Rahul Gandhi On Priyanka Gandhi : ”என் தங்கச்சி தான் BEST! வேற யாருமே சரிவரமாட்டாங்க”ராகுல் உருக்கம்

பிரியங்கா காந்தியை விட சிறந்த வேட்பாளரை என்னால் கற்பனை செய்து கூட பார்க்க முடியவில்லை என உருக்கமாக பேசியுள்ளார் காங்கிரஸ் எம்.பி ராகுல்காந்தி.

கடந்த மக்களவை தேர்தலில் ராகுல் காந்தி ரேபரேலி மற்றும் வயநாடு தொகுதிகளில் போட்டியிட்டு வெற்றி பெற்றார். ஒரே நேரத்தில் 2 தொகுதி எம்.பியாக இருக்க முடியாது என்பதால் ரேபரேலி தொகுதியை தக்கவைத்துக்கொண்டு வயநாடு தொகுதியை ராஜினாமா செய்தார் ராகுல். 2019 மக்களவை தேர்தலில் அமேதி தொகுதி ராகுல்காந்திக்கு தோல்வியை கொடுத்தாலும் வயநாடு தொகுதிதான் ராகுலை காப்பாற்றியது. அதனால் வயநாடு ராகுல்காந்திக்கு மிகவும் நெருக்கமான தொகுதி என்பதால் தனக்கு பதிலாக தனது சகோதரி பிரியங்கா காந்தியை களமிறக்கியுள்ளார் ராகுல். 

நவம்பர் 13ம் தேதி வயநாடு இடைத்தேர்தலுக்கு பிரியங்கா காந்தி தீவிரமாக தயாராகி வருகிறார். நாளை வேட்புமனு தாக்கல் செய்யவிருப்பதாக அறிவிப்பு வெளியாகியிருக்கிறது. இதனை தொடர்ந்து சோனியா காந்தி, ராகுல் காந்தி, பிரியங்கா காந்தி மூன்று பேரும் சேர்ந்து ரோட் ஷோ நடத்தவுள்ளனர். பிரியங்கா காந்தி 2019 முதலே தீவிர அரசியலில் இருந்தாலும் தேர்தல் அரசியலுக்கு வருவது இதுவே முதல்முறை என்பதால் அதிக எதிர்பார்ப்பு இருக்கிறது.

இந்தநிலையில் பிரியங்கா காந்தியை பாராட்டும் வகையில் ராகுல்காந்தி எக்ஸ் தளத்தில் பதிவிட்டுள்ளார். அதில், ‘வயநாடு மக்கள் என் மனதில் முக்கிய இடத்தை பிடித்துள்ளனர். வயநாடு மக்களுக்கு என் சகோதரியை விட சிறந்த பிரதிநிதியை என்னால் கற்பனை செய்து கூட  பார்க்க முடியாது. அவர் வயநாடு மக்களுக்காக உழைப்பதில் ஆர்வமுள்ளவராகவும், நாடாளுமன்றத்தில் சக்திவாய்ந்த குரலாகவும் இருப்பார் என்று நான் நம்புகிறேன்” என உருக்கமாக பதிவிட்டுள்ளார்.

ராகுல்காந்திக்கு 2 முறை வெற்றியை கொடுத்த வயநாடு தொகுதி பிரியங்கா காந்திக்கும் வெற்றியை கொடுக்கும் என காங்கிரஸ் கட்சியினர் அடித்து சொல்கின்றனர். நாடாளுமன்றத்திலும் பிரியங்காவின் பேச்சு காங்கிரஸ் மற்றும் கூட்டணி கட்சியினருக்கு பலமாக இருக்கும் என சொல்கின்றனர். இதோடு சேர்த்து வடக்கில் ராகுல் காந்தி, தெற்கில் பிரியங்கா காந்தி என கணக்கிட்டு ராகுல் காய்களை நகர்த்தி வருவதாக கூறப்படுகிறது.