ஐபிஎல் தொடரின் இன்றைய முதல் லீக் போட்டியில் பஞ்சாப் மற்றும் பெங்களூரு அணிகள் மோத உள்ளன. மொஹாலியில் உள்ள மைதானத்தில் இந்திய நேரப்படி, மாலை 3.30 மணிக்கு இந்த போட்டி தொடங்க உள்ளது.
பஞ்சாப் - பெங்களூரு மோதல்:
ஐபிஎல் தொடரின் 27வது லீக் போட்டியில் தவான் தலைமையிலான பஞ்சாப் கிங்ஸ் அணியை, டூப்ளெசிஸ் தலைமையிலான பெங்களூரு அணி எதிர்கொள்ள உள்ளது. மொஹாலியில் உள்ள மைதானத்தில் நடைபெறும் போட்டி இந்திய நேரப்படி மாலை 3.30 மணிக்கு தொடங்க உள்ளது. இந்த போட்டியை தொலைக்காட்சியில் ஸ்டார் ஸ்போர்ட்ஸ் அலைவரிசையிலும், ஜியோ சினிமா தொலைக்காட்சி வாயிலாகவும் ரசிகர்கள் கண்டு களிக்கலாம்.
பஞ்சாப் அணி:
பஞ்சாப் அணி கடைசியாக விளையாடிய லீக் போட்டியில், வலுவான லக்னோ அணியை வீழ்த்திய உத்வேகத்தில் இன்றைய போட்டியில் களமிறங்க உள்ளது. ஷிகர் தவான், சிகந்தர் ராஜா, சாம் கர்ரன் மற்றும் ஷாருக்கான் ஆகியோர் அந்த அணியின் பேட்டிங் தூண்களாக உள்ளனர். அவர்களுக்கு ககிசோ ரபாடா, அர்ஷ்தீப் சிங் ஆகியோர் பந்துவீச்சில் பக்க பலமாக உள்ளனர். நடப்பு தொடரில் இதுவரை 5 போட்டிகளில் விளையாடியுள்ள பஞ்சாப் அணி, அதில் மூன்றில் வெற்றி பெற்று புள்ளிப்பட்டியலில் 5வது இடத்தில் உள்ளது.
பெங்களூரு அணி நிலவரம்:
பெங்களூரு அணி கடைசியாக விளையாடிய லீக் போட்டியில் சென்னை அணிக்கு எதிராக தோல்வி கண்டது. இதனால் மீண்டும் வெற்றிப்பாதைக்கு திரும்பும் முனைப்புடன் இன்றைய போட்டியில் களமிறங்க உள்ளது. பேட்டிங் மற்றும் பந்துவீச்சு ஆகியவை பார்ப்பதற்கு சமபலமாக இருப்பதை போன்றே தோன்றினாலும், அவை இரண்டும் வெற்றிக்காக ஒருங்கிணைந்து செயல்படாததே பெங்களூரு அணியின் பின்னடைவிற்கு முக்கிய காரணமாக உள்ளது. கோலி, டூப்ளெசிஸ் மற்றும் மேக்ஸ்வெல் ஆகியோர் பேட்டிங்கில் அசுர ஃபார்மில் உள்ளனர். ஆனால், ஹர்ஷல் படேல், முகமது சிராஜ் மற்றும் பார்னெல் ஆகியோர் ரன்களை வாரி வழங்குவது பெங்களூருவின் வெற்றியை பாதிக்கிறது. நடப்பு தொடரில் இதுவரை 5 போட்டிகளில் விளையாடியுள்ள பெங்களூரு அணி, அதில் இரண்டில் வெற்றி பெற்று புள்ளிப்பட்டியலில் 8வது இடத்தில் உள்ளது.
மைதானம் எப்படி?
மொஹாலி மைதானம் முழுக்க முழுக்க பேட்டிங்கிற்கு சாதகமாக இருப்பதால், இன்றைய போட்டியும் ஹை-ஸ்கோரிங் போட்டியாக இருக்கலாம். டாஸ் வெல்லும் அணி முதலில் பந்துவீச்சை தேர்வு செய்து, இலக்கை சேஸ் செய்யவே விரும்பும்.
சிறந்த பேட்ஸ்மேன்: விராட் கோலி இன்றைய போட்டியில் சிறப்பாக செயல்பட வாய்ப்பு உள்ளது
சிறந்த பந்துவீச்சாளர்: சாம் கர்ரன் இன்றைய போட்டியில் சிறந்த பந்துவீச்சாளராக திகழக்கூடும்
யாருக்கு வெற்றி வாய்ப்பு? : இன்றைய போட்டியில் பஞ்சாப் அணிக்கே வெற்றி வாய்ப்பு அதிகம்