மகாராஷ்ட்ரா மாநிலத்திற்கு இன்று சட்டமன்ற தேர்தல் முடிவுகள் வெளியாகி வரும் நிலையில், 81 சட்டமன்ற தொகுதிகளுக்கான தேர்தல் முடிவுகளும் வெளியாகி வருகிறது. தேர்தலுக்கு பிந்தைய கருத்துக்கணிப்பில் ஜார்க்கண்ட் மாநிலத்தில் பா.ஜ.க. ஆட்சியை பிடிக்கும் என்று பலரும் தெரிவித்திருந்தனர்.


ஜார்க்கண்டில் கெத்து காட்டும் முக்தி மோர்ச்சா:


ஆனால், கருத்துக்கணிப்புகளை பொய்யாக்கும் விதமாக காலை முதலே ஜார்க்கண்ட் மாநிலத்தில் ஆளுங்கட்சியான ஜார்க்கண்ட் முக்தி மோர்ச்சா தலைமையிலான இந்தியா கூட்டணி வெற்றிக்கொடியை நாட்டி வருகிறது. அங்கு 81 தொகுதிகளில் இந்தியா கூட்டணியில் ஜார்க்கண்ட் முக்தி மோர்ச்சா 43 தொகுதிகளிலும், காங்கிரஸ் 30 தொகுதிகளிலும், ராஷ்ட்ரிய ஜனதா தளம் 6 தொகுதிகளிலும் எஞ்சிய தொகுதிகளில் கூட்டணி கட்சியினரும் போட்டியிட்டனர்.


மத்தியில்  ஆளும் பா.ஜ.க.வினர் 68 தொகுதிகளில் நேரடியாக களமிறங்கியது. எஞ்சிய தொகுதிகளில் கூட்டணிக் கட்சிகள் களமிறங்கியது. இந்த தேர்தலில் பா.ஜ.க. வெற்றி பெற்று ஆட்சியைப் பிடிக்கும் என்று கருத்துக்கணிப்பு வெளியானதும் பா.ஜ.க.வினர் மகிழ்ச்சி அடைந்தனர். ஆனால், காலை முதலே பா.ஜ.க.வினருக்கு அதிர்ச்சி மேல் அதிர்ச்சி காத்திருந்தது.

சல்லி, சல்லியாய் போன பா.ஜ.க. வியூகம்:


தற்போதைய நிலவரப்படி ஜார்க்கண்ட் முக்தி மோர்ச்சா தலைமையிலான கூட்டணியினர் 50 தொகுதியில் முன்னிலையில் உள்ளனர். பா.ஜ.க.  கூட்டணியினர் 30 தொகுதிகளில் முன்னிலையில் உள்ளனர். பெரும்பான்மைககு தேவையான தொகுதிகள் கிடைக்காததால் ஆட்சியை கைப்பற்றும் முயற்சியில் பா.ஜ.க. மீண்டும் தோல்வி அடைந்துள்ளது.


சம்பாய் சோரனை தங்கள் பக்கம் இழுத்ததால் ஜார்க்கண்ட் முக்தி மோர்ச்சாவிற்கு பெரும் நெருக்கடி தர முடியும் என்ற பா.ஜ.க.வின் வியூகம் தவிடுபொடியானது. சம்பாய் சோரன் போட்டியிட்ட தொகுதியில் பெரும் பின்னடைவைச் சந்தித்துள்ளார்.


தோல்வி முகத்தில் ஹேமந்த் சோரன் மனைவி:


ஜார்க்கண்ட் மாநிலத்தில் ஆளுங்கட்சிக்கு பின்னடைவாக முதலமைச்சர் ஹேமந்த் சோரனின் மனைவி கல்பனா சோரன் தான் போட்டியிட்ட கான்டே தொகுதியில் பின்னடைவில் உள்ளார். அதேசமயம், ஹேமந்த் சோரன் பர்கைட் தொகுதியில் முன்னிலையில் உள்ளார்.


ஜார்க்கண்ட் மாநிலத்தில் தொடர்ந்து ஆளுங்கட்சி கூட்டணி வெற்றி முகத்தில் இருப்பதால் அந்த மாநிலத்தில் இந்தியா கூட்டணியினர் பட்டாசு வெடித்து கொண்டாடி வருகின்றனர். பல்வேறு நெருக்கடிகளுக்கு பிறகு சட்டசபைத் தேர்தலை எதிர்கொண்ட ஜார்க்கண்ட் முக்தி மோர்ச்சா மீண்டும் ஆட்சியை பிடிக்க இருப்பதால் அக்கட்சியினர் உற்சாகம் அடைந்துள்ளனர். மாநிலத்தில் வெற்றி பெற்றவர்களின் முழு விவரமும் இன்று மாலைக்குள் வெளியாகும்.