திருச்சியை அடுத்த கம்பரசம்பேட்டை விக்னேஷ் நகர் பகுதியைச் சேர்ந்தவர் ஞானமூர்த்தி. இவரது மனைவி வளர்மதி (வயது 60). ஓய்வு பெற்ற பி.எஸ்.என்.எல். அலுவலர் ஆவார். இவர் பணியில் இருந்த போது, இவருடன் திருச்சி சோமரசம்பேட்டை நாடார் தெரு பகுதியைச் சேர்ந்த வேலுச்சாமி (61) என்பவரும் அதே அலுவலகத்தில் பணியாற்றி வந்தார். அப்போது தனக்குத் தெரிந்த ஒரு நிதி நிறுவனத்தில் பணம் முதலீடு செய்தால் இரண்டே ஆண்டுகளில் பணம் இரட்டிப்பு ஆகிவிடும் என்று அவர் கூறியுள்ளார். ஆனால் இதை அவர் முதலில் நம்ப மறுத்தார். இந்தநிலையில் வேலுச்சாமி தனது மனைவி கலாதேவி மற்றும் கிருஷ்ணமூர்த்தி ஆகியோரை அழைத்துக் கொண்டு வளர்மதி வீட்டுக்கு சென்றார். பின்னர் அவரிடம் நம்பிக்கையை ஏற்படுத்தும் வகையில் ஆசை வார்த்தை கூறி கடந்த 2018 ஏப்ரல் 11-ந்தேதி ரூ.7 லட்சத்து 35 ஆயிரம் பணத்தை பெற்றுக் கொண்டு சென்றனர். வளர்மதியும் இரண்டு ஆண்டுகளில் பணம் இரட்டிப்பு ஆகிவிடும் என்ற மகிழ்ச்சியில் இருந்தார். ஆனால் குறிப்பிட்ட நாட்களை கடந்தும் பணம் இரட்டிப்பு ஆகவில்லை. அதைத்தொடர்ந்து வளர்மதி வேலுச்சாமி தொடர்பு கொண்டு பணம் குறித்து கேட்டபோது, கம்பெனி நஷ்டத்தில் சென்று விட்டது. அதனால் தாமதம் ஆகிறது. விரைவில் பணம் இரட்டிப்பு ஆகிவிடும் என கூறினார்.
பின்னரும் மாதக்கணக்கில் காத்திருந்தும் பணம் இரட்டிப்பு ஆகவில்லை. கொடுத்த பணமும் திருப்பி வரவில்லை. இதனால் தான் ஏமாற்றப்பட்டதை அறிந்து கொண்ட வளர்மதி இது தொடர்பாக ஜீயபுரம் போலீசில் புகார் செய்தார். அதன்பேரில் போலீசார் ஓய்வு பெற்ற பி.எஸ்.என்.எல். அலுவலர் வேலுச்சாமி அவரது மனைவி கலாதேவி மற்றும் கிருஷ்ணமூர்த்தி ஆகிய மூன்று பேர் மீதும் மோசடி வழக்கு பதிவு செய்து விசாரணை நடத்தி வருகின்றனர்.
இந்நிலையில் காவல்துறை தரப்பில் கூறியது.. எவ்வளவு கட்டுப்பாடுகள் விதித்தாலும், மோசடி குறித்து விழிப்புணர்வு ஏற்படுத்தினாலும் வங்கி மோசடிகள் குறையவில்லை. ஒவ்வொரு நாளும் புதுப்புது வகையான மோசடிகள் தொடர்ந்து கொண்டே இருக்கின்றன. இந்த நிலையில் தற்போது லிங்க் மூலமாக மோசடி நடைபெறுவதாக தருவதாகவும், குறுஞ்செய்தியில் வரும் லிங்கை யாரும் பயன்படுத்த வேண்டாம். மேலும் பணம் இரட்டிப்பாகும் என ஆசை வார்த்தை கூறி மோசடியும் நடைபெற்று வருகிறது ஆகையால் பொதுமக்கள் எச்சரிக்கையாக இருக்க வேண்டும் என தெரிவித்துள்ளனர்.
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைத்தள பக்கங்களிலும் பின் தொடரலாம்