ஐ.பி.எல். தொடரில் அதிக ரசிகர்களை கொண்ட அணிகளில் முதன்மையானதாக சென்னை அணி திகழ்கிறது. இதற்கு மிக முக்கிய காரணம் மகேந்திர சிங் தோனி. ஐ.பி.எல். தொடரில் தோனி தலைமையிலான சென்னை அணி இதுவரை 4 முறை சாம்பியன் பட்டத்தை கைப்பற்றியுள்ளது. இந்திய அணிக்காக 3 வடிவிலான உலகக்கோப்பையையும் பெற்றுத்தந்த தோனி சர்வதேச கிரிக்கெட் போட்டிகளில் இருந்து ஏற்கனவே ஓய்வு பெற்றுவிட்டார்.
தோனி எப்போது ஓய்வு?
தற்போது 41 வயதான தோனிக்கு இந்த ஐ.பி.எல். தொடரே கடைசி தொடராக இருக்கும் என்றும், தோனி இந்த தொடருடன் ஐ.பி.எல். தொடரில் இருந்து ஓய்வு பெறுவார் என்றும் தகவல்கள் இந்த தொடர் தொடங்குவதற்கு முன்பிருந்தே வெளியாகி வருகிறது. கடந்த சில போட்டிகளில் தோனி அளித்து வரும் பேட்டிகளும் தோனியின் ஓய்வை உறுதிப்படுத்தும் விதமாகவே உள்ளது.
இந்த நிலையில், சென்னை சூப்பர் கிங்ஸ் அணியின் தலைமை பயிற்சியாளரும், முன்னாள் தொடக்க வீரருமான ஸ்டீபன் ப்ளமிங் இதுதொடர்பாக கூறியிருப்பதாவது, தோனி தன்னுடைய ஓய்வு குறித்து இதுவரை வெளிப்படையாக ஏதும் கூறவில்லை என்றார். சேப்பாக்கத்தில் நேற்று சென்னை – பஞ்சாப் அணிகள் போட்டிக்கு பிறகு நடைபெற்ற நிருபர்கள் சந்திப்பில் ப்ளெமிங் இதை கூறினார்.
குவியும் ரசிகர்கள்:
வழக்கமாக சென்னை அணி எங்கே விளையாடினாலும் தோனியை காண்பதற்காகவே தனி ரசிகர்கள் பட்டாளம் மைதானத்தில் குவிவது உண்டு. ஆனால், இந்த முறை வழக்கத்தை விட அதிகளவில் எதிரணியின் ரசிகர்களும் சென்னை அணி விளையாடினால் தோனிக்கு பிரியாவிடை அளிப்பதுபோல மஞ்சள் நிற ஜெர்சியில் மைதானத்திற்கு வருகை தந்து ஆதரவு அளித்து வருகின்றனர்.
தோனியும் ஒரு சில போட்டிகளுக்கு பின்பு அளித்த பேட்டியில், தனக்கு வயதாகிவிட்டதாகவும், தன்னுடைய கிரிக்கெட் வாழ்வின் இறுதிகட்டத்தில் இருப்பதாகவும் கூறியிருந்தார். மேலும், கொல்கத்தா அணிக்கு எதிரான ஆட்டத்திற்கு பிறகு ஈடன்கார்டன் மைதானத்தில் பலரும் மஞ்சள் நிற ஜெர்சியில் வந்திருந்தது தனக்கு ஃபேர்வெல் அளிப்பது போல உள்ளதாக கூறியிருந்தார் என்பதும் குறிப்பிடத்தக்கது.
41 வயதான தோனி இதுவரை 243 ஐ.பி.எல். போட்டிகளில் ஆடி 5 ஆயிரத்து 52 ரன்களை விளாசியுள்ளார். அதில் 24 அரைசதங்கள் அடங்கும். அதிகபட்சமாக ஒரு போட்டியில் தோனி 84 ரன்களை விளாசியுள்ளார். ஐ.பி.எல். மட்டுமின்றி இந்திய அணிக்காகவும், சர்வதேச கிரிக்கெட்டிலும் மிகச்சிறந்த பினிஷராக தோனி திகழ்ந்தார் என்பதும் குறிப்பிடத்தக்கது.
மேலும் படிக்க: RCB vs LSG: புள்ளிப்பட்டியலில் நம்பர் 1 ஆகுமா லக்னோ..? மிரட்டல் வெற்றி பெறுமா ஆர்.சி.பி..! ஐ.பி.எல். வரலாறு சொல்வது என்ன?
மேலும் படிக்க: RCB vs LSG: லக்னோவை பழிதீர்க்குமா பெங்களூர்..? வெற்றியை தொடருமா லக்னோ..? இன்று நேருக்கு நேர் மோதல்..!