ஆந்திராவில் 3ஆம் வகுப்பு படிக்கும் 8 வயது சிறுமி அதேப்பள்ளியைச் சேர்ந்த 3 சிறுவர்களால் பாலியல் வன்கொடுமை செய்யப்பட்டு கொலை செய்யப்பட்ட சம்பவம் அதிர்ச்சியை ஏற்படுத்தியுள்ளது.
இதுகுறித்து போலீசாரின் தகவலின் படி, பாதிக்கப்பட்ட 8 வயது சிறுமி பள்ளியில் 3ஆம் வகுப்பு படித்து வந்துள்ளார். அவர் வீட்டின் அருகில் உள்ள பூங்காவில் விளையாடிக் கொண்டிருந்துள்ளார்.
அப்போது சிறுமி படிக்கும் அதேப் பள்ளியைச் சேர்ந்த 12 வயதுடைய 6 ஆம் வகுப்பு படிக்கும் இரண்டு சிறுவர்களும் 13 வயதுடைய 7ஆம் வகுப்பு படிக்கும் ஒரு சிறுவனும் என 3 சிறுவர்கள் பூங்காவிற்கு வந்துள்ளனர்.
தொடர்ந்து சிறுமியிடம் விளையாடலாம் வா என ஆளில்லாத இடத்திற்கு 3 சிறுவர்களும் சிறுமியை அழைத்துச்சென்றதாக தெரிகிறது. சிறிது நேரத்தில் சிறுமி விளையாடிக்கொண்டிருந்த இடத்தில் அவர் இல்லாததால் அவருடைய பெற்றோர் அக்கம்பக்கத்தில் தேடிப்பார்த்துள்ளனர்.
அப்போதும் அவர் எங்கும் காணாததால் இதுகுறித்து கடந்த ஞாயிற்றுக்கிழமை சிறுமியின் பெற்றோர் காவல்நிலையத்தில் புகார் அளித்தனர். அந்த புகாரின் பேரில் போலீசார் வழக்குப்பதிவு செய்து விசாரணை மேற்கொண்டனர். விசாரணையில் தகவல் ஏதும் கிடைக்காததால் போலீசார் துப்பு துலக்கும் நாய் மூலம் சோதனையை மேற்கொண்டனர்.
அப்போது போலீஸின் மோப்ப நாய் அந்த குறிப்பிட்ட 3 சிறுவர்களை அடையாளம் காட்டியது. இதையடுத்து அவர்களை பிடித்து போலீசார் விசாரணையை மேற்கொண்டனர். விசாரணையில் பல திடுக்கிடும் தகவல் வெளிவந்தன.
அதாவது சிறுமியை தனியாக அழைத்துச்சென்ற சிறுவர்கள் அவரை பாலியல் வன்கொடுமை செய்து கொலை செய்து கால்வாயில் வீசியதாக வாக்குமூலம் அளித்துள்ளனர். இதையடுத்து போலீசார் சம்பந்தப்பட்ட கால்வாயில் சிறுமியின் உடலை தேடும் பணியில் ஈடுபட்டனர். ஆனால் அவரின் உடல் இன்னும் கிடைக்கவில்லை என தகவல் வெளியாகியுள்ளது.
சிறுமியின் உடல் இன்னும் மீட்கப்படாததால், இந்த வழக்கு இன்னும் காணாமல் போன நபரின் விசாரணையாகவே கருதப்படுகிறது என்று முச்சுமாரி காவல் நிலையத்தின் துணை காவல் ஆய்வாளர் ஜெய்சேகர் தெரிவித்துள்ளார்.