மத்தியப் பிரதேசம் மற்றும் சத்தீஸ்கரில் வாக்குப்பதிவு நேற்று முடிவடைந்ததையடுத்து, முக்கிய கட்சிகளான காங்கிரஸ் மற்றும் பாஜக கட்சிகளே அதிகளவில் ஆதிக்கம் செலுத்தியதாக கூறப்படுகிறது. தேர்தல் முடிவுகள் வர இன்னும் 15 நாட்களே உள்ள நிலையில், எந்த கட்சிகள் ஆட்சிக்கு வரும் என்ற பரபரப்பு இப்போதே தொடங்கிவிட்டது. 


காலை ஏழு மணி முதலே இரண்டு மாநிலங்களிலும் உள்ள வாக்குச்சாவடிகளில் கூட்டம் அலைமோதியது. நேரம் ஆக ஆக கூட்டம் அதிகரித்தது. வாக்குப்பதிவு நேரம் முடிந்த பிறகும் (மாலை 6 மணி) பல மையங்களில் நீண்ட வரிசையில் காத்திருந்தனர். காலை முதலே வாக்களிப்பதில் பெண்கள் அதிகளவில் காணப்பட்டது குறிப்பிடத்தக்கது. சில சட்டமன்ற தொகுதிகளில் வாக்குப்பதிவின் போது பாஜக மற்றும் காங்கிரஸ் ஆதரவாளர்களிடையே ஆங்காங்கே வன்முறை மோதல்களும் நடந்தன.


இந்தநிலையில் தேர்தல் கமிஷன் தரவுகளின்படி, வெள்ளிக்கிழமை (நேற்று) மாலை 6 மணிவரை, மத்தியப் பிரதேசத்தில் 71.16 சதவீத வாக்குகளும், சத்தீஸ்கரில் 68.15 சதவீத வாக்குகளும் பதிவாகியுள்ளதாக தெரிவித்துள்ளது. 


இரு மாநிலங்களிலும் வாக்குப்பதிவின் போது வன்முறைச் சம்பவங்கள் நடந்துள்ளதாகவும் செய்திகள் வெளியாகியுள்ளன. சத்தீஸ்கர் மாநிலம் கரியாபந்தில் நக்சலைட்டுகள் நடத்திய வெடிகுண்டு தாக்குதலில் ஐடிபிபி ஜவான் ஒருவர் வீரமரணம் அடைந்தார். அதே நேரத்தில், மத்தியப் பிரதேசத்தின் மெஹ்கான் சட்டமன்றத் தொகுதியில் அடையாளம் தெரியாத நபர்கள் நடத்திய துப்பாக்கிச் சூட்டில் பாஜக வேட்பாளர் மற்றும் ஆம் ஆத்மி கட்சி (ஆம் ஆத்மி) ஆதரவாளர் ஒருவரும் காயமடைந்தனர்.


மத்தியப்பிரதேச தேர்தல்: 


மத்தியப் பிரதேசத்தில் 64,626 வாக்குச் சாவடிகளில் காலை 5.30 மணிக்கு போலி வாக்கெடுப்பு நடத்தப்பட்டது. அதன் பிறகு காலை 7 மணிக்கு வாக்குப்பதிவு தொடங்கியது. மத்தியப்பிரதேச தேர்தலில் வாக்குப்பதிவு நிலவரம் குறித்து தலைமை தேர்தல் அதிகாரி அன்பழகன் கூறுகையில், "மாலை 5 மணி வரை 71.16% வாக்குகள் பதிவாகியுள்ளன. சட்டமன்றத் தொகுதியின்படி அதிகபட்சமாக சைலானா தொகுதியில் 85.49% வாக்குகள் பதிவாகியுள்ளது. கில்சிப்பூர் ராஜ்கரில் 84.17% வாக்குகள் பதிவாகியுள்ள நிலையில், சியோனியின் பர்காட் சட்டமன்றத் தொகுதியில் 84.16% வாக்குகள் பதிவாகியுள்ளன. அகர் மால்வா மாவட்டத்தில் 82%, நீமுச்சில் 81,19% மற்றும் ஷாஜாபூரில் 80.95%... அலிராஜ்பூரில் 56.24%, பிண்டில் 58.41%, போபாலில் 59.19% வாக்குகள் பதிவாகியுள்ளன. மாநிலத்தின் ஒட்டுமொத்த சராசரி 71.16%. ஆகும்” என தெரிவித்தார். 


சத்தீஸ்கர் தேர்தல்:


சத்தீஸ்கர் மாநிலம் கன்கேர் மாவட்டத்தில் நக்சலைட்டுகள் தீ வைத்துள்ளனர். இந்த நேரத்தில் நக்சலைட்டுகள் வாக்களிப்பு புறக்கணிப்பு தொடர்பான துண்டு பிரசுரங்களை வீசியதாக நியூஸ் 18 தெரிவித்துள்ளது. பகஞ்சூரில் உள்ள சோட்டாபதியா பகுதியில் உள்ள அச்சனியாவில் உள்ள ஜியோ டவருக்கு நக்சலைட்டுகள் தீ வைத்து மரங்களை வெட்டி சாலை மறியலில் ஈடுபட்டனர். சத்தீஸ்கர் மாநிலத்தில் 70 தொகுதிகளுக்கு வெள்ளிக்கிழமை நடைபெற்ற இரண்டாவது மற்றும் இறுதி கட்ட வாக்குப்பதிவில் மாலை 5 மணி வரை 67.34 சதவீத வாக்காளர்கள் தங்கள் வாக்குரிமையைப் பயன்படுத்தினர்.


சத்தீஸ்கரில் ஐந்தாவது சட்டமன்றத் தேர்தலின் கடைசிக் கட்டத்தில், 70 தொகுதிகளில் இரவு 9 மணி வரை 74 சதவீத வாக்குகள் பதிவாகியுள்ளன. அதிகபட்சமாக குருத் பகுதியில் 82.60 சதவீத வாக்குகளும், குறைந்த பட்சமாக ராய்ப்பூர் தெற்கில் 52.11 சதவீத வாக்குகளும் பதிவாகியுள்ளன.


 மதியம் 12 மணிக்கு மேல் அதிகரித்தது. மாலை 5 மணி நிலவரப்படி மாநிலத்தில் ஒரு கோடியே 17 லட்சத்து 18 ஆயிரத்து 317 வாக்காளர்கள் வாக்களித்துள்ளனர். முதலமைச்சர் பூபேஷ் பாகேலின் தொகுதியான படானில் மாலை 5 மணி நிலவரப்படி 75.54 சதவீத வாக்குகள் பதிவாகியுள்ளன.