போடியில் இருந்து சென்னை வரை ரயில் சேவை...தொடங்கி வைத்த மத்திய இணை அமைச்சர் எல். முருகன்..!

சென்னை சென்ட்ரல் எக்ஸ்பிரஸ் ரயில் சேவையை இன்று இரவு 8:30 மணிக்கும், போடி - மதுரை எக்ஸ்பிரஸ் ரயில் சேவையை இரவு 8:45 மணிக்கும் மத்திய இணை அமைச்சர் எல். முருகன் தொடங்கி வைத்தார்.

தேனி போடி, சென்னை சென்ட்ரல் ரயில் நிலையம் வரையிலான புதிய ரயில் சேவையை மத்திய இணை அமைச்சர் எல். முருகன் இன்று தொடங்கி வைத்தார். இதற்கான அதிவேக சோதனை ஓட்டம் முன்னதாக மதுரை - போடி இடையே நடந்தது.

எந்த வழியில் செல்கிறது?

20602 என்ற வண்டி எண் கொண்ட இந்த ரயிலானது, செவ்வாய், வியாழன், ஞாயிற்று கிழமைகளில் இயக்கப்பட உள்ளது. இரவு 8:30 மணிக்கு போடியில் இருந்து கிளம்பும் இந்த ரயில் மறுநாள் காலை 7:55 மணிக்கு சென்னை சென்ட்ரல் நிலையம் சென்றடைகிறது. தேனி, ஆண்டிப்பட்டி, உசிலம்பட்டி, மதுரை, திண்டுக்கல், கரூர், சேலம், காட்பாடி வழியாக சென்னை செல்கிறது இந்த ரயில்.

சென்னையில் இருந்து போடி வரையில் மறு மார்க்கத்தில் (வண்டி எண் 20601) செல்லும் ரயில், திங்கள், புதன், வெள்ளி ஆகிய நாட்களில் இயக்கப்பட உள்ளது. எம்.ஜி.ஆர் சென்னை சென்ட்ரல் ரயில் நிலையத்தில் இருந்து இரவு 10:30 மணிக்கு புறபட்டு மறுநாள் காலை 9:35 மணிக்கு போடி செல்கிறது இந்த ரயில்.

எத்தனை பெட்டிகள் உள்ளன?

இந்த ரயிலில் இரண்டு முன்பதிவில்லா பெட்டிகள், படுக்கை வசதி முன்பதிவு பெட்டிகள் 4, மூன்றடுக்கு குளிர்சாதன பெட்டிகள் 7, இரண்டடுக்கு குளிர்சாதன பெட்டிகள் 2, முதல் வகுப்பு குளிர்சாதன பெட்டி 1 என 18 பெட்டிகள் இணைக்கப்பட்டுள்ளது. இந்த ரயில் இயக்கத்திற்கான ரயில் இன்ஜின் சோதனை ஓட்டம் நேற்று மதுரை- போடி இடையே 110 கி.மீ. வேகத்தில் நடந்தது.

மதுரை -- போடி 91 கி.மீ., அகல ரயில் பாதையில் தண்டவாள அதிர்வுதிறன், ட்ராக் பாராமீட்டர் சோதனை உள்ளிட்டவை குறித்துஆய்வு செய்தனர். சோதனை ரயில், நேற்று காலை 10:00 மணிக்கு மதுரையில் புறப்பட்டு போடிக்கு காலை 11:05க்கு வந்தது.

மீண்டும் போடியிலிருந்து காலை 11:58க்கு புறப்பட்டு மதுரை சென்றது. இந்த ஆய்வில் மதுரை ரயில்வே கோட்ட மூத்த பொறியாளர் நாராயணன், உதவி கோட்ட பொறியாளர் வெள்ளைத்துரை, முதுநிலை பொறியாளர் விவேக், சப் சென்டர் உதவி பொறியாளர் அஞ்சனா ஆகியோர் 2 கூடுதல் பெட்டிகளுடன் இறுதி கட்ட சோதனையாக தண்டவாளங்களின் அதிர்வுத் திறன், மனித இடையூறுகள் குறித்து ஆய்வு
மேற்கொண்டனர். 

இந்நிலையில், சென்னை சென்ட்ரல் எக்ஸ்பிரஸ் ரயில் சேவையை (ரயில் எண் : 20602) இன்று இரவு 8:30 மணிக்கும், போடி - மதுரை எக்ஸ்பிரஸ் ரயில் சேவையை (ரயில் எண்: 06702) இரவு 8:45 மணிக்கும் மத்திய இணை அமைச்சர் எல். முருகன் தொடங்கி வைத்தார். இந்த நிகழ்ச்சியில் தேனி எம்.பி.,ரவீந்திரநாத், முன்னாள் முதல்வர் பன்னீர் செல்வம் உள்பட பலர் பங்கேற்றனர்.