திண்டுக்கல் மாவட்டம் பழனியில் ஜூன் 12-ம் தேதி ஞாயிற்றுக்கிழமை வைகாசி விசாகம் திருவிழா நடைபெறவுள்ளது. எனவே பக்தர்கள் வசதிக்காக மதுரை - பழனி ரயில் நிலையங்களுக்கு இடையே சிறப்பு ரயில் ஒன்று இயக்க தெற்கு ரயில்வே ஏற்பாடு செய்துள்ளது.
அதன்படி மதுரை - பழனி முன்பதிவில்லாத விரைவு சிறப்பு ரயில் மதுரையிலிருந்து காலை 10:50 மணிக்கு புறப்பட்டு மதியம் 01.25 மணிக்கு பழனி சென்று சேரும் எனவும், மறுமார்க்கத்தில் பழனி - மதுரை முன்பதிவில்லாத விரைவு சிறப்பு ரயில் பழனியில் இருந்து மதியம் 02:45 மணிக்கு புறப்பட்டு மாலை 05:10 மணிக்கு மதுரை வந்து சேரும் என தெரிவிக்கப்பட்டுள்ளது.
இந்த சிறப்பு ரயில்கள் சோழவந்தான், கொடைக்கானல் ரோடு, அம்பாத்துரை, திண்டுக்கல், ஒட்டன்சத்திரம் ஆகிய ரயில் நிலையங்களில் நின்று செல்லும். இந்த ரயில்களில் 10 இரண்டாம் வகுப்பு பெட்டிகள் மற்றும் 2 இரண்டாம் வகுப்பு பொது மற்றும் சரக்கு பெட்டிகள் இணைக்கப்படும் எனவும், இந்த ரயில்கள் ஜூன் 12 அன்று ஒரு நாள் மட்டும் இயக்கப்படும் என தெற்கு ரயில்வே தகவல் தெரிவித்துள்ளது.
வைகாசி விசாக திருவிழாவையொட்டி மதுரையிலிருந்து திண்டுக்கல் வழியாக பழனிக்கு சிறப்பு ரயில் இயக்க வேண்டும் என மதுரை நாடாளுமன்ற உறுப்பினர்.சு.வெங்கடேசன் தெற்கு ரயில்வே நிர்வாகத்திற்கு கோரிக்கை விடுத்திருந்தது குறிப்பிடத்தக்கது.
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைத்தள பக்கங்களிலும் பின் தொடரலாம்