இந்திய கிரிக்கெட் அணி தென்னாப்பிரிக்கா சுற்றுப்பயணம் செய்து மூன்று டெஸ்ட் மற்றும் மூன்று ஒருநாள் போட்டிகளில் பங்கேற்கிறது. இதன் முதல் டெஸ்ட் போட்டியில் இந்திய அணி டாஸ் வென்று பேட்டிங்கை தேர்வு செய்துள்ளது. தென்னாப்பிரிக்காவில் தற்போது ஒமிக்ரான் பாதிப்பு அதிகமாக உள்ளதால் இந்தத் தொடருக்கு மைதானத்தில் ரசிகர்களுக்கு அனுமதி வழங்கப்படவில்லை.
33 வயதான இந்திய கேப்டன் விராட் கோலியின் கடைசி சதம் நவம்பர் 2019 இல் பங்களாதேஷுக்கு எதிராக அமைந்தது. அதன்பிறகு கடந்த 2 ஆண்டுகளாக அவரது பேட்டிங்கில் இருந்து சதம் என்ற கணக்கு எட்டப்படவில்லை. இந்தநிலையில், விராட் கோலி தென்னாப்பிரிக்கா டெஸ்ட் தொடரில் சிறப்பான ஆட்டத்தை வெளிப்படுத்தினால் 7 மகத்தான சாதனைகள் படைக்க வாய்ப்புள்ளது. அவை பின்வருமாறு :
ரன் எண்ணிக்கையில் சேவாக், டிராவிட்டை மிஞ்ச வாய்ப்பு :
தென்னாப்பிரிக்காவுக்கு எதிரான 12 டெஸ்ட் போட்டிகளில், இந்திய கேப்டன் விராட் கோலி 59.72 என்ற சராசரியில் 1,075 ரன்கள் குவித்துள்ளார். (மூன்று சதங்கள் மற்றும் மூன்று அரைசதங்கள்) தென்னாப்பிரிக்காவுக்கு எதிரான டெஸ்ட் ரன்களின் அடிப்படையில் கோலி முன்னாள் இந்திய வீரர்களான ராகுல் டிராவிட் (1,252), வீரேந்திர சேவாக் (1,306) ஆகியோரை கடக்க அதிக வாய்ப்புள்ளது.
SA மண்ணில் 1,000 ரன்களை கடக்க வாய்ப்பு :
தென்னாப்பிரிக்க மண்ணில் ஐந்து டெஸ்ட் போட்டிகளில், கோஹ்லி 55.80 சராசரியில் 558 ரன்கள் குவித்துள்ளார். தென்னாப்பிரிக்காவில் இரண்டு சதங்கள் மற்றும் இரண்டு அரைசதங்கள் அடித்துள்ளார். டெண்டுல்கருக்குப் பிறகு தென்னாப்பிரிக்கா மண்ணில் 1,000 ரன்களைக் கடந்த இரண்டாவது இந்தியர் என்ற பெருமையை கோலி படைக்க ஆறு இன்னிங்ஸ்களில் 442 ரன்கள் தேவை. இந்த ரன்களை கோலி அடித்தால் டெண்டுல்கருக்குப் பிறகு SA மண்ணில் இரு நாடுகளுக்கு இடையே 1,000-க்கும் அதிகமான ரன்களை எடுத்த இரண்டாவது பேட்ஸ்மேன் என்ற சாதனையை படைப்பார்.
அந்நிய மண்ணில் 4,000 ரன்கள் :
கோலி அந்நிய மண்ணில் டெஸ்ட் கிரிக்கெட்டில் 43.23 சராசரியுடன் 3,978 ரன்கள் எடுத்துள்ளார். அந்நிய மண்ணில் 4,000 டெஸ்ட் ரன்களை எடுக்க அவருக்கு இன்னும் 22 ரன்கள் தேவை. சச்சின் டெண்டுல்கர், ராகுல் டிராவிட், சுனில் கவாஸ்கர், விவிஎஸ் லக்ஷ்மண் மற்றும் சவுரவ் கங்குலி ஆகியோருக்குப் பிறகு இந்த மைல்கல்லை எட்டிய ஆறாவது இந்திய வீரர் என்ற சாதனையையும் படைப்பார்.
அந்நிய மண்ணில் டெஸ்ட் கேப்டனாக 3,000 ரன்கள் :
ஒரு டெஸ்ட் கேப்டனாக கோலி 34 டெஸ்ட் போட்டிகளில் 47.22 சராசரியுடன் 2,739 ரன்கள் குவித்துள்ளார். அந்நிய மண்ணில் 3,000 டெஸ்ட் ரன்களைக் கடந்த முதல் இந்திய கேப்டன் என்ற பெருமையை அவர் பெறுவார். டெஸ்ட் கிரிக்கெட்டில் நான்கு கேப்டன்கள் மட்டுமே இந்த மைல்கல்லை எட்டியுள்ளனர் என்பது குறிப்பிடத்தக்கது. அவர்கள் கிரேம் ஸ்மித் (4,854), கிளைவ் லாயிட் (3,526), ஸ்டீபன் ஃப்ளெமிங் (3,314), மற்றும் ஆலன் பார்டர் (3,175).
கேப்டனாக மொத்தம் 6,000 ரன்கள் :
டெஸ்ட் போட்டிகளில் கேப்டனாக விராட் கோலி 5,703 ரன்களை குவித்துள்ளார். 6,000-க்கும் மேற்பட்ட டெஸ்ட் ரன்களை எடுத்த கேப்டன்களாக கிரேம் ஸ்மித் (8,659), ஆலன் பார்டர் (6,623), மற்றும் ரிக்கி பாண்டிங் (6,542) அடுத்தடுத்த இடங்களில் உள்ளனர்.
8,000 டெஸ்ட் ரன்கள் :
கோலி டெஸ்ட் கிரிக்கெட்டில் 50.65 சராசரியில் 7,801 ரன்கள் குவித்துள்ளார். இந்த போட்டிகளில் 200 ரன்களை கடந்தால் டெஸ்ட் போட்டிகளில் இந்த சாதனையை எட்டிய 32வது வீரர் என்ற சாதனையை படைப்பார். மேலும், டெண்டுல்கர், டிராவிட், கவாஸ்கர், லக்ஷ்மண் மற்றும் சேவாக் ஆகியோருக்குப் பிறகு இந்த சாதனையை எட்டிய ஆறாவது இந்தியர் என்ற பெருமையும் சேரும்.
100 டெஸ்ட் போட்டிகள் :
கோஹ்லி இதுவரை 97 டெஸ்ட் போட்டிகளில் விளையாடியுள்ளார். SA தொடருக்கு பிறகு அவர் இந்தியாவுக்காக 100 டெஸ்ட் போட்டிகளில் விளையாடுவார். டெஸ்ட் போட்டிகளில் 100 போட்டிகளில் விளையாடி சாதனை படைத்த 71வது வீரர் என்ற பெருமையை அவர் பெறுவார். டெண்டுல்கர், டிராவிட், லட்சுமண், அனில் கும்ப்ளே, கபில்தேவ், சுனில் கவாஸ்கர், திலீப் வெங்சர்க்கார், சவுரவ் கங்குலி, இஷாந்த் சர்மா, வீரேந்திர சேவாக், ஹர்பஜன் சிங், முகமது அசாருதின் ஆகியோருக்குப் பிறகு இந்த சாதனையை எட்டிய 13வது இந்தியர் என்ற பெருமையையும் கோலி பெற இருக்கிறார்.
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைத்தள பக்கங்களிலும் பின் தொடரலாம்