இந்திய கிரிக்கெட் அணியின் முக்கிய வீரர் கே.எல்.ராகுல். இந்திய டெஸ்ட் அணிக்கு கேப்டனாக தலைமை வகித்துள்ள கே.எல்.ராகுல், ரோகித் சர்மாவிற்கு காயம் ஏற்பட்டுள்ளதால் தற்போது வங்காளதேசத்தில் நடைபெற்று வரும் டெஸ்ட் போட்டிக்கு கேப்டனாக பொறுப்பேற்றுள்ளார். கே.எல்.ராகுலும், பிரபல பாலிவுட் நடிகர் சுனில் ஷெட்டியின் மகளுமாகிய அதியா ஷெட்டி கடந்த மூன்று வருடங்களாக காதலித்து வருகின்றனர்.
இவர்களது திருமணம் விரைவில் நடைபெறும் என்று ஏற்கனவே அறிவிப்புகள் வெளியாகி வந்த நிலையில், தற்போது கே.எல்.ராகுல் – அதியாஷெட்டி திருமணம் அடுத்தாண்டு ஜனவரி 21 முதல் ஜனவரி 23 ஆகிய தேதிகளில் நடைபெறும் என்று தகவல்கள் வெளியாகியுள்ளது.
திருமணத்திற்கான ஏற்பாடுகள் அடுத்த வாரம் தொடங்கும் என்று எதிர்பார்க்கப்படுகிறது. ஏற்கனவே அதியா ஷெட்டியின் தந்தையாகிய சுனில்ஷெட்டி கே.எல்.ராகுல் – அதியாஷெட்டியின் திருமணம் மும்பையில் உள்ள தனது இல்லத்திலே நடைபெறும் என்று அறிவித்திருந்தார். ஏனென்றால், பாலிவுட் திரைப்பிரபலங்கள் மற்றும் பிரபல கிரிக்கெட் வீரர்கள் பங்கேற்பார்கள் என்பதால், பல்வேறு வசதிகளை கருத்தில் கொண்டு தனது இல்லத்திலே நடத்த சுனில்ஷெட்டி இந்த முடிவை எடுத்திருப்பதாக தகவல்கள் வெளியானது.
திருமணத்திற்காக கே.எல்.ராகுல் நீண்ட விடுப்பு கேட்டிருந்ததற்கு பி.சி.சி.ஐ. அனுமதி அளித்ததாக கூறப்படுகிறது. கே.எல்.ராகுல் – அதியாஷெட்டி திருமணம் தொடர்பான தகவல்களுக்கு பதிலளித்த சுனில்ஷெட்டி, திருமணம் தொடர்பாக வரும் அனைத்து வதந்திகளும் எனக்கு தெரியும். இருவரின் வேலை அட்டவணை ஆகியவற்றை கருத்தில் கொண்டு பரிசீலித்து வருகிறோம். எப்போது? எங்கே? திருமணம் நடைபெறும் என்பதை விரைவில் நாங்களே கூறுகிறோம்” இவ்வாறு அவர் கூறினார்.
கே.எல்.ராகுல் – அதியாஷெட்டி கடந்த மூன்று ஆண்டுகளாக காதலித்து வந்தாலும், கடந்தாண்டுதான் தாங்கள் காதலிப்பதை வெளிப்படையாக கூறினர். இவர்களது காதல் உறுதி செய்யப்பட்ட பிறகு, இவர்களது திருமணம் தொடர்பான செய்திகள் தொடர்ந்து உலா வந்து கொண்டிருக்கிறது. அதியா ஷெட்டி கடந்த 2015ம் ஆண்டு முதல் நடித்து வருகிறார். ஹீரோ என்ற இந்தி படம் மூலமாக 2015ம் ஆண்டு பாலிவுட்டில் அறிமுகமானார். மும்பையில் பள்ளிப்படிப்பை முடித்த பிறகு நியூயார்க்கில் திரைப்பட தொடர்பான படிப்பை நிறைவு செய்தார். 2019ம் ஆண்டுக்கு பிறகு அதியாஷெட்டி எந்த படமும் நடிக்கவில்லை என்பது குறிப்பிடத்தக்கது.
மேலும் படிக்க: World Test Championship: அடிச்சான் பாரு அப்பாய்ட்மெண்ட் ஆர்டர்.. இத பண்ணா இந்தியா, உலக டெஸ்ட் சாம்பியன் இறுதிப்போட்டிக்கு தகுதிபெறும்!
மேலும் படிக்க: Sanju Samson: சஞ்சு சாம்சனை எங்கள் நாட்டிற்காக விளையாட அழைத்தோமோ..? அயர்லாந்து கிரிக்கெட் வாரியம் பதில் என்ன..?