தென்னாப்பிரிக்கா-இந்தியா அணிகளுக்கு இடையேயான முதல் டெஸ்ட் போட்டி இன்று செஞ்சுரியன் மைதானத்தில் தொடங்கியது. இந்தப் போட்டியில் டாஸ் வென்ற இந்திய கேப்டன் விராட் கோலி பேட்டிங்கை தேர்வு செய்தார். முதல் இன்னிங்ஸை தொடங்கிய இந்திய அணியின் தொடக்க ஆட்டக்காரர்கள் மாயங்க் அகர்வால் மற்றும் கே.எல்.ராகுல் நிதான ஆட்டத்தை வெளிப்படுத்தினர். தென்னாப்பிரிக்காவில் நடைபெற்ற டெஸ்ட் போட்டியில் முதல் விக்கெட்டிற்கு 100 ரன்களுக்கு மேல் அடித்த மூன்றாவது ஜோடி என்ற பெருமையை ராகுல்-மாயங்க் அகர்வால் ஜோடி பெற்றது. 

 

மாயங்க் அகர்வால் 60 ரன்கள் எடுத்திருந்த போது எல்பிடபிள்யூ முறையில் ஆட்டமிழந்தார். அவரைத் தொடர்ந்து வந்த புஜாரா ரன் எதுவும் எடுக்காமல் நிகிடி பந்துவீச்சில் ஆட்டமிழந்து அதிர்ச்சி அளித்தார். கேப்டன் விரட் கோலியும் 35 ரன்கள் ஆட்டமிழந்தார். தொடர்ந்து சிறப்பான ஆட்டத்தை வெளிப்படுத்திய கே.எல்.ராகுல் 216 பந்துகளில் 14 பவுண்டரிகள் மற்றும் 1 சிக்சர் உதவியுடன் சதம் கடந்து அசத்தினார். 

 

இந்த சதத்தின் மூலம் அவர் பல சாதனைகைகளை படைத்துள்ளார். முதலில் டெஸ்ட் கிரிக்கெட் வரலாற்றில் தான் விளையாடிய அனைத்து நாடுகளிலும் தற்போது வரை சதம் அடித்த வீரர் என்ற சாதனையை ராகுல் படைத்துள்ளார். டெஸ்ட் கிரிக்கெட்டில் ராகுல் இதுவரை 7 சதம் அடித்துள்ளார். அவற்றில் இங்கிலாந்து, ஆஸ்திரேலியா, தென்னாப்பிரிக்கா என அனைத்து நாடுகளிலும் இவர் சதம் கடந்து அசத்தியுள்ளார். 


இதைபோல் ஆசியாவிற்கு வெளியே அதிகம் சதம் அடித்த இந்திய தொடக்க ஆட்டக்காரர்கள் பட்டியலிலும் இவர் இரண்டாம் இடத்தை பிடித்துள்ளார். 

 

ஆசியாவிற்கு வெளியே அதிக சதம் அடித்த இந்திய தொடக்க ஆட்டக்காரர்கள்:

வீரர்கள்  சதங்கள் 

சுனில் கவாஸ்கர் (81 இன்னிங்ஸ்)

 15
கே.எல்.ராகுல்  (34 இன்னிங்ஸ்) 5
வீரேந்திர சேவாக் (59 இன்னிங்ஸ்) 4

வினோ மன்கட் (19 இன்னிங்ஸ்)

3

ரவிசாஸ்திரி (19 இன்னிங்ஸ்)

 3

 

இவை தவிர ஆஸ்திரேலியா, இங்கிலாந்து மற்றும் தென்னாப்பிரிக்கா ஆகிய மூன்று நாடுகளிலும் சதம் கடந்த தொடக்க ஆட்டக்காரர்கள் பட்டியலிலும் கே.எல்.ராகுல் இணைந்துள்ளார். 

 

ஆஸ்திரேலியா,தென்னாப்பிரிக்கா,இங்கிலாந்தில் சதம் கடந்த தொடக்க ஆட்டக்காரர்கள்:

சையித் அன்வர் (பாகிஸ்தான்)

கிறிஸ் கெயில்(வெஸ்ட் இண்டீஸ்)

கே.எல்.ராகுல்(இந்தியா)

இவ்வாறு டெஸ்ட் கிரிக்கெட்டில் தன்னுடைய முதல் 7 சதங்களில் பல சாதனை பட்டியலில் கே.எல்.ராகுல் இணைந்துள்ளார். இந்திய அணியின் துணை கேப்டன் பொறுப்பிற்கு வந்த பிறகு முதல் போட்டியிலேயே சதம் கடந்து இவர் அசத்தியுள்ளார். 

மேலும் படிக்க: தென்னாப்பிரிக்க மண்ணில் முதல் சதம்.. நிதானமாக செய்கை செய்த ராகுல்.!