IND Vs ENG 2nd T20: சென்னை சேப்பாக்கம் மைதானம் எப்படி? இந்தியா சாதிக்குமா? இதுவரை நடந்த போட்டிகளின் விவரங்கள்
IND Vs ENG 2nd T20: இந்தியா மற்றும் இங்கிலாந்து அணிகளுக்கு இடையேயான இரண்டாவது டி20 போட்டி, நாளை சென்னையில் நடைபெற உள்ளது.
IND Vs ENG 2nd T20: சென்னை சேப்பாக்கம் மைதானத்தில் நடந்த சர்வதேச டி20 போட்டிகளின் விவரங்களை இந்த தொகுப்பில் அறியலாம்.
இந்தியா Vs இங்கிலாந்து 2வது டி20 போட்டி:
இந்தியாவில் சுற்றுப்பயணம் மேற்கொண்டுள்ள இங்கிலாந்து அணி, முதலில் 5 போட்டிகள் கொண்ட டி20 தொடரில் விளையாடுகிறது. அதன்படி, கடந்த 22ம் தேதி கொல்கத்தாவில் இரு அணிகளுக்கு இடையேயான முதல் போட்டி நடைபெற்றது. அதில் அபிஷேக் சர்மா, வருண் சக்ரவத்தி மற்றும் அர்ஷ்தீப் சிங் ஆகியோரின் அபாரமான செயல்திறனால் இந்திய அணி வெற்றி பெற்று, தொடரில் 1-0 என முன்னிலை வகிக்கிறது. இந்நிலையில், இரு அணிகளுக்கு இடையேயான இரண்டாவது டி20 போட்டி சென்னை சேப்பாக்கம் மைதானத்தில் நாளை நடைபெற உள்ளது.
சென்னை ரசிகர்கள் மிகுந்த எதிர்பார்ப்பு:
சென்னையில் நடைபெறும் சர்வதேச டி20 போட்டியை நேரில் காண, உள்ளூர் ரசிகர்கள் மிகுந்த ஆர்வமுடன் உள்ளனர். இதற்கான டிக்கெட்டுகள் ஏற்கனவே விற்பனை செய்யப்பட்டுள்ளன. இந்நிலையில், சென்னை சேப்பாக்கம் மைதானம் எப்படி? சர்வதேச போட்டிகளில் தாக்கம் எப்படி? இந்திய அணிக்கு சாதகமா? என்பன போன்ற கேள்விகளுக்கான பதில்கள் கீழே வழங்கப்பட்டுள்ளன.
சென்னை சேப்பாக்கம் மைதானம் எப்படி?
சேப்பாக்கம் மைதானம் என்று அழைக்கப்படும் எம்ஏ சிதம்பரம் மைதானத்தில், இதுவரை 2 சர்வதேச டி20 போட்டிகள் மட்டுமே நடைபெற்றுள்ளன. அதில், ஒரு போட்டியில் முதலில் பேட்டிங் செய்த அணியும், மற்றொரு போட்டியில் சேஸ் செய்த அணியும் வெற்றி பெற்றுள்ளது. இதில் இந்திய அணி ஒரு போட்டியில் வெற்றியும், ஒரு போட்டியும் தோல்வியும் கண்டுள்ளது. கடைசியாக இந்த மைதானத்தில் நவம்பர் 2018ம் ஆண்டு, மேற்கிந்திய தீவுகளுக்கு எதிரான டி20 தொடரின் மூன்றாவது போட்டியில் இந்தியா விளையாடியது. அதில் ஷிகர் தவான் மற்றும் ரிஷப் பண்டின் அதிரடி ஆட்டத்தால் இந்திய அணி வெற்றி பெற்றது.
வீரர்களின் புள்ளி விவரங்கள்:
- சேப்பாக்கம் மைதானத்தில் அதிகபட்ச ஸ்கோர் - 182, இந்தியா vs மேற்கிந்திய தீவுகள், 2018
- சேப்பாக்கம் மைதானத்தில் குறைந்தபட்ச ஸ்கோர் - 166, இந்தியா vs நியூசிலாந்து, 2012
- சேப்பாக்கம் மைதானத்தில் தனிநபரின் அதிகபட்ச ஸ்கோர் - 92 ரன்கள், தவான் vs மேற்கிந்திய தீவுகள்
- சேப்பாக்கம் மைதானத்தில் தனிநபரின் சிறந்த பந்துவீச்சு - 3/31, இர்ஃபான் பதான் vs நியூசிலாந்து
சேப்பாக்கம் மைதானம் ரிப்போர்ட்
சென்னையின் எம்.ஏ சிதம்பரம் ஸ்டேடியம் சுழற்பந்து வீச்சாளர்களுக்கு உதவியாக இருக்கும் என அனைவரும் அறிந்ததே. அதேநேரம், தொடக்கத்தில் நிலைத்து நின்று ஆடினால் பின்னர் பேட்ஸ்மேன்களும் ரன்களை குவிக்கலாம். போட்டியின் முடிவைத் தீர்மானிப்பதில் பனி ஒரு பெரிய காரணியாக இருக்காது, அதே சமயம் சமீப ஆண்டுகளில் இருந்த போக்கை விட, பேட்ஸ்மேன்களுக்கு சாதகமாக பிட்ச் ஃபிளாட் ஆக இருக்கும் என்று எதிர்பார்க்கப்படுகிறது. டாஸ் வென்ற அணி முதலில் பேட்டிங் செய்வதையே விரும்பும்.