Pro Tem Speaker: மக்களவையின் இடைக்கால சபாநாயகராக மஹ்தப் நியமனம்- குடியரசுத் தலைவர் உத்தரவு

Pro Tem Speaker: 18வது மக்களவையின் இடைக்கால சபாநாயகராக மஹ்தப் நியமனம் செய்யப்பட்டுள்ளார். இதற்கான உத்தரவை குடியரசுத் தலைவர் பிறப்பித்துள்ளார்.

மக்களவையின் தற்காலிக ( இடைக்கால ) சபாநாயகராக பருத்ருகரி மஹ்தப்பை நியமனம் செய்து குடியரசுத் தலைவர் உத்தரவு பிறப்பித்துள்ளார்.

இடைக்கால சபாநாயகர் நியமனம்:

18வது மக்களவைக்கான தேர்தலானது நடைபெற்று , ஜூன் 4 ஆம் தேதி முடிவுகள் வெளியான நிலையில், பாஜக தலைமையிலான தேசிய ஜனநாயக கூட்டணி ஆட்சியை அமைத்துள்ளது. இந்நிலையில், மக்களவைக்கான தற்காலிக தலைவராக 7வது முறையாக மக்களவை உறுப்பினராக தேர்வாகிய பாஜகவைச் சேர்ந்த பருத்ருகரி மஹ்தப் நியமனம் செய்யப்பட்டுள்ளார். 

மக்களவை உறுப்பினர்கள் கே.சுரேஷ், டி.ஆர்.பாலு, ராதா மோகன் சிங், ஃபக்கன் சிங் குலாஸ்தே மற்றும் சுதிப் பந்தோபாத்யாய் ஆகியோர் இடைக்கால சபாநாயகருக்கு உதவுவார்கள் எனவும் நாடாளுமன்ற விவகாரங்கள் துறை அமைச்சர் கிரண் ரிஜிஜூ தெரிவித்துள்ளார். 

பதவி பிரமாணம்:

இந்நிலையில், தற்காலிகமாக தேர்வு செய்யப்பட்டுள்ள சபநாயகர் மஹ்தப் , மக்களவையின் முதல் கூட்டத்திற்கு தலைமை தாங்குவார். மேலும், மக்களவை உறுப்பினராக தேர்வு செய்யப்பட்டவர்களுக்கு பதவி பிரமாணம் செய்து வைப்பார். இதையடுத்து, மக்களவை உறுப்பினர்கள் மூலமாக நிரந்தர மக்களவை சபாநாயகர் தேர்வு செய்யப்படுவார்.

மக்களவை சபாநாயகர் பதவியை, தேசிய ஜனநாயக கூட்டணியில் உள்ள தெலுங்கு தேச கட்சியைச் சேர்ந்த சந்திரபாபு நாயுடு தரப்பு, கேட்டு அழுத்தம் கொடுத்து வருவதாக தகவல் வெளியாகி வரும் சூழ்நிலையில், பாஜகவும் விட்டு கொடுப்பதாகவும் இல்லை என்றும் கட்சி வட்டாரங்கள் தெரிவிக்கின்றன.  இந்நிலையில், மக்களவையின் சபாநாயகர் பதவியானது, மசோதாக்களை தீர்மானிப்பது, அவையை வழிநடத்துவது, தகுதி நீக்கம் உள்ளிட்ட விவகாரங்களில் சக்தி வாய்ந்ததாக பார்க்கப்படுவதால், எந்த கட்சியைச் சேர்ந்தவர்களுக்கு சபாநாயகர் பதவி செல்லும் என எதிர்பார்ப்பு கிளம்பியுள்ளது.