சட்டமன்ற தேர்தல் தமிழகத்தில் வரும் ஏப்ரல் 6-ந் தேதி நடைபெற உள்ளது. தேர்தல் தேதி அறிவிக்கப்பட்டது முதல் தமிழகம் முழுவதும் தேர்தல் நடத்தை விதிகள் அமலுக்கு வந்தது. இதையடுத்து, மாநிலம் முழுவதும் தேர்தல் பறக்கும் படையினர் தீவிரமாக கண்காணிப்பு பணிகளில் ஈடுபட்டு வருகின்றனர்.
இந்த நிலையில், திருப்பூர் மாவட்டம் தாராபுரத்தில் தி.மு.க. நகர செயலாளர் தனசேகருக்கு சொந்தமான வீடு மற்றும் அலுவலகங்களில் வருமான வரித்துறையினர் இன்று மாலை முதல் திடீரென சோதனையில் ஈடுபட்டு வருகின்றனர். மேலும், ம.தி.மு.க. மாவட்ட துணை செயலாளர் கவின் நாகராஜின் வீட்டிலும் வருமான வரித்துறையினர் சோதனை நடத்தி வருகின்றனர். இந்த சோதனையில் சில முக்கியமான ஆவணங்கள் கைப்பற்றப்பட்டுள்ளதாக தகவல்கள் வெளியாகியுள்ளது.
வாக்குப்பதிவிற்கு இன்னும் இரு வாரங்களே உள்ள நிலையில், திடீரென நடைபெறும் இந்த வருமானவரித்துறை சோதனை தி.மு.க., ம.தி.மு.க.வினர் இடையே பரபரப்பை ஏற்படுத்தியுள்ளது. தாராபுரம் தொகுதியில் தி.மு.க. சார்பில் கயல்விழி போட்டியிடுகிறார். இதோ தொகுதியில், தமிழக பா.ஜ.க. தலைவர் எல்.முருகனும் போட்டியிடுகிறார் என்பது குறிப்பிடத்தக்கது.