Just In
புதுச்சேரியில் 6 புதிய மதுபான தொழிற்சாலை - முதல்வர் ரங்கசாமி அறிவிப்பு
புதுச்சேரியில் 6 புதிய மதுபான தொழிற்சாலைகளை கொண்டு வர அரசு முடிவு செய்துள்ளது - முதல்வர் ரங்கசாமி
புதுச்சேரி: புதுச்சேரியில் 6 புதிய மதுபான தொழிற்சாலைகளை கொண்டு வர அரசு முடிவு செய்துள்ளதாக முதல்வர் ரங்கசாமி தெரிவித்துள்ளார். புதுச்சேரி சட்டப்பேரவையில் ஆளுநர் உரைக்கு நன்றி தெரிவிக்கும் தீர்மானத்தின் மீது முதல்வர் ரங்கசாமி பதிலளித்தார். அதில் புதிய மதுபான ஆலைகள் மூலம் ரூ.500 கோடி வருவாய், 5,000 பெண்களுக்கு வேலை வாய்ப்பு கிடைக்கும் என அவர் தெரிவித்துள்ளார்.
புதுச்சேரி சட்டப்பேரவையில் பட்ஜெட் கூட்டத் தொடர் நடைபெற்று வருகிறது. முதலமைச்சர் ரங்கசாமி நேற்று ரூ.13,600 கோடிக்கு பட்ஜெட் தாக்கல் செய்தார். இதில் பல்வேறு திட்ட அறிவிப்புகள் இடம் பெற்றன.
இந்த நிலையில் புதுச்சேரி சட்டப்பேரவையில் துணைநிலை ஆளுநர் கைலாசநாதன் உரைக்கு நன்றி தெரிவிக்கும் தீர்மானத்தின் மீது உறுப்பினர்கள் இன்று பேசினர். காங்கிரஸ் சட்டமன்ற உறுப்பினர் வைத்தியநாதன் முதலில் பேசத் தொடங்கினார். அப்போது மும்மொழிக் கொள்கையில் புதுச்சேரி அரசின் நிலைப்பாடு என்ன என அவர் கேள்வி எழுப்பினார்.
அப்போது அமைச்சர்கள் தேனீ ஜெயக்குமார், நமச்சிவாயம் ஆகியோர் 969ல் இந்தியை கொண்டு வந்தது காங்கிரஸ் தான் என பேசினர். இதற்கு காங்கிரஸ், திமுக சட்டமன்ற உறுப்பினர்கள் எதிர்ப்பு தெரிவித்ததால், ஆளுங்கட்சி மற்றும் எதிர்கட்சி உறுப்பினர்கள் இடையே கடும் வாக்குவாதம் ஏற்பட்டது. இந்த வாக்குவாதம் அரைமணி நேரம் தொடர்ந்த நிலையில், சபாநாயகர் செல்வம் உறுப்பினர்கள் பேசியதை அவைக் குறிப்பில் இருந்து நீக்கினார்.
கல்வித்துறை அமைச்சர் நமச்சிவாயம் பேசுகையில்: ஹிந்தி திணிப்பை கொண்டு வந்தது காங்கிரஸ் கட்சி தான் என்றும், இந்தி எதிர்ப்பு போராட்டம் மத்தியில் காங்கிரஸ் அரசு இருந்தபோது தான் நடந்தது என்றும் குறிப்பிட்டு பேசினார்.
மேலும் அவர் பேசுகையில், மும்மொழி கொள்கை தான் மத்திய அரசின் கொள்கை, பாஜகவின் கொள்கை என்றும், விரும்பினாலும் விரும்பாவிட்டாலும் புதுச்சேரியில் மும்மொழிக் கொள்கை வந்து விட்டது என்றும் கூறிய அவர், ஆளுநர் உரையிலேயே இதைக் குறிப்பிட்டதாக கூறினார். இதனை தொடர்ந்து அமைச்சர் நமச்சிவாயம் பேச்சுக்கு கண்டனம் தெரிவித்து காங்கிரஸ், திமுக சட்ட உறுப்பினர்கள் பேரவையில் இருந்து வெளிநடப்பு செய்தனர்.