கோவிலூர் கிராமத்தில் ஆயிரம் ஆண்டு பழமை வாய்ந்த அருள்மிகு ஸ்ரீ மெய்ப்பொருள் நாத சுவாமி ஆலயத்தில் 14 ஆண்டுகளுக்கு பின்பு புனரமைக்கப்பட்டு அஷ்டபந்தன மகா கும்பாபிஷே விழா இன்று சிறப்பாக நடைபெற்றது.
கரூர் மாவட்டம் அரவக்குறிச்சி அருகே கோவிலூர் கிராமத்தில் ஆயிரம் ஆண்டு பழமை வாய்ந்த குடிகொண்டு அருள் பாலித்து வரும் அருள்மிகு ஸ்ரீ மெய்ப்பொருள் நாத சுவாமி ஆலயத்தில் 14 ஆண்டுகளுக்கு பின்பு புனரமைக்கப்பட்டு அஷ்டபந்தன மகா கும்பாபிஷே விழா இன்று சிறப்பாக நடைபெற்றது. இந்நிகழ்ச்சியை முன்னிட்டு ஆலயம் அருகே பிரத்தியேகமாக யாக குண்டங்கள் அமைக்கப்பட்டு, சிவாச்சாரியார்கள் யாக வேள்வி நடத்தினர். அதில் முதல் கால யாக வேள்வி, இரண்டாம் கால யாக வேள்வி, மூன்றாம் கால யாக வேள்வி யென மூன்று கால யாக வேள்வி நடைபெற்ற பிறகு யாகத்தில் பூஜிக்கப்பட்ட புனித கலசத்திற்கும், சிவாச்சாரியார் தூப தீபங்கள் காட்டப்பட்டு நெய்வேத்தியம் சமர்ப்பிக்கப்பட்டு பஞ்ச கற்பூர ஆலாத்தியுடன் மகா தீபாராதனை காட்டினார்.
அதைத் தொடர்ந்து யாக சாலையில் இருந்து மேல தாளங்கள் முழங்க பூஜிக்கப்பட்ட புனித தீர்த்த குடத்தை தலையில் சுமந்தவாறு கோபுரம் கலசம் வந்தடைந்த சிவாச்சாரியார். சிவ சிவ என பக்தர்கள் கோஷத்துடன் கோபுர கலசத்திற்கு புனித நீர் ஊற்றப்பட்டது. தொடர்ந்து மூலவர் அருள்மிகு நல்ல மங்கை உடனமர், அருள்மிகு மெய்ப்பொருள் நாத சுவாமி, சத்திய நாராயண சுவாமி, விநாயகாதி உள்ளிட்ட பரிவார சுவாமிகளுக்கும் பூஜிக்கப்பட்ட புனித தீர்த்தத்தால் அபிஷேகம் நடைபெற்று அதை தொடர்ந்து கூடியிருந்த அனைத்து பக்தர்கள் மீது புனித தீர்த்தம் தெளிக்கப்பட்டது.
பின்னர் அனைவருக்கும் பிரசாதம் வழங்கப்பட்டது. மகா கும்பாபிஷே விழாவை காண கரூர் மற்றும் அரவக்குறிச்சி சுற்றுவட்டார பகுதியில் இருந்து ஆயிரத்துக்கு மேற்பட்ட ஆன்மீக பக்தர்கள் ஆலயம் வருகை தந்து சுவாமி தரிசனம் செய்தனர். நிகழ்ச்சியின் ஏற்பாட்டை ஆலய நிர்வாகிகள் சிறப்பான முறையில் ஏற்பாடுகளை செய்திருந்தனர். அதை தொடர்ந்து அனைவருக்கும் அன்னதானம் வழங்கப்பட்டது.