சென்னையில் உள்ள 16 சட்டமன்ற தொகுதிகளில் முக்கியமான தொகுதிகளில் ஒன்று மயிலாப்பூர். இந்த தொகுதியில் தற்போது அ.தி.மு.க. சார்பில் எம்.எல்.ஏ.வும். முன்னாள் டி.ஜி.பி.யுமான ஆர்.நட்ராஜ் அ.தி.மு.க. சார்பிலும், மயிலை வேலு தி.மு.க. சார்பிலும். நடிகை ஸ்ரீப்ரியா மக்கள்நீதிமய்யம் சார்பிலும் போட்டியிடுகின்றனர்.
வேறு எந்த தொகுதியிலும் இல்லாத அளவிற்கு மயிலாப்பூர் தொகுதியில் பல முக்கிய பிரமுகர்கள் வாக்காளர்களாக உள்ளனர். தி.மு.க. தலைவரும், தி.மு.க. கூட்டணி சார்பில் முதன்முறை முதல்வர் வேட்பாளராக களமிறங்கியுள்ள மு.க.ஸ்டாலின், மக்கள் நீதிமய்ய தலைவரும், அக்கூட்டணியின் முதல்வர் வேட்பாளருமான கமல்ஹாசன் மயிலாப்பூர் தொகுதியின் வாக்காளர்களாக உள்ளனர். இவர்கள் தவிர, ஆயிரம் விளக்கு தொகுதி பா.ஜ.க. வேட்பாளர் நடிகை குஷ்பு, சேப்பாக்கம் தொகுதி தி.மு.க. வேட்பாளர் உதயநிதி ஸ்டாலின் ஆகியோரும் மயிலாப்பூர் தொகுதியின் வாக்காளர்கள்.
வேறு எந்த தொகுதியிலும் இல்லாத அளவில் இரு முதல்வர் வேட்பாளர்கள், தி.மு.க. மற்றும் பா.ஜ.க. வேட்பாளர்களை வாக்காளர்களாக கொண்ட தொகுதி என்ற பெருமையை மயிலாப்பூர் தொகுதி பெற்றுள்ளது. 4 வேட்பாளர்களை கொண்டிருந்தாலும், நான்கு பேரும் இந்த தொகுதியில் போட்டியிடவில்லை என்பது கூடுதல் சுவாரஸ்யம்.
இவர்கள் தவிர பல்வேறு முக்கிய பிரமுகர்களும், திரைப்பிரபலங்களும், அரசியல்வாதிகளும் மயிலாப்பூர் வாக்காளர்களாக உள்ளனர் என்பது குறிப்பிடத்தக்கது.