CSK vs RR: வீக்கெண்ட் மோதலில் இன்று சென்னை vs ராஜஸ்தான் ; போட்டிக்கு ரெடியா?

நடப்பு ஐபிஎல் சீசனில் 11 போட்டிகளில் விளையாடி இருக்கும் தோனி தலைமையிலான சென்னை சூப்பர் கிங்ஸ் அணி, 9 போட்டிகளில் வெற்றி பெற்று 18 புள்ளிகளுடன் முதல் அணியாக ப்ளே ஆஃப் சுற்றுக்கு தகுதி பெற்றது.

ஐக்கிய அரபு அமீரகத்தில் நடந்த கடந்த ஐபிஎல் சீசனில், முதல் அணியாக வெளியேறிய சென்னை இம்முறை வலுவான கம் - பேக் கொடுத்துள்ளது. இனி சென்னை அணிக்கு ஒரே கவலை, புள்ளிப்பட்டியலில் முதல் இடத்தைப் பிடித்து குவாலிஃபையர் போட்டியில் விளையாடி முதல் அணியாக இறுதிப்போட்டிக்கு செல்ல வேண்டும் என்பது மட்டும்தான்.

சென்னை அணிக்கு இன்னும் 3 போட்டிகள் மீதமிருக்கும் நிலையில், 11 போட்டிகளில் 4 வெற்றிகளுடன் புள்ளிப்பட்டியலில் ஏழாவது இடத்தில் இருக்கும் ராஜஸ்தான் ராயல்ஸ் அணியுடன் மோத உள்ளது.

இதுவரை 25 போட்டிகளில் இரு அணிகளும் மோதியுள்ளன. அதில், சென்னை 15 முறையும், ராஜஸ்தான் 10 முறையும் வெற்றி பெற்றுள்ளது. இன்று போட்டி நடைபெறும் அபுதாபி ஷேக் சையத் கிரிக்கெட் மைதானத்தில் இரு அணிகளும் ஒரு முறை மோதியுள்ளன. இதில், சென்னை அணியே வெற்றியை ஈட்டியது.

முதலில் பேட்டிங் செய்து, சென்னை சூப்பர் கிங்ஸ் அணி 8 முறையும், ராஜஸ்தான் ராயல்ஸ் அணி 4 முறையும் வெற்றி பெற்றுள்ளன. சேஸிங் ரெக்கார்டில், சென்னை அணி 7 முறையும், ராஜஸ்தான் 6 முறையும் வெற்றி பெற்றுள்ளது.

இனி வரும் போட்டிகளில், கட்டாயம் வெற்றி பெற வேண்டும் என்பது மட்டுமின்றி, மும்பை, பஞ்சாப், கொல்கத்தா அணிகளின் வெற்றி தோல்விகளையும் பொறுத்தே ராஜஸ்தானின் ப்ளே ஆஃப் வாய்ப்பு உறுதி செய்யப்படும்