தமிழ்நாடு அமைச்சர் செந்தில் பாலாஜியும் பாஜக தலைவர் அண்ணாமலையும் வார்த்தைப் போரில் தொடர்ந்து ஈடுபட்டு வருவதால், கொங்கு மண்டலம் கொழுந்துவிட்டு எரிகிறது. இதற்கு என்ன காரணம் என்று விசாரித்தோம்.
அமைச்சர் செந்தில் பாலாஜி மின்சாரத் துறையில் ஊழலை மேற்கொண்டதாக அண்ணாமலை கடந்த சில மாதங்களுக்கு முன்னால் குற்றம் சாட்டியிருந்தார். அதற்கு செந்தில் பாலாஜியும் கடுமையான வார்த்தைகளால் பதில் கூறியிருந்தார். இதனால் அப்போதே ட்விட்டரில் வார்த்தைப் போர் வெடித்தது.
இந்த சூழலில், மதுரையில் அண்மையில் செய்தியாளர்களைச் சந்தித்த பாஜக தலைவர் அண்ணாமலை, ”தமிழக மின்சார வாரியத்தின் ரூ.4,442 கோடி மதிப்பிலான மின் திட்ட ஒப்பந்தம், அனைத்து விதிகளையும் மீறி பி.ஜி.ஆர். என்னும் நிறுவனத்திற்கு வழங்கப்பட்டுள்ளது. அமைச்சர் செந்தில்பாலாஜி பிஜிஆர் நிறுவனத்தின் ஊழியர் போல் பேசுகிறார். பிஜிஆர் நிறுவனத்துக்கு டெண்டர் வழங்கியது தொடர்பாக ஓய்வு பெற்ற உயர் நீதிமன்ற நீதிபதி தலைமையில் ஒருநபர் விசாரணை ஆணையம் அமைக்க வேண்டும்.
ஊழல் செய்ய ஆரம்பிக்கும் போது அதை தட்டிக்கேட்டால் சிறைக்கு அனுப்புவோம் என்றால் தயவு செய்து அனுப்புங்கள். சந்தோஷமாக சிறைக்கு சென்று, திரும்பி வந்ததும் திமுக அரசின் ஒவ்வொரு ஊழல்களையும் வெளிப்படுத்துவேன். திமுக மட்டும் ஆட்சியில் இல்லை. பாஜகவும் ஆட்சியில் உள்ளது என்பதையும் திமுகவுக்குத் தெரிவித்துக் கொள்கிறேன்” என்று காட்டமாக விமர்சித்தார்.
இதற்கு டிவிட்டரில் பதிலளித்த அமைச்சர் செந்தில் பாலாஜி, ”பி.ஜி.ஆர். நிறுவனம் டெண்டர் எடுத்த ஆண்டு 2019. டெண்டர் கொடுத்த ஆட்சி அதிமுக.
வாழ்ந்த 13700+ சொச்ச நாட்களில் 20000 புத்தகம் வாசித்திருக்கும் அதிமேதாவி ஆர்வக்கோளாறுகளுக்கு புரிதல் வேண்டும் அல்லது புரிந்துகொள்ளப் பக்குவம் வேண்டும். அரைவேக்காடுகளுக்கு இரண்டும் இல்லை” என்று பதிலடி கொடுத்திருந்தார்.
இந்த சூழலில், ஒரே ஊரைச் சேர்ந்த (கரூர்), ஒரே சமூகத்தைச் சேர்ந்த (கவுண்டர்) இரண்டு பெரும் கட்சிகளைச் சேர்ந்த செந்தில் பாலாஜியும் அண்ணாமலையும் எலியும் பூனையுமாக இருப்பது ஏன் என்பது குறித்து கேள்வி எழுந்தது.
இதுகுறித்து பாஜக தரப்பில் விசாரித்தபோது, ''திமுக தலைவரும் முதலமைச்சருமான மு.க.ஸ்டாலினுக்கு நெருக்கமானவராக மின்சாரத் துறை அமைச்சர் செந்தில் பாலாஜி வலம் வருகிறார். செந்தில் பாலாஜி அதிமுக ஆட்சியில் அமைச்சராக இருந்தபோது வேலை வாங்கித் தருவதாக மோசடி செய்ததாக வழக்குப் பதிவு செய்து விசாரணை நடைபெற்று வருகிறது. அதேபோல தற்போது மின்சார வாரியத்தில் ஊழல் நடைபெறுவதாகக் குற்றச்சாட்டுகள் எழுந்துள்ளன.
இதை சரியாகப் பயன்படுத்திக்கொள்ள பாஜக தலைமை திட்டமிட்டுள்ளது. அமைச்சர் செந்தில் பாலாஜிக்கு எதிராகக் காய் நகர்த்தி, அவர் மூலம் திமுக ஆட்சிக்கு அவப்பெயரை ஏற்படுத்தத் திட்டமிடப்பட்டு வருகிறது. இதற்காக ஒரே ஊர்க்காரரான அண்ணாமலை மற்ற அமைச்சர்களை எல்லாம் விட்டுவிட்டு செந்தில் பாலாஜியைக் குறிவைத்துள்ளார்'' என்று கூறினர்.
எது எப்படியோ, இரு கட்சிகளுக்கு இடையேயான போக்கால் கொங்கு மண்டலம் கொழுந்து விட்டு எரிகிறது.