Rohit Sharma : மைல்கற்களை தகர்த்தெறியும் இந்திய வீரர்கள்..புதிய சாதனையை படைத்தார் ஹிட்மேன் ரோஹித்..!

ஐ.சி.சி ஒருநாள் உலகக் கோப்பை போட்டிகள் இந்தியாவில் நடைபெற்று வருகிறது.

இந்நிலையில் இன்று இந்தியா - இங்கிலாந்து அணிகளுக்கு இடையிலான லீக் போட்டி லக்னோவில் உள்ள ஏகனா மைதானத்தில் நடைபெற்று வருகிறது.

டாஸை வென்ற இங்கிலாந்து அணி முதலில் பந்து வீச்சை தேர்வு செய்தது. அதன்படி, இந்திய அணியின் தொடக்க ஆட்டக்காரர்களாக கேப்டன் ரோகித் சர்மாவும் சுப்மன் கில்லும் களம் இறங்கினார்கள்.

27 ரன்களுக்குள் 2 விக்கெட்டை இழந்து இந்திய அணி தத்தளித்த நிலையில் பொறுப்புடன் விளையாடினார் கேப்டன் ரோஹித் சர்மா.

அந்த வகையில் அதிரடியாக ஆடிய அவர் இன்றைய போட்டியின் 21வது ஓவரில் அடில் ரஷித் வீசிய பந்தில் பவுண்டரி அடித்ததன் மூலம் 18,000 ரன்களை கடந்த 5 வது இந்திய வீரர் என்ற பெருமையை பெற்றார்.

அதேபோல், 2023ல் நடைபெற்ற ஒருநாள் போட்டிகளில் 1000 ரன்களை கடந்த முதல் கேப்டன் என்ற பெருமையையும் பெற்றுள்ளார். மேலும் இந்த உலகக் கோப்பை தொடரில் அதிக சிக்ஸர் அடித்த வீரர் என்ற பெருமையையும் கை வசம் வைத்துள்ளார் ஹிட்மேன் சர்மா.