”மீண்டும் சிக்கலில் ஓபிஎஸ்” தம்பி ஓ.ராஜா வழக்கில் நாளை தீர்ப்பளிக்கிறதா திண்டுக்கல் நீதிமன்றம்?

ஓபிஎஸ்சின் தம்பி ஓ ராஜா உட்பட 6 பேர் அரசு மற்றும் எதிர் தரப்பு வழக்கறிஞர்கள் நாளை நேரில் ஆஜராக நீதிமன்றம் உத்தரவிட்டுள்ளது.

தேனி மாவட்டம், பெரியகுளம் அருகே உள்ள டி.கள்ளிப்பட்டியைச் சேர்ந்தவர் நாகமுத்து (22) என்பவர். இவர் பெரியகுளம் அருகே உள்ள மலைக்கோவிலான கைலாசபட்டியில் உள்ள கைலாசநாதர் கோயிலில் பூசாரியாக வேலை செய்து வந்தார். கோயிலில் கடை ஒதுக்குவது தொடர்பான விவகாரத்தில் பட்டியலின சமூகத்தைச் சேர்ந்த நாகமுத்துவுக்கும் முன்னாள் முதலமைச்சர் ஓ.பன்னீர் செல்வத்தின் தம்பியும் அப்போதைய பெரியகுளம் நகர் மன்றத் தலைவருமான ஓ.ராஜாவுக்கும் கருத்து வேறுபாடு இருந்தது.

இதில் நாகமுத்து தாக்கப்பட்டதாக கூறப்படுகிறது. இந்த சூழ் நிலையில்  2012 டிசம்பர் 7-ம் தேதி நாகமுத்து தற்கொலை செய்து கொண்டார். இவரை தற்கொலைக்கு தூண்டியதாக கோயில் அறங்காவலராகவும், பெரியகுளம் முன்னாள் நகர சபை தலைவராகவும் இருந்த ஓ.ராஜா, தென்கரை பேரூராட்சி முன்னாள் தலைவர் பாண்டி உட்பட 7 பேர் மீது தென்கரை போலீஸார் கோவில் பூசாரியை தற்கொலை செய்ய தூண்டியதாக கூறி பல்வேறு பிரிவுகளில் வழக்குப்பதிவு செய்தனர்.

இந்த வழக்கானது சென்னை உயர் நீதிமன்ற மதுரைக் கிளையின் உத்தரவுப்படி 2015 டிசம்பர் மாதம்  முதல் இந்த வழக்கு திண்டுக்கல் மாவட்ட சிறப்பு நீதிமன்றத்தில் நடைபெற்று வருகிறது. இந்த வழக்கு விசாரணை நடைபெற்றுக் கொண்டிருந்த போதே தென்கரை பேரூராட்சி முன்னாள் தலைவர் பாண்டி உயிரிழந்துவிட்டார் என்பது குறிப்பிடத்தக்க நிலையில் . மீதமுள்ள 6 பேர் மீதான வழக்கு விசாரணை திண்டுக்கல் மாவட்ட பட்டியல் வகுப்பினர் மற்றும் பழங்குடியினர் சிறப்பு நீதிமன்றத்தில் நடைபெற்று வருகிறது. இந்த வழக்கில் குற்றம்சாட்டப்பட்டுள்ள ஓபிஎஸ்சின் சகோதரர் ஓ.ராஜா, மணிமாறன், சிவகுமார், ஞானம், லோகு, சரவணன் ஆகியோர் நிபந்தனையற்ற ஜாமீன் பெற்று இருப்பதால், வழக்கு விசாரணையின் போது திண்டுக்கல் பட்டியல் வகுப்பினர் மற்றும் பழங்குடியினர் சிறப்பு நீதிமன்றத்தில் ஆஜராகி வருகின்றனர்.

இந்த வழக்கில் 23 சாட்சியங்கள் விசாரணை செய்யப்பட்டுள்ளனர். மேலும், 4 சாட்சியங்கள் நீதிமன்றத்தில் சமர்ப்பிக்கப்பட்டுள்ளது. இந்த வழக்கு அரசு தரப்பின் இறுதி கட்ட வாதத்திற்காக ஒத்திவைக்கப்பட்டிருந்தது. இந்த நிலையில், இந்த வழக்கை கடந்த 5ம் தேதி விசாரணைக்கு வந்தது. விசாரணையின் போது இதில் ஓ.ராஜா  நீதிமன்றத்தில் ஆஜராகவில்லை. அரசு தரப்பில் இறுதிகட்ட விளக்க உரையானதும் நடைபெற்று முடிவடைந்துள்ள நிலையில் நீதிபதி, வழக்கின் தீர்ப்பை நவம்பர் 13-ம் அதாவது நாளைய தேதியில் ஒத்திவைத்து உத்தரவிட்டார்.

மேலும் அன்றைய தினம் குற்றம்சாட்டப்பட்டுள்ள ஓ.ராஜா உட்பட 6 நபர்களும், அரசு மற்றும் எதிர் தரப்பு வழக்கறிஞர்கள் நேரில் ஆஜராகவும் நீதிபதி உத்தரவிட்டுள்ளார். இந்தவழக்கு விசாரணையானது நாளை நடைபெறவுள்ள நிலையில் வழக்கு விசாரணை அனைவராலும் உற்று நோக்கப்பட்டுள்ளது. அதிமுக உட்கட்சி பிரச்னை, குடும்ப ரீதியான பிரச்னை என பல்வேறு சிக்கலில் உள்ள ஓபிஎஸ், அவரது சகோதரரான ஓ.ராஜா சம்பந்தப்பட்ட இந்த வழக்கு இறுதிக்கட்ட விசாரணைக்கு வருவது  ஓபிஎஸ்க்கு மேலும் கூடுதல் பிரச்னையாக மாறியுள்ளதாக அரசியல் வட்டாரங்களில் பேசப்படுகிறது.