SAFF Championship: தெற்காசிய கால்பந்து போட்டியில் அரையிறுதிக்கு முன்னேறிய இந்தியா..சாதனைகள் படைக்கும் சுனில் சேத்ரி!

14 ஆவது தெற்காசிய கால்பந்து சாம்பியன்ஷிப் போட்டி பெங்களூருவில் உள்ள ஸ்ரீ கண்டிராவா மைதானத்தில் நடந்து வருகிறது.

தற்போது லீக் போட்டிகள் நடைப்பெற்று வரும் நிலையில் நேற்று நடந்த ஆட்டத்தில் இந்தியா மற்றும் நேபாளம் அணிகள் மோதின. தொடக்கம் முதலே இந்திய அணியின் கை சற்று ஓங்கி இருந்தாலும் முதல் பாதியில் இந்தியாவால் கோல் எதுவும் அடிக்க முடியவில்லை.

இந்நிலையில் முதல் பாதி 0-0 என்ற கணக்கில் நிறைவுற்றது. அதை தொடர்ந்து நடைப்பெற்ற இரண்டாம் பாதியில் இந்திய அணி அடுத்தடுத்து இரண்டு கோல்கள் அடித்தது. 61 ஆவது நிமிடத்தில் கேப்டன் சுனில் சேத்ரியும் 70 ஆவது நிமிடத்தில் மகேஷ் சிங்கும் கோல் அடித்து அசத்தினர்.

பிறகு இரு அணிகளின் கோல் முயற்சியும் கைக்கொடுக்காத நிலையில் 2-0 என்ற கோல் கணக்கில் வெற்றி பெற்றது இந்தியா. இந்த வெற்றிப் பெற்றதோடு அரையிறுதி போட்டிக்கும் தகுதி பெற்றுள்ளது இந்திய கால்பந்து அணி.

இது வரை இந்த தொடரில் சுனில் சேத்ரி 4 கோல்கள் அடித்துள்ளார். மேலும், இதன் மூலம் அவரது சர்வதேச கோல் எண்ணிக்கை 91 ஆக உயர்ந்துள்ளது.

இது இந்திய அணியின் இரண்டாவது வெற்றி ஆகும். முதல் போட்டியில் 4-0 என்ற கோல் கணக்கில் பாகிஸ்தானை கிழித்து தொங்கவிட்டிருந்தது இந்தியா என்பது குறிப்பிடத்தக்கது.