வட மாநிலங்களை வாட்டும் குளிரில் அதிகம் பாதிக்கப்பட்ட இடங்களில் ஹரியானாவும் ஒன்று. இதனால் ஏற்கெனவே பள்ளிகளுக்கு 15 ஆம் தேதி வரை விடுமுறை அறிவிக்கப்பட்டிருந்த நிலையில் தற்போது இந்த விடுமுறை ஜனவரி 21 வரை நீட்டிக்கப்பட்டுள்ளது. இருப்பினும் 10 மற்றும் 12ஆம் வகுப்பு மாணவர்களுக்கு மட்டும் பொதுத் தேர்வை கருத்தில் கொண்டு காலை 10 மணி முதல் மதியம் 2 மணி வரை வகுப்புகள் நடத்தப்படும் என்று அறிவிக்கப்பட்டுள்ளது.
உறையும் டெல்லி:
குளிர் காலம் அதன் உச்சத்தை எட்டியுள்ள நிலையில் டெல்லியிலும் கடும் பனிப்பொழிவு நிலவி வருகிறது. அதிகாலைப்பொழுதில் சாலைகளை மறைக்கும் அளவுக்கு பனிப்பொழிவு அதிகரித்துள்ள நிலையில், டெல்லிவாசிகள் பெரும் சிரமத்துக்கு ஆளாகியுள்ளனர்.
சமீப நாட்களாக காலையில் 1 டிகிரி செல்சியஸ் அளவுக்கு வெப்பநிலை பதிவாகி குளிர் வாட்டி வதைத்து வருகிறது. அதிகாலை வேலைக்கு செல்வோருக்கு கடும் சிரமம் ஏற்பட்டுள்ளது.
வழக்கமாக ஆண்டுதோறும் இத்தகைய காலக்கட்டங்களில் பள்ளிகளுக்கு விடுமுறை வழங்கப்படும் நிலையில் இந்த ஆண்டும் விடுமுறை அறிவிக்கப்பட்டுள்ளது.
தென்மேற்கு டெல்லியின் எல்லையோரத்தில் அமைந்துள்ள அயா நகரில் இன்று காலை 1.8 டிகிரி செல்சியஸ் அளவுக்கு வெப்பநிலை பதிவாகியுள்ளது. சஃப்தர்ஜங்கில் 4.0 டிகிரி செல்சியஸ் பதிவாகியுள்ளது. தேசிய தலைநகரில் நிலவும் குளிர் அலையில் இருந்து விடுபடுவதற்காக டெல்லி மக்கள் நெருப்பு மூட்டி குளிர் காய்ந்தனர்.
டெல்லியில் அதிகரித்து வரும் குளிர் அலை காரணமாக, வீடற்ற மக்களுக்காக தங்குமிடங்கள் திறக்கப்பட்டுள்ளன. டெல்லியில் உள்ள வீடற்ற மக்கள், தேசிய தலைநகர் பகுதியில் நிலவும் குளிர் அலையில் இருந்து தப்பிக்க தங்குமிடங்களுக்கு சென்றனர். இந்த குறைந்த வெப்பநிலை, டெல்லியையே நடுங்க வைத்துள்ளது.
டெல்லி நகர்ப்புற தங்குமிட மேம்பாட்டு வாரியத்தின் உறுப்பினர் விபின் ராய், இதுகுறித்து கூறுகையில், "எங்களிடம் 197 நிரந்தர தங்குமிடங்கள் உள்ளன. குளிர்காலத்தில் டெல்லியில் கிட்டத்தட்ட 250 கூடாரங்கள் போட்டோம். இப்போது, செயல்பாட்டில் எங்களிடம் 190 கூடாரங்கள் உள்ளன. கூடுதலாக 50 கூடாரங்களை வைத்திருக்கிறோம். மெத்தைகள் மற்றும் போர்வைகள் தவிர குடியிருப்போருக்கு ஒரு நாளைக்கு 3 வேளை உணவும் வழங்குகிறோம்" என்றார்.
தலைநகர் டெல்லி, ஹரியானா, உத்தர பிரதேசம், பஞ்சாப், பீகார், ராஜஸ்தான், இமாச்சல பிரதேசம், உத்தரகாண்ட், மத்திய பிரதேசம் உள்ளிட்ட பல மாநிலங்கள் தற்போது கடும் குளிர் உள்ளது. உத்தர பிரதேச மாநிலம் கான்பூரில் மட்டும் கடும் குளிரால் மாரடைப்பு, பக்கவாதம் ஏற்பட்டு உயிரிழப்புகளும் ஏற்படுகிறது. இந்தச் சூழலில் தான் ஹரியானாவில் வரும் 21 ஆம் தேதி வரை பள்ளிகளுக்கு விடுமுறை அறிவிக்கப்பட்டுள்ளது.