காங்கிரஸ் கட்சியை மக்களிடம் மீண்டும் கொண்டு சேர்க்கும் வகையில் அக்கட்சியின் முன்னாள் தலைவர் ராகுல்காந்தி, இந்திய ஒற்றுமை நடைபயணத்தை தலைமை தாங்கி நடத்தினார். இதில், பல தரப்பட்ட மக்களிடம் உரையாடி அவர்களின் குறைகளை கேட்டறிந்தார் ராகுல் காந்தி.
இந்திய ஒற்றுமை நடைபயணத்துக்கு கிடைத்த வரவேற்பு:
எதிர்கட்சி தலைவர்கள், முன்னாள் அரசு அதிகாரிகள், சமூக ஆர்வலர்கள் என பல்வேறு தரப்பினர் இந்த நடைபயணத்தில் கலந்து கொண்டனர். ரிசர்வ் வங்கியின் முன்னாள் ஆளுநர் ரகுராம் ராஜன், சமூக ஆர்வலர் ஹர்ஷ் மந்தர், எழுத்தாளரும் காந்தியின் கொள்ளுப் பேரன் துஷார் காந்தி, மனித உரிமை ஆர்வலர் மேதா பட்கர் உள்ளிட்ட பலர் நடைபயணத்தில் கலந்து கொண்டனர்.
தமிழ்நாட்டில் தொடங்கப்பட்ட நடைபயணம் கேரளா, கர்நாடகா, ஆந்திரா, தெலங்கானா, மகாராஷ்டிரா, சத்தீஸ்கர், மத்திய பிரதேசம், ராஜஸ்தான், உத்தரப் பிரதேசம், ஹரியானா, டெல்லி, இமாச்சல பிரதேசம், பஞ்சாப் ஆகிய மாநிலங்களை கடந்து இறுதியில் காஷ்மீரில் நிறைவடைந்தது.
நடுவில் இடைவெளியுடன் மொத்தம் 146 நாட்களுக்கு நடந்த இந்திய ஒற்றுமை பயணம் கடந்தாண்டு ஜனவரி 30ஆம் தேதியுடன் நிறைவடைந்தது. இந்த ஒற்றுமை பயணத்தால் மக்கள் மத்தியில் ராகுல் காந்திக்கு நல்ல பெயர் கிடைத்திருப்பதாக அரசியல் வல்லுநர்கள் கருதுகின்றனர்.
இந்திய நீதி பயணத்துக்கு ரெடியான ராகுல் காந்தி:
இந்த நடைபயணத்திற்கு கிடைத்த வரவேற்பை தொடர்ந்து, மற்றொரு நடைபயணத்தை தொடங்க காங்கிரஸ் திட்டமிட்டு வருவதாக செய்திகள் வெளியான வண்ணம் இருந்தது. அதை உறுதி செய்யும் வகையில், கடந்தாண்டு டிசம்பர் 27ஆம் தேதி அதிகாரப்பூர்வ அறிவிப்பு வெளியானது.
அதன்படி, வரும் 14ஆம் தேதி மணிப்பூரில் யாத்திரையை தொடங்க உள்ளார் ராகுல் காந்தி. மணிப்பூரில் தொடங்கி மும்பை வரை அதாவது 6 ஆயிரத்து 200 கிலோ மீட்டர் தூரத்துக்கு யாத்திரை மேற்கொள்ளவார் என காங்கிரஸ் கட்சி அதிகாரப்பூர்வமாக அறிவித்துள்ளது. இந்த யாத்திரைக்கு பாரத் நியாய யாத்ரா ( இந்திய நீதி பயணம்) என பெயரிடப்பட்டுள்ளது.
நாளை அவசர ஆலோசனை:
இந்த நிலையில், யாத்திரைக்கு தேவையான ஏற்பாட்டு பணிகளை செய்வது தொடர்பாக ஆலோசனை செய்ய தேசிய செயலாளர்கள், மாநில பொறுப்பாளர்களுக்கு காங்கிரஸ் கட்சி அழைப்பு விடுத்துள்ளது. நாளை காலை 11 மணிக்கு டெல்லியில் உள்ள அகில இந்திய காங்கிரஸ் கமிட்டி அலுவலகத்தில் ஆலோசனை கூட்டம் நடைபெற உள்ளது. காங்கிரஸ் தேசிய தலைவர் மல்லிகார்ஜுனா கார்கே தலைமையில் ஆலோசனை கூட்டம் நடத்தப்படவுள்ளது.
இந்த கூட்டத்தில், யாத்திரை செல்லும் வழியை கட்சி தலைவர்கள் இறுதி செய்வார்கள். நாளை மறுநாள், 'பாரத் நியாய யாத்ரா' லோகோவை கட்சி வெளியிட உள்ளது. அதே நேரத்தில் ஜனவரி 8 ஆம் தேதி யாத்திரைக்கான பாதை அறிவிக்கப்பட உள்ளது. யாத்திரைக்கான தீம் பாடல் ஜனவரி 12 ஆம் தேதி வெளியிடப்படும் என அறிவிக்கப்பட்டுள்ளது.