Thug Life : விரைவில் தொடங்க போகும் “தக் லைஃப்” படப்பிடிப்பு!

லோகேஷ் கனகராஜ் இயக்கத்தில் வெளியான 'விக்ரம்' திரைப்படம் மூலம் மீண்டும் சினிமாவில் மாஸாக ரீ என்ட்ரி கொடுத்தார் உலக நாயகன் கமல்ஹாசன்.

அதன் தொடர்ச்சியாக பல ஆண்டுகளாக நிறுத்தி வைக்கப்பட்டு இருந்த ஷங்கரின் 'இந்தியன் 2' படத்தில் பிஸியாக நடித்து வந்தார். மிகுந்த எதிர்பார்ப்புக்கு மத்தியில் உருவாகும் இப்படம் இந்த ஆண்டு மத்தியில் வெளியாகும் என கூறப்படுகிறது.

தற்போது மணிரத்னம் இயக்கத்தில் 'தக் லைஃப்' படத்தில் ஒப்பந்தமாகியுள்ளார் கமல்ஹாசன். 'நாயகன்' திரைப்படத்துக்கு பிறகு 36 ஆண்டுகள் இடைவேளைக்கு பின் மீண்டும் இந்த இரு ஜாம்பவான்களும் கூட்டணி சேர்வது ரசிகர்களின் ஆர்வத்தை அதிகரித்துள்ளது.  

தூங்காவனம், மன்மதன் அம்பு படங்களுக்கு பிறகு 'தக் லைஃப்' திரைப்படத்தின் மூலம் மூன்றாவது முறையாக நடிகர் கமல்ஹாசனுடன் ஜோடி சேர்கிறார் நடிகை த்ரிஷா.

'இந்தியன் 2' படத்தின் படப்பிடிப்பு முழுமையாக முடிவடைந்த பிறகு ஹெச். வினோத் இயக்கும் படத்தில் நடிகர் கமல்ஹாசன் இணைவார் என கூறப்பட்டது. ஆனால் தற்போது ரசிகர்களுக்கு இன்ப அதிர்ச்சி கொடுக்கும் வகையில் புதிய அப்டேட் ஒன்று வெளியாகியுள்ளது.

மணிரத்னம் இயக்கத்தில் கமல் நடிக்கும் 'தக் லைஃப்' படத்தின் படப்பிடிப்பு வரும் ஜனவரி 18ம் தேதி துவங்க உள்ளது என்ற அறிவிப்பை வெளியிட்டுள்ளது படக்குழு. இது திரை ரசிகர்கள் மத்தியில் மிகுந்த உற்சாகத்தை ஏற்படுத்தியுள்ளது.