ஒரு சாதாரண இணையதளத்தைப் பார்ப்பதன் மூலமே உங்கள் போனில் உள்ள பாஸ்வேர்டு மற்றும் ரகசியத் தகவல்களைத் திருடும் "DarkSword" என்ற புதிய ஹேக்கிங் முறை கண்டறியப்பட்டுள்ளது ஐபோன் பயன்படுத்துவோரை அதிர்ச்சியிள் ஆழ்த்தியுள்ளது
DarkSword ஹேக்கிங் எவ்வாறு செயல்படுகிறது?
DarkSword என்பது ஒரு வகை "Fileless" ஹேக்கிங் முறையாகும். இது வழக்கமான ஸ்பைவேர் மென்பொருள்களைப் போல உங்கள் போனில் எதையும் இன்ஸ்டால் செய்யாது. மாறாக, உங்கள் போனில் ஏற்கனவே இயங்கிக் கொண்டிருக்கும் சிஸ்டம் செயல்பாடுகளைப் பயன்படுத்தியே ரகசியத் தகவல்களைத் திருடுகிறது. ஒரு தீங்கிழைக்கும் இணையதளத்தில் மறைத்து வைக்கப்பட்டுள்ள "iframe" எனப்படும் பகுதி வழியாக இந்தத் தாக்குதல் தொடங்குகிறது. அங்கிருந்து உங்கள் கடவுச்சொற்கள், மெசேஜ்கள், ஐக்ளவுட் (iCloud) தகவல்கள் மற்றும் கிரிப்டோகரன்சி வேலட் விவரங்கள் வரை அனைத்தையும் இது சேகரிக்கிறது.
இந்த ஹேக்கிங்கின் மிக ஆபத்தான அம்சம் என்னவென்றால், தரவுகளைத் திருடிய பிறகு இது தானாகவே தனது அனைத்து தடயங்களையும் அழித்துவிடும். இதனால் உங்கள் போன் ஹேக் செய்யப்பட்டதை உங்களால் எளிதில் கண்டறிய முடியாது. தற்போது உக்ரைன், சவுதி அரேபியா, மலேசியா, துருக்கி மற்றும் ரஷ்யா போன்ற நாடுகளில் பரவியுள்ள இந்தத் தாக்குதல், எந்த நேரத்திலும் இந்தியாவிற்குள்ளும் நுழையக்கூடும் என நிபுணர்கள் எச்சரிக்கின்றனர்.
ஆப்பிளின் நடவடிக்கை மற்றும் பாதுகாப்பு வழிமுறைகள்
DarkSword தொடர்பான பாதிப்புகளை ஆப்பிள் நிறுவனம் ஏற்கனவே கண்டறிந்து, கடந்த ஆண்டு வெளியிடப்பட்ட iOS 15 முதல் iOS 26 வரையிலான அப்டேட்களில் அவற்றுக்கான தீர்வுகளை வழங்கியுள்ளது. குறிப்பாக iOS 18.4 முதல் iOS 18.6.2 வரையிலான பதிப்புகளை இது குறிவைப்பதால், ஆப்பிள் நிறுவனம் iOS 18.7 மற்றும் iOS 26 ஆகிய புதிய பதிப்புகளைப் பாதுகாப்புத் தீர்வுகளுடன் வெளியிட்டுள்ளது.
இன்னும் சுமார் 24% பயனர்கள் பழைய iOS 18 பதிப்புகளையே பயன்படுத்தி வருவதால், அவர்கள் உடனடியாகத் தங்கள் போன்களை அப்டேட் செய்ய வேண்டும் என்று அறிவுறுத்தப்படுகிறது. நீங்கள் iOS 13 அல்லது 14-ஐப் பயன்படுத்துபவர் என்றால், பாதுகாப்பிற்காக குறைந்தபட்சம் iOS 15-க்காவது அப்டேட் செய்ய வேண்டியது கட்டாயமாகும். மேலும், சஃபாரி (Safari) பிரவுசரில் உள்ள 'Safe Browsing' வசதி இத்தகைய தீங்கிழைக்கும் இணையதளங்களை முன்கூட்டியே தடுத்து உங்களைப் பாதுகாக்கும் என்று ஆப்பிள் உறுதி அளித்துள்ளது.