உசிலம்பட்டி அருகே பிறந்து 28 நாட்களே ஆன பெண் குழந்தை உயிரிழந்த சம்பவம் பெரும் பரபரப்பை ஏற்படுத்தியுள்ளது. பெண் சிசு கொலையா என்ற கோணத்தில் போலீசார் தீவிர விசாரணை மேற்கொண்டு வருகின்றனர்.




 

 





மதுரை மாவட்டம் உசிலம்பட்டி அருகே கீழப்பட்டியைச் சேர்ந்தவர் ரஞ்சித் - லாவண்யா தம்பதி. விவசாய கூலி தொழிலாளியான இந்த தம்பதிக்கு ஏற்கனவே ஒன்றரை வயதில் பெண் குழந்தை உள்ளது. இந்நிலையில் இந்த தம்பதிக்கு கடந்த ஆகஸ்ட் 5- ஆம் தேதி உசிலம்பட்டி அரசு மருத்துவமனையில் இரண்டாவதாக சுகப்பிரசவத்தில் பெண் குழந்தை பிறந்துள்ளது. நல்ல ஆரோக்கியத்துடன் பிறந்த குழந்தையை 5வது நாளில் தாயும் சேயும் மருத்துவமனையிலிருந்து வீட்டிற்கு அனுப்பி வைக்கப்பட்டனர்.

 



 


 

இந்நிலையில் இன்று காலை குழந்தைக்கு பால் கொடுத்து தனது மூத்த மகள் துணையுடன் தூங்க வைத்துவிட்டு விவசாய பணிகளை தாய் லாவண்யா செய்து கொண்டிருந்தாக கூறப்படுகிறது. நேரம் கழித்து குழந்தையை வந்து பார்த்த போது மயக்க நிலையில் இருந்ததைக் கண்டு அதிர்ச்சியடைந்து, 108 ஆம்புலென்ஸ் மூலம் உசிலம்பட்டி அரசு மருத்துவமனைக்கு சிகிச்சைக்காக கொண்டு வந்தனர். அரசு மருத்துவமனையில் குழந்தையை பரிசோதனை செய்த மருத்துவர்கள் குழந்தை ஏற்கனவே இறந்து விட்டதாக தெரிவித்துள்ளனர்., இந்த தம்பதிக்கு ஏற்கனவே ஒன்றரை வயதில் ஒரு பெண் குழந்தை உள்ள நிலையில் இரண்டாவதாக பிறந்த பெண் குழந்தை பிறந்து 28 வது நாளிலேயே உயிரிழந்த சம்பவம் பரபரப்பை ஏற்படுத்தியுள்ளது. இந்த சம்பவம் தொடர்பாக விக்கிரமங்கலம் காவல் நிலைய போலிசார் பெண் சிசு கொலையாக என்ற கோணத்தில் தொடர் விசாரணை மேற்கொண்டு வருகின்றனர்.,