அ.தி.மு.க. பொதுச்செயலாளர் பதவியில் இருந்து நீக்கியதை எதிர்த்து வி.கே. சசிகலா உயர்நீதிமன்றத்தில் தொடரப்பட்ட மேல்முறையீட்டு வழக்கு இம்மாதம் 30-ம் தேதி விசாரிக்கப்படும் என்று தெரிவிக்கப்பட்டுள்ளது.
அதிமுகவில் இருந்து நீக்கிய தீர்மானத்தை நீக்க கோரி சென்னை பெருநகர உரிமையியல் நீதிமன்றத்தில் சசிகலா சார்பில் மனு அளிக்கப்பட்டது. இந்த மனுவை உரிமையியல் நீதிமன்றம் நிராகரித்த நிலையில், சென்னை உயர்நீதிமன்றத்தில் மேல்முறையீடு மனு அளிக்கப்பட்டது. இந்நிலையில், இந்த மேல்முறையீடு மனுவை ஆகஸ்ட்30-ம் தேதி விசாரணைக்கு எடுத்துகொள்வதாக தெரிவித்துள்ளது.
இது தொடர்பாக ஏற்கனவே சசிகலா சென்னை பெருநகர உரிமையியல் நீதிமன்றத்தில் தொடர்ந்த வழக்கை கீழமை நீதிமன்றம் தள்ளுபடி செய்திருந்தது குறிப்பிடத்தக்கது.
பின்னணி என்ன?
அ.தி.மு.க. பொது செயலாளராக இருந்த முன்னாள் முதலமைச்சர் ஜெ. ஜெயலலிதா மறைவுக்குப் பிறகு, கட்சியின் பொது செயலாளராக வி.கே. சசிகலா தேர்வு செய்யப்பட்டார். துணை பொதுச் செயலாளராக டி.டி.வி. தினகரனும் அக்கட்சியின் பொதுக்குழுவில் தேர்ந்தெடுக்கப்பட்டார். அதன் பின்னர், சொத்து குவிப்பு வழக்கில் சசிகலா சிறை சென்ற பிறகு, 2017-ம் ஆண்டு செப்டம்பர் மாதம் நடைபெற்ற அதிமுக பொதுக்குழுக் கூட்டத்தில், சசிகலா மற்றும் தினகரனை பதவிகளில் இருந்து நீக்கி தீர்மானம் நிறைவேற்றப்பட்டது. அதோடு, கட்சியில் ஒருங்கிணைப்பாளர், இணை ஒருங்கிணைப்பாளர் பதவிகள் உருவாக்கப்பட்டது.
இந்த தீர்மானத்தை ரத்து செய்யக் கோரி சசிகலா சென்னை பெருநகர உரிமையியல் நீதிமன்றத்தில் வழக்கு தொடர்ந்தார். இந்த வழக்கில் ஒருங்கிணைப்பாளர் ஓ.பன்னீர்செல்வம் மற்றும் இணை ஒருங்கிணைப்பாளர் எடப்பாடி பழனிச்சாமி ஆகியோர் தாக்கல் செய்த நிராகரிப்பு மனுக்களை உரிமையியல் நீதிமன்றம் ஏற்றுகொண்டது. இந்த வழக்கை தாக்கல் செய்ய சசிகலாவுக்கு அடிப்படை முகாந்திரம் இல்லை என தெரிவிக்கப்பட்டது. இதனால் அவரது மனு நிராகரிக்கப்பட்டு உத்தரவிடப்பட்டது. இந்த உத்தரவை எதிர்த்து சென்னை உயர் நீதிமன்றத்தில் சசிகலா மேல்முறையீட்டு மனு தாக்கல் செய்தார். இந்த வழக்கை விசாரணைக்கு எடுக்கக் கோரி நீதிபதிகள் ஆர்.சுப்ரமணியம், ஆர்.கலைமதி ஆகியோர் அடங்கிய அமர்வில் சசிகலா தரப்பில் முறையிடப்பட்டது. இதனை ஏற்றுக்கொண்ட நீதிபதிகள், இந்த வழக்கை வரும் 30-ம் தேதி விசாரணைக்கு எடுத்துகொள்வதாக தெரிவித்துள்ளது.