கன்னட சினிமாவின் முக்கிய நடிகர்களுள் ஒருவர் ஆக்சன் கிங் அர்ஜுனின் சகோதரி மகன் துருவா சர்ஜா. இவர் நடிப்பில் உருவாகியுள்ள மார்ட்டின் படத்தின் டீசர் இரண்டே நாள்களில் 60 மில்லியன் பார்வையாளர்களைப் பெற்று சாதனைப் படைத்துள்ளது.
வாசவி எண்டர்ப்ரைசஸ் சார்பில் தயாரிப்பாளர் உதய் கே மேத்தா தயாரிப்பில், ஆக்சன் கிங் அர்ஜூன் கதையில், இயக்குநர் AP அர்ஜுன் இயக்கத்தில், 'ஆக்சன் பிரின்ஸ்' எனக் கொண்டாடப்படும் துருவா சர்ஜா நடிப்பில் உருவாகியுள்ள படம் ’மார்ட்டின்’. பிரமாண்டமான பான் இந்திய திரைப்படமாக உருவாகியுள்ளது 'மார்டின்' திரைப்படம் உருவாகியுள்ளது.
கேஜிஎஃப், காந்தாரா படங்களைத் தொடர்ந்து கன்னட சினிமா இந்திய அளவில் கவனம் பெற்று வரும் நிலையில், அதிரடி ஆக்ஷன் படமாக உருவாகியுள்ள மார்ட்டின் படம் ரசிகர்களிடம் பெரும் ஆவலைத் தூண்டியுள்ளது. பிரபல இசையமைப்பாளர் மணி சர்மா இப்படத்துக்கு இசையமைத்துள்ளார்.
கேஜிஎஃப் புகழ் ரவி பர்சூர் இந்தப் படத்துக்கு பின்னணி இசை மற்றும் ஒலி வடிவமைப்பு செய்துள்ளார். சத்யா ஹெக்டே ஒளிப்பதிவு செய்துள்ளார். கே எம் பிரகாஷ் எடிட்டிங் செய்துள்ளார்.
இப்படத்தின் டீசர் வெளியீட்டு விழா நேற்று முன் தினம் - பிப்ரவரி 23 ஆம் தேதி, பெங்களூரு, ஓரியன் மாலில் கோலாகலமாக நடைபெற்றது. இவ்விழாவினில், தயாரிப்பாளர் உதய் K மேத்தா, ஆக்சன் கிங் அர்ஜூன், இயக்குநர் AP அர்ஜூன், நாயகன் துருவா சர்ஜா, நாயகி வைபவி சாண்டில்யா, அன்வேஷி ஜெயின் உட்பட படக்குழுவினர் கலந்துகொண்டனர்.
திரை கொள்ளாத ஆக்சன் காட்சிகளின் பிரமாண்டம், துருவா சர்ஜாவின் கதாப்பாத்திரம் உள்ளிட்டவை கவனம் ஈர்த்து இந்த டீசர் ரசிகர்களிடம் வரவேற்பை பெற்றுள்ளது. மறைந்த கன்னட நடிகர் சிரஞ்சீவி சர்ஜாவின் சகோதரர் துருவா என்பது குறிப்பிடத்தக்கது.
யூடியூபில் முன்னதாக வெளியான டீசர், இணையத்தில் பெரும் வரவேற்பைப் பெற்று ரசிகர்களால் கொண்டாடப்பட்டு வருகிறது. தமிழ், கன்னடம், தெலுங்கு, மலையாளம், இந்தி என பல மொழிகளில் உருவான இப்படத்தின் டீசர் வெளியான நாளிலிருந்து இன்றுவரை தொடர்ந்து டிரெண்டிங்கில் இருந்து வருகிறது.
இந்நிலையில், நேற்று முன் தினம் வெளியான இந்த டீசர் 2 நாள்களில் 60 மில்லியன் பார்வையாளர்களை பெற்று சாதனை படைத்துள்ளது. பான் இந்தியா படமான மார்ட்டின் வரும் மார்ச் 3ஆம் தேதி உலகம் முழுவதும் வெளியாக உள்ளது குறிப்பிடத்தக்கது.