இந்திய அணி வெஸ்ட் இண்டீஸ் அணிகளுக்கு எதிராக 2 டெஸ்ட் போட்டிகள் கொண்ட தொடரில் விளையாட இருக்கிறது. இது உலக டெஸ்ட் சாம்பியன்ஷிப் 2023-25 தொடரை வெஸ்ட் இண்டீஸ் மற்றும் இந்திய அணி தொடங்குகிறது. இந்த தொடரில் பங்கேற்கும் இந்திய அணி என்னவாக இருக்கும் என தொடர்ந்து கேள்விகள் எழுந்து வருகிறது. மேலும்,    வெஸ்ட் இண்டீஸ் அணிக்கு எதிரான டெஸ்ட் தொடரில் இந்திய அணி நிர்வாகம் பெரிய அளவில் மாற்றம் செய்யவில்லை என்றாலும் சில வீரர்களுக்கு ஓய்வளிக்கலாம் என நம்பப்படுகிறது. மேலும், வெஸ்ட் இண்டீஸ் டெஸ்ட் தொடரில் ரோஹித் சர்மா அணியை தலைமை தாங்குவார் என எதிர்பார்க்கப்படுகிறது. 


ஆடும் லெவன் அணி எப்படி இருக்கும்..? 


இந்திய டெஸ்ட் அணியில் ரோகித் சர்மா, சுப்மன் கில், விராட் கோலி மற்றும் அஜிங்க்யா ரஹானே ஆகியோர் விளையாடும் லெவன் அணியில் இடம் பெறுவது உறுதி. ஆனால் சேதேஷ்வர் புஜாரா அணியில் இடம்பெறுவாரா என்பதுதான் சந்தேகமாக உள்ளது. காரணம், சேதேஷ்வர் புஜாராவின் ஃபார்ம்தான் மிகப்பெரிய சிக்கல். இந்திய அணிக்காக புஜாரா கடந்த  28 டெஸ்டில் 58 இன்னிங்ஸ்களில் ஒருமுறை மட்டுமே சதம் அடித்துள்ளார். அதேபோல், 11 அரைசதங்களை பதிவு செய்துள்ளார்.


புஜாராவுக்கு பதிலாக ஜெய்ஸ்வாலா..?


வெஸ்ட் இண்டீஸ் அணிக்கு எதிரான தொடரில் சேதேஷ்வர் புஜாராவுக்குப் பதிலாக யஷஸ்வி ஜெய்ஸ்வால் விளையாடப்படலாம். அதே சமயம், சேட்டேஷ்வர் புஜாரா அணியில் இடம்பிடித்தாலும், அவருக்கு ப்ளேயிங் லெவனில் விளையாட வாய்ப்பு கிடைக்கும் என்பதற்கு எந்த உத்தரவாதமும் இல்லை.  வெஸ்ட் இண்டீஸ் அணிக்கு எதிரான டெஸ்ட் தொடரில் இளம் பேட்ஸ்மேன் யஷஸ்வி ஜெய்ஸ்வால் களமிறங்கலாம். இவர் கடந்த ஐபிஎல் 2023 சீசனில் 13 பந்துகளில் அரைசதம் கடந்து அனைவரையும் கவர்ந்தார். இது தவிர வேகப்பந்து வீச்சாளர் முகமது ஷமிக்கு இந்த டெஸ்ட் தொடரில் ஓய்வு அளிக்கப்படலாம்.


ஒருநாள் மற்றும் டி20 தொடர்களில் விராட் கோலி மற்றும் ரோஹித் சர்மாவுக்கு ஓய்வு அளிக்கப்பட்டு, டெஸ்ட் தொடரில் மட்டுமே விளையாட இருப்பதாக கூறப்படுகிறது. சஞ்சு சாம்சன், யஷஸ்வி ஜெய்ஸ்வால், உம்ரான் மாலிக் மற்றும் அர்ஷ்தீப் சிங் ஒருநாள் மற்றும் டி20 போட்டிகளில் இந்திய அணிக்காக அழைக்கப்படலாம். இந்த போட்டிகளுக்கு ஹர்திக் பாண்டியா கேப்டனாக செயல்படுவார் என்றும் கூறப்படுகிறது. 


டெஸ்ட் தொடர்:


முதல் போட்டி - ஜூலை 12, புதன் முதல் ஜூலை 16 வரை, ஞாயிறு - வின்ட்சர் பார்க், ரோசோ, டொமினிகாவில். 
இரண்டாவது போட்டி - ஜூலை 20, வியாழன் முதல் ஜூலை 24 வரை, திங்கள் - குயின்ஸ் பார்க் ஓவல், போர்ட் ஆஃப் ஸ்பெயின், டிரினிடாட்டில்.