வடலூரில் வள்ளலார் நிறுவிய சத்தியஞான சபையில் 152வது ஆண்டு தைப்பூச ஜோதி தரிசனப் பெருவிழா இன்று கொடியேற்றத்துடன் தொடங்கியது. நாளை ஜோதி தரிசனம் நடைபெறுகிறது.


இறைவன் உருவமற்றவர் ஜோதி வடிவானவர் இறைவன் என்பதை உணர்த்திய நாளே தைப்பூசத் திருவிழாவாக வடலூரில் அனுசரிக்கப்படுகிறது. 


‘‘வாடிய பயிரை கண்ட போதெல்லாம் வாடி நின்றேன்’’ என்று பாடி ஜீவ காருண்யத்தை உலகுக்கு எடுத்துரைத்த வள்ளலார் கடலூர் மாவட்டம் வடலூரில் சத்தியஞான சபையை நிறுவினார். இங்கு ஆண்டுதோறும் தைப்பூச ஜோதி தரிசனப் பெருவிழா வெகு விமரிசையாக நடைபெறுவது வழக்கம், வடலூரில் நடைபெறும் ஜோதி தரிசன விழாவை காண பல்லாயிரக்கணக்கான பக்தர்கள் வருகை தருவார்கள்.


வடலூர் சத்ய ஞான சபையில் 152-வது ஆண்டு தைப்பூச ஜோதி தரிசனப் பெருவிழா இன்று கொடியேற்றத்துடன் தொடங்கியது.




முன்னதாக அதிகாலை 5 மணிக்கு அகவல் பாராயணம் பாடப்பட்டது. பின்னர் 7.30 மணிக்கு தர்மசாலையில் சன்மார்க்க கொடி ஏற்றப்பட்டது. இதனை தொடர்ந்து வள்ளலார் பிறந்த மருதூரில் உள்ள அவரது இல்லம், வள்ளலார் தண்ணீரால் விளக்கு எரிய செய்த கருங்குழி ஆகிய இடங்களில் கொடி ஏற்றப்பட்டது.


அதன்பின், சத்திய ஞான சபைக்கு இடம் வழங்கிய பார்வதிபுரம் கிராம மக்கள் பல்வேறு வகையான பழங்கள் மற்றும் சீர்வரிசை பொருட்களை கையில் ஏந்தியபடியும், வள்ளலார் பயன்படுத்திய பொருட்களை அலங்கரிக்கப்பட்ட பல்லக்கில் சுமந்த படி ஊர்வலமாக ஞானசபை கொடிமரம் அருகே வந்தனர். ‘அருட்பெருஞ்ஜோதி அருட்பெருஞ்ஜோதி, தனிப்பெருங்கருணை அருட்பெருஞ்ஜோதி’ என்கிற வள்ளலாரின் பாடலை அங்கு கூடியிருந்தவர்கள் பாடியபடி பின்னர் கொடிமரத்தில் சன்மார்க்க கொடி ஏற்றப்பட்டது.


விழாவின் முக்கிய நிகழ்வான தைப்பூச ஜோதி தரிசனப் பெருவிழா நாளை (05.02.2023) நடைபெற உள்ளது. காலை 6 மணிக்கு, முதல் ஜோதி தரிசனம் அதன் பின்னர் காலை 10 மணி, நண்பகல் 1 மணி, இரவு 7 மணி, 10 மணி, நாளை மறுநாள் காலை 5.30 மணி என ஆறு காலங்களில் ஏழு திரைகளை நீக்கி ஜோதி தரிசனம் நடைபெறும்.


ஜோதி தரிசனத்தை காண லட்சக்கணக்கானவர்கள் வடலூரில் ஒன்று கூடுவார்கள் என்பதால், அசம்பாவித சம்பவங்கள் நடைபெறாமல் தடுக்கும் விதமாக பல்வேறு பகுதிகளில் கண்காணிப்பு கேமராக்கள் பொருத்தப்பட்டுள்ளது. பாதுகாப்புக்காக போலீசாரும் குவிக்கப்பட்டுள்ளனர்.


கடலூர், விருத்தாசலம், நெய்வேலி, பண்ருட்டி, சிதம்பரம், விழுப்புரம், கள்ளக்குறிச்சி, உளுந்தூர்பேட்டை, திருக்கோவிலூர், விழுப்புரம், சேலம், திருவண்ணாமலை, கும்பகோணம், வேலூர், சென்னை, புதுச்சேரி ஆகிய பகுதிகளில் இருந்து அரசு போக்குவரத்து கழகம் சார்பில் சிறப்பு பேருந்துகள் இயக்க ஏற்பாடுகள் செய்யப்பட்டுள்ளன.நாளை கடலூர் மாவட்டம் முழுவதும் மதுபான கடைகளுக்கு விடுமுறை விடப்பட்டுள்ளது. ஜோதி தரிசன விழாவை ஒட்டி வடலூர் நகரம் விழாக்கோலம் கண்டுள்ளது.