2021-ஆம் ஆண்டிற்கான ஐபிஎல் தொடர் தற்போது நடைபெற்று வருகிறது. இதில் நேற்று நடைபெற்ற லீக் போட்டியில் டெல்லி கேபிடல்ஸ்-சன்ரைசர்ஸ் அணிகள் மோதின. இந்த போட்டி மிகவும் விறு விறுப்பாக நடைபெற்றது. ஆட்டத்தின் முடிவில் இரு அணிகளும் சமமான ஸ்கோர் அடித்திருந்தால் சூப்பர் ஓவருக்கு போட்டிக்கு சென்றது. சூப்பர் ஓவரில் சிறப்பாக விளையாடிய டெல்லி அணி சன்ரைசர்ஸ் அணியை தோற்கடித்தது.
இந்நிலையில் டெல்லி கேபிடல்ஸ் அணியின் வீரர் ரவிசந்திரன் அஸ்வின் ஐபிஎல் தொடரிலிருந்து தற்காலிகமாக விலகுவதாக தெரிவித்துள்ளார். இதுகுறித்து நேற்றைய போட்டிக்கு பிறகு அவர் தனது ட்விட்டர் பக்கத்தில் ஒரு பதிவை செய்துள்ளார். அதில், “இன்று முதல் நான் ஐபிஎல் தொடரிலிருந்து விலகுகிறேன். ஏனென்றால் என்னுடைய குடும்பம் கொரோனா வைரஸ் தொற்று பாதிப்புக்கு எதிராக போராடி வருகிறது. எனவே இந்த இக்கட்டான சூழலில் நான் அவர்களுடன் இருக்க விரும்புகிறேன். அனைத்து விஷயங்களும் சரியாக சென்றால் மீண்டும் ஐபிஎல் தொடருக்கு திரும்புவேன். நன்றி டெல்லி கேபிடல்ஸ்” எனப் பதிவிட்டுள்ளார்.
அஷ்வினின் இந்தப் பதிவிற்கு பலர் ட்விட்டர் பக்கத்தில் தங்களது பிரார்த்தனை மற்றும் வாழ்த்துகளை தெரிவித்து வருகின்றனர். மேலும் இதுகுறித்து டெல்லி கேப்பிடல்ஸ் அணியும் தனது ட்விட்டர் பக்கத்தில் ஒரு பதிவை செய்துள்ளது. அதில்,"அஷ்வின் தற்காலிகமாக ஐபிஎல் தொடரிலிருந்து விலகுகிறார். இந்த இக்கட்டான சூழலில் நாங்கள் அவருக்கு துணை நிற்போம்" என்று பதிவிட்டுள்ளது.