வந்தாரா வனவிலங்கு மைய வழக்கை விசாரித்த உச்சநீதிமன்றம், அனைத்து சட்ட விதிமுறைகளும் பின்பற்றப்பட்டு, ஒரு தனிநபர் யானையை வைத்திருக்க விரும்பினால், அதில் எந்தத் தவறும் இல்லை என்று கூறியுள்ளது. இருப்பினும், இந்த கட்டத்தில் வழக்கில் எந்த உத்தரவையும் பிறப்பிக்க நீதிமன்றம் மறுத்துவிட்டது.
அன்றைய நடவடிக்கைகளின் போது, சிறப்பு புலனாய்வுக் குழுவின் (SIT) அறிக்கை, அமர்வு முன் சமர்ப்பிக்கப்பட்டது. குஜராத்தின் ஜாம்நகரில் உள்ள வந்தாரா வசதியில், வனவிலங்குகளை சட்டவிரோதமாக மாற்றுதல் மற்றும் யானைகளை சட்டவிரோதமாக சிறைபிடித்தல் தொடர்பான குற்றச்சாட்டுகள் குறித்து விரிவான விசாரணை நடத்தக் கோரிய பொதுநல வழக்கிலிருந்து, இந்த வழக்கு எழுந்தது. முன்னதாக, ஆகஸ்ட் 25-ம் தேதி அன்று, குற்றச்சாட்டுகளை ஆராய ஒரு SIT அமைக்க உச்சநீதிமன்றம் உத்தரவிட்டது.
சிறப்பு விசாரணைக் குழுவில், முன்னாள் உச்சநீதிமன்ற நீதிபதி ஜே. செலமேஸ்வர், உத்தரகண்ட் மற்றும் தெலங்கானா உயர்நீதிமன்றங்களின் முன்னாள் தலைமை நீதிபதி ராகவேந்திர சவுகான், மும்பை காவல் முன்னாள் ஆணையர் ஹேமந்த் நக்ரலே மற்றும் மூத்த ஐஆர்எஸ் அதிகாரி அனிஷ் குப்தா ஆகியோர் இடம்பெற்றுள்ளனர்.
ஜூலை மாதம் கோலாப்பூரில் உள்ள ஒரு கோவிலில் இருந்து, நோய்வாய்ப்பட்ட யானையை வந்தாராவுக்கு மாற்றியது குறித்து குறிப்பிட்ட உச்சநீதிமன்றம், அதில் தலையிடப் போவதில்லை என்று கூறியது. "ஒரு சுயாதீன அமைப்பு எந்த தவறும் செய்யவில்லை என்பதால், இப்போது தேவையற்ற குற்றச்சாட்டுகளை முன்வைக்கக்கூடாது" என்று அது கூறியது.
"பாருங்கள், யாராவது ஒரு யானையை வாங்க விரும்பினால், அவர் சட்ட விதிகளை பின்பற்றி அதைப் பெற்றால், அதில் என்ன தவறு இருக்கிறது?" என்று உச்சநீதிமன்றம் கேள்வி எழுப்பியது. "நீங்கள் உங்கள் யானைகளை கோவிலில் பராமரிக்கிறீர்கள், மேலும், அவை ஊர்வலத்திற்கும், (இந்து பண்டிகை) தசராவிற்கும் பயன்படுத்தப்படுகின்றன. மைசூரில், நீங்கள் அதைச் செய்கிறீர்கள்," என்று உச்சநீதிமன்றம் மேலும் கூறியது.
SIT அறிக்கையை தவறாகப் பயன்படுத்துவதற்கு எதிராக வந்தாராவுக்கு உச்சநீதிமன்றம் உறுதியளிக்கிறது
நீதிபதி பங்கஜ் மிதல் மற்றும் நீதிபதி பிரசன்னா வரலே ஆகியோர் அடங்கிய அமர்வு, குறுகிய காலத்திற்குள் தனது அறிக்கையை சமர்ப்பித்ததற்காக சிறப்பு விசாரணைக் குழுவை பாராட்டியது. வந்தாரா சார்பில் ஆஜரான மூத்த வழக்கறிஞர் ஹரிஷ் சால்வே, முழு அறிக்கையையும் பகிரங்கப்படுத்தக்கூடாது என்று வாதிட்டார். "முழு அறிக்கையும் வெளியிடப்படுவதை நாங்கள் விரும்பவில்லை. உலகெங்கிலும் உள்ள பலர் எங்களுடன் வணிகப் போட்டிகளைக் கொண்டுள்ளனர். மேலும், அதை அவர்கள் தவறாகப் பயன்படுத்தலாம்" என்று குறிப்பிட்டார்.
நீதிமன்றம் இதுபோன்ற தவறான பயன்பாட்டை அனுமதிக்காது என்று நீதிபதி மித்தல் உறுதியளித்தார். மேலும், "தேவையான மேம்பாடுகளைச் செய்ய நாங்கள் உங்களுக்கு அறிக்கையைத் தருவோம்" என்றும் கூறினார். இதற்கு, "நிச்சயமாக, நாங்கள் தேவையான நடவடிக்கைகளை எடுப்போம்" என்று சால்வே பதிலளித்தார்.
ஆகஸ்ட் 25-ம் தேதி அன்று நீதிமன்றத்தால் அமைக்கப்பட்ட குழுவிடம், 1972-ம் ஆண்டு வனவிலங்கு பாதுகாப்புச் சட்டம் மற்றும் உயிரியல் பூங்கா விதிகள் மற்றும் இந்தியா மற்றும் வெளிநாடுகளில் இருந்து விலங்குகளை, குறிப்பாக யானைகளை வாங்குவதை நிர்வகிக்கும் சட்டங்களை மையம் பின்பற்றுகிறதா என்பதை ஆராயுமாறு கேட்டுக் கொள்ளப்பட்டது.
ஜூலை மாதம் கோலாப்பூரில் உள்ள ஒரு கோவிலில் இருந்து நோய்வாய்ப்பட்ட யானையை வந்தாராவுக்கு மாற்றுவது தொடர்பான சர்ச்சையைத் தொடர்ந்து தாக்கல் செய்யப்பட்ட இரண்டு மனுக்களை நீதிமன்றம் விசாரித்து வந்தபோது, இந்த நடவடிக்கை எடுக்கப்பட்டது. செப்டம்பர் 12-ம் தேதிக்குள் குழு தனது அறிக்கையை சமர்ப்பிக்க உத்தரவிடப்பட்டது.