இந்தியாவில் கடைசியாக உருவான மாநிலம் தெலங்கானா. பல ஆண்டு போராட்டத்திற்கு பிறகு உருவான தெலங்கானாவின் முதல் சட்டப்பேரவை தேர்தல் கடந்த 2014 ஆம் ஆண்டு நடத்தப்பட்டது. அப்போதிலிருந்து கடந்த 9 ஆண்டுகளாக கே.சந்திரசேகர் ராவின் பாரத் ராஷ்டிர சமிதி கட்சி ஆட்சியில் உள்ளது.
தெலங்கானாவில் கடும் போட்டி:
தென் மாநிலங்களில் கர்நாடகாவை தவிர வேறு எங்கும் ஆட்சி அமைத்திராத பாஜக, தன்னுடைய அடுத்த குறியை தெலங்கானா மீது வைத்துள்ளது. அதேபோல, ஒருங்கிணைந்த ஆந்திர பிரதேசம், காங்கிரஸ் கட்சியின் கோட்டையாக விளங்கியது. கடந்த 2004 மற்றும் 2009 ஆண்டுகளில் நடைபெற்ற மக்களவை தேர்தலில் காங்கிரஸ் தலைமையிலான ஆட்சி அமைவதற்கு முக்கிய காரணமாக இருந்தது ஒருங்கிணைந்த ஆந்திர பிரதேசம்தான்.
இதன் காரணமாக, தெலங்கானாவில் இழந்த செல்வாக்கை மீட்க காங்கிரஸ் கட்சி பல்வேறு முயற்சிகளை மேற்கொண்டு வருகிறது. அதன் விளைவாக ஆளும் பாரத் ராஷ்டிர சமிதி (பிஆர்எஸ்) கட்சியில் இருந்து பல்வேறு தலைவர்கள் காங்கிரஸ் கட்சியில் இணைந்துள்ளனர். இப்படியிருக்க, தொடர்ந்து மூன்றாவது முறையாக ஆட்சியை பிடிக்கும் நோக்கில் சந்திரசேகர் ராவ், பல சமூக நல திட்டங்களை அறிவித்து வருகிறார்.
அதேபோல, வரவிருக்கும் மக்களவை தேர்தலில் தெலங்கானாவில் ஏதேனும் ஒரு தொகுதியில் பிரதமர் மோடியை களமிறக்கி தொண்டர்களை உற்சாகப்படுத்த பாஜக திட்டமிட்டு வருகிறது. இச்சூழலில், தெலங்கானா சட்டப்பேரவைக்கு தேர்தல் அறிவிக்கப்பட்டுள்ளது. அதன்படி, தெலங்கானாவில் ஒரே கட்டமாக நவம்பர் மாதம் 30ஆம் தேதி வாக்குப்பதிவு நடைபெற உள்ளது.
கே.சி.ஆருக்கு அதிர்ச்சி கொடுக்குமா காங்கிரஸ்?
இந்த நிலையில், ஏபிபி செய்தி நிறுவனம் சி வோட்டருடன் இணைந்து நடத்திய கருத்துக் கணிப்பு முடிவுகள் இன்று வெளியிடப்பட்டுள்ளது. மொத்தமுள்ள 119 சட்டப்பேரவை தொகுதிகளில் ஆளும் பாரத் ராஷ்டிர சமிதி கட்சி, 49 முதல் 61 இடங்களில் வென்று ஆட்சி அமைக்கும் என கணிக்கப்பட்டுள்ளது.
பெரிதும் எதிர்பார்க்கப்பட்ட காங்கிரஸ் கட்சி, 43 முதல் 55 இடங்களை கைப்பற்றும் என தெரிவிக்கப்பட்டுள்ளது. மத்தியில் ஆட்சியில் உள்ள பாஜக, தெலங்கானாவில் 5 முதல் 11 இடங்களில் வெற்றிபெறும் என கருத்துக்கணிப்பில் கூறப்பட்டுள்ளது. மற்ற கட்சிகள், 4 முதல் 10 இடங்களில் வெற்றி பெறும் கணிக்கப்பட்டுள்ளது.
வரவிருக்கும் தேர்தலில் 39.4 சதவிகித வாக்குகளை காங்கிரஸ் பெறும் என தெரிவிக்கப்பட்டுள்ளது. அதேபோல, பிஆர்எஸ் 40.5 சதவிகித வாக்குகளையும் பாஜக 14.3 சதவிகித வாக்குகளையும் பெறும் என கணிக்கப்பட்டுள்ளது. இந்த தேர்தலில், எந்த விவகாரத்துக்கு அதிக முக்கியத்துவம் அளிப்பீர்கள் என எழுப்பிய கேள்விக்கு வேலையில்லா திண்டாட்டம், விலைவாசி உயர்வு என பெரும்பான்மையான மக்கள் கருத்து தெரிவித்துள்ளனர்.
யார் முதலமைச்சராக வர வேண்டும் என எழுப்பப்பட்ட கேள்விக்கு கே.சி.ஆருக்கு ஆதரவாக 37 சதவிகித மக்கள் கருத்து தெரிவித்துள்ளனர். காங்கிரஸ் கட்சியின் ரேவந்த் ரெட்டி, முதலமைச்சராக வர வேண்டும் என 31.2 சதவிகித மக்கள் கருத்து தெரிவித்துள்ளனர்.