ஐபிஎல் தொடரின் நேற்றைய லீக் போட்டியில், ராஜஸ்தான் அணியை 10 ரன்கள் வித்தியாசத்தில் வீழ்த்தி லக்னோ அணி வெற்றி பெற்றது. இதனால் புள்ளிப்பட்டியலில் ஏற்பட்டுள்ள மாற்றங்கள் தொடர்பாக இந்த தொகுப்பில் அறியலாம்.
ஐபிஎல் சீசன்:
16வது ஐ.பி.எல். சீசன் கடந்த மாதம் 31ம் தேதி தொடங்கி கோலாகலமாக நடைபெற்று வருகிறது. 3 ஆண்டுகளுக்குப் பிறகு ஐ.பி.எல். அணிகள் தங்களது சொந்த மண்ணில் உள்ளூர் ரசிகர்களுக்கு முன்னிலையில் விளையாடி வருகின்றன. இதனால் போட்டிகளை காண மைதானங்களில் மட்டுமின்றி தொலைக்காட்சி முன்னிலையிலும் மற்றும் ஆன்லைன் ஸ்டிரீமிங் தளங்களிலும் ரசிகர்கள் குவிந்து வருகின்றனர். இதுவரை 26 லீக் போட்டிகள் நடந்து முடிந்துள்ள நிலையில், பிளே ஆஃப் சுற்றுக்கு தகுதிபெற அடிப்படையான புள்ளிப்பட்டியலில் முதல் 4 இடங்களை பிடிப்பதற்காக 10 அணிகளும் முட்டி மோதி வருகின்றன.
நேற்றைய போட்டி:
இந்தூர் மைதானத்தில் நடைபெற்ற நேற்றைய லீக் போட்டியில் கே.எல். ராகுல் தலைமையிலான லக்னோ சூப்பர் ஜெயண்ட்ஸ் அணி சஞ்சு சாம்சன் தலைமையிலான ராஜஸ்தான் ராயல்ஸ் அணியை 10 ரன்கள் வித்தியாசத்தில் வீழ்த்தியது. லக்னோ அணி நிர்ணயித்த 155 ரன்கள் என்ற இலக்கை நோக்கி களமிறங்கிய ராஜஸ்தான் அணியில் தொடக்க ஆட்டக்காரர்கள் பொறுப்பான ஆட்டத்தை வெளிப்படுத்தி நல்ல அடித்தளம் அமைத்து தந்தனர். இருந்தாலும் மற்ற வீரர்கள் சோபிக்காததால் ராஜஸ்தான் அணி தோல்வியை தழுவியது. இதனால், புள்ளிப்பட்டியலில் எந்தெந்த அணிகள் எந்தெந்த இடங்களுக்கு மாற்றம் கண்டுள்ளன உள்ளன என்பதை தற்போது அறியலாம்.
புள்ளிப்பட்டியல்:
| அணிகள் | போட்டிகள் | வெற்றி | தோல்வி | புள்ளி |
| ராஜஸ்தான் | 6 | 4 | 2 | 8 |
| லக்னோ | 6 | 4 | 2 | 8 |
| சென்னை | 5 | 3 | 2 | 6 |
| குஜராத் | 5 | 3 | 2 | 6 |
| பஞ்சாப் | 5 | 3 | 2 | 6 |
| மும்பை | 5 | 3 | 2 | 6 |
| கொல்கத்தா | 5 | 2 | 3 | 4 |
| பெங்களூரு | 5 | 2 | 3 | 4 |
| ஐதராபாத் | 5 | 2 | 3 | 4 |
| டெல்லி | 5 | 0 | 5 | 0 |
முதல் நான்கு இடங்களில் யார்?
ராஜஸ்தான் மற்றும் லக்னோ அணிகள் இதுவரை விளையாடிய 6 போட்டிகளில் 4 போட்டிகளில் வென்று 8 புள்ளிகளுடன், முதல் இரண்டு இடங்களை ஆக்கிரமித்துள்ளன. அதேநேரம், சென்னை, குஜராத்,பஞ்சாப் மற்றும் மும்பை ஆகிய அணிகள் தலா 5 போட்டிகளில் விளையாடி அதில் 3 வெற்றிகளையும், 2 தோல்விகளையும் பெற்றுள்ளன. இருந்தாலும் ரன் ரேட் அடிப்படையில் இந்த அணிகள் முறையே 3 மற்றும் 6வது வரையிலான இடங்களை பிடித்துள்ளன.
மற்ற அணிகளின் நிலை:
கொல்கத்தா, பெங்களூரு மற்றும் ஐதராபாத் ஆகிய அணிகள் தலா இரண்டு வெற்றிகள் பெற்று, ரன் ரேட் அடிப்படையில் புள்ளிப்பட்டியலில் முறையே 7 முதல் 9வது இடங்களில் உள்ளன. டெல்லி அணி விளையாடிய 5 போட்டிகளிலும் தோல்வியையும் பதிவு செய்து புள்ளிப்பட்டியலில் கடைசி இடத்தை பிடித்துள்ளது.
இன்றைய போட்டி:
இன்று நடைபெறும் முதல் லீக் போட்டியில் தவான் தலைமையிலான பஞ்சாப் கிங்ஸ் மற்றும் டூப்ளெசிஸ் தலைமையிலான ராயல் சேலங்சர்ஸ் பெங்களூரு ஆகிய அணிகள் மோத உள்ளன. இந்த போட்டியில் பஞ்சாப் அணி வெற்றி பெற்றால் ரன் ரேட் அடிப்படையில் புள்ளிப்பட்டியலில் நேரடியாக 3வது இடத்திற்கு முன்னேற வாய்ப்புள்ளது. பெங்களூரு வெற்றி பெற்றால் புள்ளிப்பட்டியலில் 7வது இடத்திற்கு முன்னேறும்.
டெல்லி - கொல்கத்தா மோதல்:
இரண்டாவது லீக் போட்டியில் வார்னர் தலைமையிலான டெல்லி மற்றும் ராணா தலைமையிலான கொல்கத்தா அணிகள் மோத உள்ளன. இதில் கொல்கத்தா அணி வெற்றி பெற்றால் புள்ளிப்பட்டியலில் 3வது இடத்திற்கு முன்னேறக்கூடும்.