நடிகரும் இயக்குநருமான ரேவதியின் இரண்டாவது படத்தில் நடிக்க ஒப்பந்தமாகியுள்ளார் நடிகர் காஜோல். இதுகுறித்த செய்தியைத் தனது இன்ஸ்டாகிராம் பக்கத்தில் பகிர்ந்துகொண்டுள்ளார் அவர். நடிகர் ரேவதி தான் இயக்கிய முதல் படமான மித்ர -மை ஃபிரெண்ட் திரைப்படத்துக்காக தேசிய விருது பெற்றவர். இந்தப் படம் 2002ம் ஆண்டு வெளியானது. நீண்ட இடைவெளிக்குப் பிறகு மீண்டும் ஒரு திரைப்படத்தை இயக்க உள்ளார் ரேவதி. ‘தி லாஸ்ட் ஹுராஹ்’ எனத் தலைப்பிடப்பட்டுள்ள இந்த படத்தை பிலிவ் பிக்சர்ஸ் நிறுவனம் தயாரிக்கிறது.
ஒரு தாயின் போராட்டத்தை மையமாக வைத்து இந்தப் படம் உருவாகியுள்ளது. திரைப்படம் இன்னும் முன் தயாரிப்புப் பணிகளில் இருக்கும் நிலையில் ரேவதியின் அடுத்தப்படத்தில் தான் ஒப்பந்தமாகியுள்ளது குறித்துப் பகிர்ந்துள்ளார் காஜோல்.அதில், ‘எனது அடுத்த திரைப்படம் சூப்பரான ரேவதியின் இயக்கத்தில் அமைய உள்ளதை உங்களிடம் பகிர்வதில் மகிழ்ச்சி அடைகிறேன். படத்தின் தலைப்பு ‘தி லாஸ்ட் ஹுராஹ்’ எல்லோரும் எனக்காக ஒரு ‘எப்ப்ப்ப்ப்பி’ சொல்லலாமே ப்ளீஸ் எனக் குறிப்பிட்டுள்ளார்’
பிலீவ் பிக்சர்ஸ் நிறுவனம் ஏற்கெனவே எம்.எஸ்.தோனி வாழ்க்கை வரலாற்றுத் திரைப்படத்தை இயக்கியது என்பது குறிப்பிடத்தக்கது.