மக்களவைத் தேர்தல் அடுத்தாண்டு நடைபெற உள்ள நிலையில், எதிர்க்கட்சிகள் இந்தியா என்ற பெயரில் கூட்டணி அமைத்துள்ளன. இந்த கூட்டணியில் தி.மு.க. முக்கிய அங்கம் வகிக்கிறது.
சனாதன சர்ச்சை:
இந்த நிலையில், தமிழ்நாடு விளையாட்டு துறை அமைச்சர் உதயநிதி ஸ்டாலின் நிகழ்ச்சி ஒன்றில் டெங்கு, மலேரியாபோல சனாதனத்தையும் ஒழிக்க வேண்டும் என்று கூறினார். அவரது பேச்சுக்கு தமிழக பா.ஜ.க. தலைவர்களும், இந்து அமைப்பினரும் கடும் கண்டனத்தையும் பதிவு செய்த நிலையில் வட இந்தியாவிலும் உதயநிதியின் பேச்சுக்கு கடும் கண்டனங்களும், எதிர்ப்பும் பதிவாகியுள்ளது.
பிரதமர் மோடி முதல் வட இந்தியாவில் உள்ள சாமியார்கள் வரை பலரும் உதயநிதியின் பேச்சுக்கு கடும் கண்டனங்களை தெரிவித்து வருகின்றனர். அதேசமயம் தமிழ்நாட்டில் உதயநிதிக்கு பெருத்த ஆதரவு குவிந்து வருகிறது. திரைத்துறையில் இருக்கும் பலரும் உதயநிதி ஸ்டாலினுக்கு ஆதரவாக கருத்துக்களை தெரிவித்து வருகின்றனர்.
அமைச்சர் உதயநிதிக்கு மாரி செல்வராஜ் ஆதரவு:
திரைப்பட இயக்குனர் மாரி செல்வராஜ் தன்னுடைய மாமன்னன் படத்தில் வரும் ஒரு காட்சியை பதிவிட்டு, உதயநிதி ஸ்டாலினை குறிப்பிட்டு வாழ்த்துகள் அதிவீரன் என்று தன்னுடைய ஆதரவை தெரிவித்துள்ளார். அந்த படத்தில் வரும் காட்சியில் படத்தில் ஆதிக்க மனப்பான்மை நிறைந்த ரத்னவேலு கதாபாத்திரம் துப்பாக்கியை காட்டி நிற்க, அதை கண்டுகொள்ளாமல் நாய்கள் எதிர்த்து ஓடும். பின்னர், காரில் அமர்ந்திருக்கும் ரத்னவேலுவை பார்த்து அதிவீரன் இனிமேல் உன் உருட்டல் மிரட்டலுக்கு யாரும் பயப்பட போறதில்ல. அவன் அவன் அவன் திசையை நோக்கி ஓடிட்டேதான் இருப்பான் என்று வசனம் அமைந்திருக்கும்.
பின்னர், படத்தின் இறுதிக்காட்சியில் வரும் பிறப்பொக்கும் எல்லா உயிர்க்கும் சிறப்பொவ்வா செய்தொழில் வேற்றுமை யான் என்ற குறளையும் மாரி செல்வராஜ் பதிவிட்டுள்ளார். அமைச்சராக பொறுப்பேற்ற பிறகு உதயநிதி ஸ்டாலின் நடிப்பில் வெளியான மாமன்னன் திரைப்படம் சாதிய பாகுபாட்டை நன்றாக தோலுரித்துக் காட்டும் விதத்தில் அமைந்திருந்தது. உதயநிதி ஸ்டாலினின் இந்த படம் அவருக்கு மிகப்பெரிய அளவில் நற்பெயரை பெற்றுத் தந்ததுடன், தமிழ்நாடு முழுவதும் மிகப்பெரிய வெற்றியை பெற்றது.
சனாதன சர்ச்சை விவகாரத்தில் நேற்று பிரபல இயக்குனர் வெற்றிமாறன் உதயநிதி ஸ்டாலினுக்கு ஆதரவு தெரிவித்த நிலையில், தற்போது மாரிசெல்வராஜ் ஆதரவு தெரிவித்துள்ளார். உதயநிதி ஸ்டாலினுக்கு எதிராக வட இந்தியாவின் பல்வேறு மாநிலங்களின் காவல் நிலையங்களிலும் இந்து அமைப்பினரும் பா.ஜ.க.வினரும் புகார் அளித்துள்ளனர் என்பதும் குறிப்பிடத்தக்கது.
மேலும் படிக்க: Sanjay Raut On Udhayanidhi: ”மு.க.ஸ்டாலினை நாடே உற்று பார்க்கிறது, உதயநிதி?” - சனாதன விவகாரத்தில் சிவசேனா எம்.பி. கருத்து..!
மேலும் படிக்க: Sanatana Dharma Row: சனாதனத்தை டெங்கு, மலேரியாவுடன் ஒப்பிடக்கூடாதாம்; இன்னும் கடுமையாக சாடிய ஆ.ராசா!