ஆடி முதல் வெள்ளியையொட்டி மதுரை, திண்டுகல் உள்ளிட்ட பூ மார்கெட்டில் ஒரு கிலோ மல்லிகை பூ ரூ.1200 வரை விற்பனையானதால் விவசாயிகள் மகிழ்ச்சி தெரிவித்துள்ளனர்.
தென்மாவட்டங்களில் மதுரை மாட்டுத்தாவணி பூ மார்க்கெட், திண்டுக்கல் மாவட்டம் நிலக்கோட்டை பூ மார்க்கெட் போன்றவை முக்கியமானவை. இந்த மார்க்கெட்களுக்கு மல்லிகைப் பூக்கள் வரத்துக் குறைந்ததால் அதன் விலை முகூர்த்தம் மற்றும் விழாக்கள் இல்லாத நாட்களில்கூட அதிகமாக இருந்தது. இந்நிலையில் ஆடி முதல் வெள்ளியையொட்டி மல்லிகைப்ப பூ விலை இன்னும் அதிகரித்துள்ளது. மாட்டுத்தாவணி பூ மார்க் கெட்டில் ஒரு கிலோ மல்லிகை பூ ரூ.1200 ஆக உள்ளது. அதே போல் சம்மங்கி பூ கிலோ ரூ.100, பட்டன் ரோஸ் கிலோ ரூ.150, பட்ரோஸ் கிலோ ரூ.100, செண்டு மல்லி கிலோ ரூ.50, முல்லைப் பூ கிலோ ரூ 500, பிச்சிப் பூ கிலோ ரூ500க்கும் விற்பனை செய்யப்படுகிறது.
அதே போல் திண்டுக்கல் மாவட்டத்தில் நிலக்கோட்டை, செம்பட்டி, சின்னாளபட்டி, கன்னிவாடி, ஆத்தூர், ஒட்டன்சத்திரம், பழனி, வேடசந்தூர், வடமதுரை, சாணார்பட்டி, நத்தம், தொப்பம்பட்டி உள்ளிட்ட இடங்களில் ஆண்டு முழுவதும் மலர் சாகுபடி நடைபெறுகிறது. இந்த பகுதிகளில் நடைபெறும் மலர்கள் அனைத்தும் திண்டுக்கல் அண்ணா வணிக வளாகத்தில் உள்ள மலர் சந்தைக்கு கொண்டு வரப்பட்டு விற்பனை செய்யப்படுவது வழக்கம்.
இச்சந்தையில் இருந்து ஒட்டன்சத்திரம் மார்க்கெட், சென்னை, மதுரை, திருச்சி, தஞ்சாவூர், கோவை திருப்பூர், நாமக்கல், திருவண்ணாமலை உட்பட பல மாவட்டங்களுக்கும் கேரளா, மகாராஷ்டிரா, ஆந்திரா, கர்நாடகா ஆகிய மாநிலங்களுக்கும் டன் கணக்கிலான மலர்கள் விற்பனைக்காக அனுப்பி வைக்கப்படுகிறது. மேலும் தமிழர்கள் அதிகம் வசிக்கும் மலேசியா, சிங்கப்பூர், இலங்கை உள்ளிட்ட நாடுகளுக்கு இந்த மலர் சந்தையில் இருந்து விமானம் மூலம் மலர்கள் ஏற்றுமதி செய்யப்படுகின்றன. இந்நிலையில் மதுரையைப் போல் திண்டுக்கல் மாவட்டத்திலும் ஆடி முதல் வெள்ளியையொட்டி மல்லிகைப் பூ கிலோ ரூ.1200 ரூபாய்க்கு விற்கப்படுகிறது.
ABP நாடு செய்திகளை சமூக வலைத்தள பக்கங்களிலும் பின் தொடரலாம்