தமிழ்நாடு நகர்புற உள்ளாட்சி தேர்தலுக்கான வேட்புமனுத்தாக்கல் நிறைவு பெற்ற நிலையில், வேட்பு பரிசீலனை மற்றும் வேட்புமனுக்களை வாபஸ் வாங்கும் நாளும் இன்றோடு நிறைவு பெற்றுவிட்டது. இன்று இறுதி வேட்பாளர் இறுதி செய்யப்பட்டு, நாளை முதல் விறுவிறு பிரச்சாரம் நடைபெற உள்ளது.
எந்த முறையும் இல்லாத அளவிற்கு இந்த முறை வேட்பாளர்களின் சேஷ்டைகள் தாங்க முடியவில்லை. வாக்காளர்களின் கவனத்தை ஈர்க்கிறோம் என்கிற பெயரில், ஆளாளுக்கு போட்டி போட்டு ஏதாவது ஒரு காரியத்தை செய்து கொண்டே இருக்கிறது. சிலவை கவனிக்கப்பட்டாலும், பெரும்பாலானாவை கோமாளித்தனமாகவே உள்ளது. இப்போது நாம் பார்க்கப் போவதும் அதுமாதிரியான ஒரு பிரச்சாரம் தான்.
புதுக்கோட்டை நகராட்சிக்குட்பட்ட 23 வது வார்டில் அதிமுக சார்பில் போட்டியிடும் மணி என்ற தவமணி, வினோத பிரச்சாரம் ஒன்றை செய்து வருகிறார். ஒரே அரை சைக்கிள்(பார் கம்பி இல்லாத சைக்கிளை அப்படி தான் அழைப்பார்கள்) , அதில் அவர் மட்டும் பயணிக்கிறார். அதில் குப்பை பெருக்கும் ஒரு துடைப்பத்துடன் செல்கிறார். அவருடன் வேறு யாரும் வரவில்லை. ஒரு இடத்தில் குவிந்திருக்கும் குப்பையை பெருக்குகிறார். அதன் பின் அவ்வழியாக வரும் ஒரு வாக்காளரை வழி மறிக்கிறார். அவர் அந்த வார்டை சேர்ந்தவரா என்பது தெரியவில்லை. அவரிடம் வாக்குறுதிகளை அள்ளி வீசுகிறார்.
‛எனக்கு ஓட்டு போடுங்கம்மா... இங்கே குப்பையை கூட்டுவேன்... குடிதண்ணீர் தருவேன்... ரோடு போடுவேன்... தெருவிளக்கு வைப்பேன்....’ என வழக்கமான லிஸ்ட்களை பட்டியலிடுகிறார். அந்தம்மாவும், பொறுமையாக அனைத்தையும் கேட்கிறார். பின்னர், துண்டு பிரசுரம் ஒன்றை அந்த பெண்ணிடம் வழங்குகிறார். அதை வீடியோவும் எடுத்துக் கொள்கிறார். பிரசுரத்தை வாங்கும் அம்மாவுக்கு ஒன்றே ஒன்று தான் தோன்றியிருக்கும், ‛இந்த குப்பை இத்தனை நாளா இங்கே தானே இருக்கு... இப்போ மட்டும் எதுக்கு சுத்தம் செய்யுறாரு...’ என்கிற அடிப்படை கேள்வி தான் அது.
என்ன செய்வது... இப்போது தானே தேர்தல் வருகிறது. ‛அந்த நாள் முதல்... இந்த நாள் வரை... சைக்கிளை விடவில்லை....’ என்கிற வடிவேலு காமெடி போல, சைக்கிளில் சுற்றி பிரச்சாரம் செய்யும் அதிமுக வேட்பாளர், வார்டை கலகலப்பாக்கி வருகிறார் என்பது மட்டும் உண்மை.
இதோ அந்த ஜாலி வீடியோ...
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைதள பக்கங்களிலும் பின் தொடரலாம்