பொங்கல் பண்டிகையை முன்னிட்டு, புதுக்கோட்டை மாவட்டம், கந்தர்வக்கோட்டை அருகே தச்சங்குறிச்சியில் நடைபெற்ற ஜல்லிக்கட்டு போட்டி நிறைவு பெற்றது.
நிறைவடைந்த தச்சங்குறிச்சி ஜல்லிக்கட்டு
புதுக்கோட்டை மாவட்டம், கந்தர்வக்கோட்டை அருகே உள்ள தச்சங்குறிச்சியில் உள்ள, புனித அடைக்கல மாதா அன்னை தேவாலயம் சார்பில் கிறிஸ்துமஸ், புத்தாண்டு, பொங்கல் பண்டிகை கொண்டாட்டமாக ஜல்லிக்கட்டு போட்டி இன்று நடைபெற்றது. தமிழக அரசும் இதற்கு ஒப்புதல் அளித்து, கடந்த 6ம் தேதி ஜல்லிக்கட்டு போட்டியை நடத்தலாம் என அரசு அரசாணை வெளியிட்டிருந்தது. ஆனால், பாதுகாப்பு குறைபாடுகள் காரணமாக இந்த ஆண்டின் முதல் ஜல்லிக்கட்டு போட்டி மாவட்ட நிர்வாகத்தால் ஒத்திவைக்கப்பட்டது. இதையடுத்து, பொதுமக்கள் போராட்டங்களை முன்னெடுக்க, பாதுகாப்பு ஏற்பாடுகள் அனைத்தும் முறையாக நிறைவடைந்த நிலையில், ஆண்டின் முதல் ஜல்லிக்கட்டு தச்சங்குறிச்சியில் இன்று நடைபெற்று முடிவடைந்துள்ளது.
இதனிடையே, மாடுபிடி வீரர்களும், உரிமையாளர்களுடன் மாடுகளும் அங்கு குவிய தச்சங்குறிச்சி கிராமமே களைக்கட்டியது. இதையொட்டி பலத்த போலீஸ் பாதுகாப்பும் போடப்பட்டது. மருத்துவ குழுவினர் தச்சங்குறிச்சி பகுதிக்கு வந்து ஜல்லிக்கட்டில் பங்கேற்க முன்பதிவு செய்து இருந்த மாடுபிடி வீரர்களுக்கு பரிசோதனை மேற்கொண்டனர். இதேபோல் காளைகளை அழைத்து வரக்கூடிய உரிமையாளர்கள் தரப்பில் 2 பேருக்கு கொரோனா பரிசோதனை செய்யப்பட்டது.
சீறிப்பாய்ந்த காளைகள்:
பாரம்பரிய முறைப்படி முதலில் வாடி வாசல் வழியாக கோயில் காளைகள் அவிழ்த்து விடப்பட்டு முதல் மரியாதை செய்யப்பட்டது. பின்பு வீரர்கள் அனைவரும் ஜல்லிகட்டு விதிமுறைகளை பின்பற்றுவதாக உறுதிமொழி ஏற்றனர். அதைதொடர்ந்து, அமைச்சர்கள் ரகுபதி மற்றும் மெய்யநாதன் ஆகியோர் கொடியசைத்து, நடப்பாண்டின் முதல் ஜல்லிக்கட்டு போட்டியை தொடங்கி வைத்தனர். இதையடுத்து, வாடிவாசல் வழியே சீறிப்பாய்ந்த காளைகளை, மாடுபிடி வீரர்கள் வீரத்துடன் மடக்கி பிடித்து திறமையை வெளிப்படுத்தினர். வெற்றி பெற்ற காளைகளுக்கும், மாடுபிடி வீரர்களுக்கும் உடனடியாக பரிசுகளும் வழங்கப்பட்டன.
வெற்றி பெற்ற வீரர்கள்
இப்போட்டியில் 500 காளைகள் பதிவு செய்த நிலையில் வாடிவாசலில் இருந்து 485 காளைகள் அவிழ்த்து விடப்பட்டன. இந்த போட்டியில் 17 காளைகளை பிடித்து முதலிடம் பிடித்த தென்னலூர் பகுதியைச் சேர்ந்த யோகேஸ்வரனுக்கு இருச்சக்கர வாகனம் பரிசாக வழங்கப்பட்டது. மேலும், தஞ்சை மாவட்டம் மருதகுடியைச் சேர்ந்த ராஜ்குமாரின் மதர் என்ற காளை சிறந்த காளையாக தேர்வு செய்யப்பட்டது. இன்று காலை முதல் தொடங்கிய இப்போட்டியில் மூன்று காவலர்கள் உட்பட 70 பேர் காயமடைந்துள்ளனர். இவர்களில் பலத்த காயமடைந்த 12 பேர் புதுக்கோட்டை அரசு மருத்துவமனையில் சிகிச்சை பெற்று வருகின்றனர்.
மேலும் படிக்க
Chennai : சென்னையில் 7 முக்கிய சாலைகள் விரிவாக்கம்... போக்குவரத்து நெரிசலை குறைக்க நடவடிக்கை...