவரும் முன்னதாக தங்களது ட்விட்டர் கணக்குகளையே டி ஆக்டிவேட் செய்தனர். சலார் திரைப்படம் வரும் செப்டம்வர் 28ஆம் தேதி வெளியாகும் என அறிவிக்கப்பட்டிருந்த நிலையில், படம் வெளியாகும் தேதி ஒத்திவைக்கப்பட்டதாகத் தகவல்கள் வெளியாகின.
ஆதிபுருஷ்
இந்நிலையில், இன்று நடிகர் பிரபாஸ் நடித்துள்ள ஆதிபுருஷ் திரைப்படம் வெளியாகியுள்ளது. சுமார் 500 கோடி செலவில் இப்படம் எடுக்கப்பட்டிருப்பதாக கூறப்படுகிறது.
ஓம் ராவத் இயக்கத்தில் க்ரித்தி சனோன், சைஃப் அலிகான் ஆகியோர் நடிப்பில் ராமாயணக் கதையை அடிப்படையாக வைத்து இப்படம் உருவாகியுள்ளது. ஹிந்தி, தெலுங்கு, தமிழ், கன்னடம், மலையாளம் என பான் இந்தியா படமாக ஆதிபுருஷ் வெளியாகி உள்ளது. இப்படத்தின் ட்ரெய்லர்கள் வெளியாகி சில சர்ச்சைகளை ஏற்படுத்தினாலும் கலவையான விமர்சனங்களை பெற்றது. முன்னதாக, ஆதிபுருஷ் திரைப்படம் வெளியாகும் அனைத்து திரையரங்குகளிலும் அனுமனுக்காக ஒரு சீட் காலியாக விடப்படும் என அறிவிப்பை வெளியிட்டது குறிப்பிடத்தக்கது. இன்று திரையரங்குகளில் வெளியாகியிருக்கும் ஆதிபுருஷ் கலவையான விமர்சனங்களைப் பெற்று வருகிறது. படத்தின் வி,எஃப்,எக்ஸ் காட்சிகள் எதிர்பார்த்த அளவிற்கு இல்லை என்பது ரசிகர்களின் மனக்குறையாக இருக்கிறது. ஆதிபுருஷ் திரைப்படம் பல்வேறு வசூல் சாதனைகளை முறியடிக்கும் என எதிர்பார்க்கப்படுகிறது.