SC Center: ஆளுநர்களுக்கு ஆதரவாக களமிறங்கிய மத்திய அரசு - ”உச்சநீதிமன்றம் தலையிட வேண்டாம்”

SC Center: குடியரசு தலைவர் மற்றும் ஆளுநர்களுக்கு உச்சநீதிமன்றம் காலக்கெடு நிர்ணயிப்பது அதிகார சமநிலையை சீர்குலைக்கும் என்று மத்திய அரசு எச்சரித்துள்ளது.

SC Center: குடியரசு தலைவர் மற்றும் ஆளுநர்களுக்கு உச்சநீதிமன்றம் காலக்கெடு நிர்ணயிப்பதை மத்திய அரசு கடுமையாக எதிர்த்துள்ளது.

மத்திய அரசு எதிர்ப்பு:

சட்டமன்றங்களால் நிறைவேற்றப்பட்ட மசோதாக்களுக்கு ஒப்புதல் வழங்குவதற்கோ அல்லது நிறுத்துவதற்கோ குடியரசு தலைவர் மற்றும் ஆளுநர்களுக்கு காலக்கெடு நிர்ணயித்த உச்ச நீதிமன்றத்தின் தீர்ப்புக்கு எதிரான மனுவில் மத்திய அரசு தனது தரப்பு கருத்துகளை முன்வைத்துள்ளது. அதில்,  ”நீதித்துறை மறுஆய்வு அதிகாரங்கள் என்ற போர்வையில், அரசியலமைப்பு ரீதியாக வழங்கப்பட்ட உயர்மட்ட மண்டலத்தை அனுமதிக்க முடியாத வகையில் உச்ச நீதிமன்றம் ஆக்கிரமிப்பது சட்டமன்றம், நிர்வாகத்துறை மற்றும் நீதித்துறைக்கு இடையிலான அதிகார சமநிலையை சீர்குலைக்கும். ஜனநாயக சமூகத்தில் எழக்கூடிய ஒவ்வொரு புதிருக்கும் நீதித்துறை திறவுகோல்களையோ அல்லது தீர்வுகளையோ கொண்டிருக்கவில்லை” என மத்திய அரசு தெரிவித்துள்ளது.

”நீதிமன்றத்திற்கு அதிகாரம் வழங்கப்படவில்லை”

மேலும், “பிரிவு 142 அரசியலமைப்பு மற்றும் சட்டத்தை மாற்றும் கருதப்பட்ட ஒப்புதல் என்ற கருத்தை உருவாக்க நீதிமன்றத்திற்கு அதிகாரம் அளிக்கவில்லை. ஒப்புதல் வழங்குதல் அல்லது நிறுத்தி வைப்பதில் உள்ள காரணிகளுக்கு சட்ட அல்லது அரசியலமைப்பு இணையானது இல்லாததால், நீதித்துறை மறுஆய்வு என்ற பாரம்பரிய கருத்தை நீக்கி ஒப்புதலுக்குப் பயன்படுத்த முடியாது. நிர்வாகத்தின் மூன்று உறுப்புகளும் அரசியலமைப்பிலிருந்து அதிகாரத்தைப் பெறுகின்றன. இது நீதித்துறை ஆளுநர் பதவியை ஒரு அடிபணிந்தவராக தள்ளுவதற்கு அதிகாரம் இல்லை. குடியரசு தலைவர் மற்றும் ஆளுநர்களின் முடிவுகள் தொடர்பான மசோதாக்கள் தொடர்பான பிரச்சினைகள், அரசியல் பதில்களுக்குத் தகுதியானவை, அவசியம் நீதித்துறை அல்ல" என்று மத்திய அரசு தனது அறிக்கையில் தெரிவித்துள்ளது.

குடியரசு தலைவரின் 14 கேள்விகள்:

சட்டமன்றத்தில் நிறைவேற்றப்பட்ட மசோதாக்களுக்கு ஆளுநர் ஒப்புதல் அளிக்காததை எதிர்த்து, தமிழ்நாடு அரசு உச்சநீதிமன்றத்தில் வழக்கு தொடர்ந்தது. விசாரணையின் முடிவில் ஏப்ரல் 8 ஆம் தேதி நீதிபதிகள் ஜே.பி. பர்திவாலா மற்றும் ஆர். மகாதேவன்ஆகியோர் அடங்கிய அமர்வு, குடியரசு தலைவர் மற்றும் ஆளுநர்கள் மசோதாக்களுக்கு குறிப்பிட்ட காலக்கெடுவுக்குள் ஒப்புதல் வழங்க உத்தரவிட்டனர்.

இதுகுறித்து 14 கேள்விகளை எழுப்பிய குடியரசு தலைவர் திரௌபதி முர்முவின் மனுவை, தலைமை நீதிபதி அடங்கிய அமர்வு விசாரித்து வருகிறது. இந்த விவகாரத்தில் மத்திய அரசு மட்டுமின்றி அனைத்து மாநில அரசுகளும் பதிலளிக்க உத்தரவிடப்பட்டு இருந்தது. அதன்படி, சனிக்கிழமை மத்திய அரசு தனது தரப்பு கருத்துகளை பதிவு செய்தது. அதில், மசோதாக்கள் தொடர்பாக குடியரசு தலைவர் மற்றும் ஆளுநர்களின் முடிவுகளின் மீது நீதித்துறை அதிகாரங்களைப் பயன்படுத்துவது நீதித்துறைக்கு மேலாதிக்கத்தை வழங்கும் என்று மத்திய அரசு கூறியது. இது அரசியலமைப்பின் அடிப்படை கட்டமைப்பிற்கு எதிரானது என தெரிவித்துள்ளது. அதேநேரம், தமிழ்நாடு உள்ளிட்ட எதிர்க்கட்சிகள் ஆளும் மாநிலங்கள்,நீதிமன்ற தீர்ப்பை வரவேற்றுள்ளதோடு, குடியரசு தலைவரின் கேள்விகளை நிராகரிக்க வேண்டும் என வலியுறுத்தியுள்ளன.