இன்னும் 9 மாதங்களில் அடுத்த மக்களவை தேர்தல் நடைபெறுகிறது. தேர்தலுக்கு முன்னதாகவே அரசியல் களம் சூடுபிடிக்க தொடங்கியுள்ளது. அந்த வகையில், பாஜகவை வீழ்த்துவதற்கான வியூகம் குறித்து ஆலோசனை செய்யும் வகையில் பிகார் மாநிலம் பாட்னாவில் இன்று எதிர்க்கட்சிகள் கூட்டம் நடைபெற்றது. 


செய்தியாளர் சந்திப்பில் பங்கேற்காத ஆம் ஆத்மி:


இதில், 16 எதிர்க்கட்சிகளை சேர்ந்த தலைவர்கள் கலந்து கொண்டனர். அடுத்தாண்டு மக்களவை தேர்தலை ஒன்றிணைந்து எதிர்கொள்ள முடிவு செய்திருப்பதாக, கூட்டத்தை தொடர்ந்து நடைபெற்ற செய்தியாளர் சந்திப்பில் எதிர்க்கட்சி தலைவர்கள் அறிவித்துள்ளனர்.


செய்தியாளர் சந்திப்பில் அனைத்து எதிர்க்கட்சிகளும் ஒற்றுமையுடன் இருப்பதாக காட்டி கொண்டாலும், ஆம் ஆத்மி கட்சி அறிவிப்பை ஒன்றை வெளியிட்டு மற்ற எதிர்க்கட்சிகளுக்கு அதிர்ச்சி அளித்துள்ளது. முன்னதாக, டெல்லியில் அரசு அதிகாரிகளை கட்டுப்படுத்துவது தொடர்பாக மத்திய அரசு கொண்டு வந்த அவசர சட்டத்திற்கு எதிரான தங்களின் நிலைபாட்டுக்கு காங்கிரஸ் ஆதரவு தெரிவிக்கவில்லை என்றால் பாட்னா கூட்டத்தை புறக்கணிப்போம் என ஆம் ஆத்மி தெரிவித்திருந்தது. 


இன்று நடைபெற்ற கூட்டத்தில் இது தொடர்பாக காங்கிரஸ் தலைவர் மல்லிகார்ஜுன கார்கேவிடம் கேள்வி எழுப்பப்பட்டது. அதற்கு பதிலளித்த கார்கே, "நாடாளுமன்றக் கூட்டத் தொடருக்கு முன்னதாகவே இதுபோன்ற பிரச்னைகள் குறித்து முடிவெடுக்கப்படும்" என்றார்.


மெகா கூட்டணியில் இருந்து வெளியேறுகிறதா ஆம் ஆத்மி..?


இந்நிலையில், மத்திய அரசின் சர்ச்சைக்குரிய அவசர சட்டத்தை காங்கிரஸ் பகிரங்கமாக எதிர்க்கும் வரை எதிர்கால எதிர்க்கட்சி கூட்டங்களில் பங்கேற்க முடியாது என ஆம் ஆத்மி அறிவித்துள்ளது. இதுகுறித்து ஆம் ஆத்மி வெளியிட்ட அறிக்கையில், "இது போன்ற முக்கியமான ஒரு பிரச்னையில், காங்கிரஸ் தயக்கம் காட்டுவது, கூட்டணியுடன் சேர்ந்து செயல்பட மறுப்பது, காங்கிரஸை உள்ளடக்கிய எந்தவொரு கூட்டணியிலும் ஆம் ஆத்மி ஒரு பகுதியாக இருப்பதை கடினமாக்கும்.


அவசர சட்டத்தை காங்கிரஸ் பகிரங்கமாகக் கண்டித்து, அதன் 31 மாநிலங்களவை எம்பிக்களும் ராஜ்யசபாவில் அவசரச் சட்டத்தை எதிர்ப்பதாக அறிவிக்கும் வரை, காங்கிரஸ் பங்கேற்கும் ஒத்த எண்ணம் கொண்ட கட்சிகளின் எதிர்காலக் கூட்டங்களில் ஆம் ஆத்மி கட்சி பங்கேற்பது கடினம்.
டெல்லி மக்களுடன் உள்ளதா அல்லது மோடி அரசுடன் உள்ளதா என்பதை காங்கிரஸ் முடிவு செய்ய வேண்டும். 


காங்கிரஸ் கிட்டத்தட்ட எல்லாப் பிரச்னைகளிலும் ஒரு நிலைப்பாட்டை எடுக்கிறது. ஆனால், அவசர சட்டம் பற்றிய தனது நிலைப்பாட்டை இன்னும் பகிரங்கப்படுத்தவில்லை. இருப்பினும், இந்த விவகாரத்தில் மோடி அரசுக்கு காங்கிரஸ் ஆதரவு அளிக்க வேண்டும் என்று காங்கிரஸ் கட்சியின் டெல்லி மற்றும் பஞ்சாப் தலைவர்கள் அறிவித்துள்ளனர்.


இன்று நடைபெற்ற எதிர்க்கட்சிகள் கூட்டத்தில், இந்த அவசரச் சட்டத்தை பகிரங்கமாக கண்டிக்க வேண்டும் என்று பல கட்சிகள் காங்கிரஸை வற்புறுத்திய போதிலும், அதை ஏற்க மறுத்துவிட்டது" என குறிப்பிடப்பட்டுள்ளது.