முன்னாள் முதலமைச்சர் ஜெயலலிதாவிற்கு சொந்தமான நீலகிரியில் உள்ள கோடநாடு எஸ்டேட்டில் கடந்த 2017ஆம் ஆண்டு ஏப்ரல் 23 ஆம் தேதி கொள்ளை சம்பவம் நடைபெற்றது. இரவில் ஆயுதங்களுடன் எஸ்டேட்டுக்குள் அத்துமீறி நுழைந்த கும்பல், பாதுகாவலராக இருந்த ஓம்பகதூர் என்பவரை கொலை செய்து விட்டு, சில மதிப்புமிக்க பொருட்களை திருடிச் சென்றது. இது தொடர்பாக சயன், சதீசன், உதயகுமார், ஜம்சிர் அலி, தீபு, சந்தோஷ், திலிப் ஜாய், வாளையார் மனோஜ், மனோஜ் உள்ளிட்ட 10 பேர் மீது வழக்குப்பதிவு செய்யப்பட்டது. கோடநாடு வழக்கில் முக்கிய குற்றவாளியாக கருதப்படும் முன்னாள் முதலமைச்சர் ஜெயலலிதாவின் ஓட்டுநர் கனகராஜ், சேலம் மாவட்டத்தில் நடந்த கார் விபத்தில் உயிரிழந்தார். கோடநாடு கொலை, கொள்ளை வழக்கு தொடர்பாக நீலகிரி மாவட்ட அமர்வு நீதிமன்றத்தில் விசாரணை நடைபெற்று வருகிறது.
இதனிடையே கோடநாடு வழக்கில் கூடுதல் விசாரணையை துவக்கிய நீலகிரி காவல் துறையினர், இவ்வழக்கில் முன்னாள் முதலமைச்சர் எடப்பாடி பழனிசாமிக்கு தொடர்பு இருப்பதாக கூறிய சயன் மற்றும் விபத்தில் உயிரிழந்த கனகராஜின் அண்ணன் தனபால் ஆகியோரிடம் விசாரணை செய்தனர். இதையடுத்து ஏடிஎஸ்பி தலைமையில் 5 தனிப் படைகள் அமைத்து கூடுதல் விசாரணை தீவிரப்படுத்தப்பட்டுள்ளது. சாட்சிகள், குற்றம் சாட்டப்பட்டவர்கள், அவர்களின் உறவினர்கள் மற்றும் நண்பர்கள் என கூடுதல் விசாரணை நடத்தப்பட்டு வருகிறது.
இவ்வழக்கில் குற்றவாளியாக சேர்க்கப்பட்ட சயன், ஜம்சிர் அலி, சந்தோஷ் சாமி, மனோஜ் சாமி, சதீசன், பிஜின் குட்டி ஆகிய 6 பேரிடம் காவல் துறையினர் விசாரணை நடத்தி இரகசிய வாக்குமூலம் பெற்றுள்ளனர். குற்றம்சாட்டப்பட்டவர்களில் 4 பேரிடம் இதுவரை நடத்தப்படவில்லை. இதனிடையே கோடநாடு கம்யூட்டர் ஆப்ரேட்டர் தினேஷ்குமார் தற்கொலை வழக்கு மற்றும் கனகராஜ் விபத்து வழக்குகளை காவல் துறையினர் மீண்டும் காவல் துறையினர் விசாரணை நடத்தி வருகின்றனர்.
விபத்தில் உயிரிழந்த கனகராஜ் மரணத்தில் சந்தேகம் இருப்பதாகவும், இதில் முன்னாள் முதலமைச்சர் எடப்பாடி பழனிசாமிக்கு தொடர்ப்பு இருப்பதாகவும் கனகராஜ் சகோதாரர் தனபால் உள்ளிட்டோர் புகார் தெரிவித்து வந்தனர். தனபால், கனகராஜின் மனைவி, உறவினர்கள் உள்ளிட்டோரிடம் காவல் துறையினர் கூடுதல் விசாரணை நடத்தினர்.
இந்நிலையில் கனகராஜின் சகோதாரர் தனபால் (44) மற்றும் அவரது உறவினர் ரமேஷ் (34) ஆகியோரை நீலகிரி மாவட்ட காவல் துறையினர் கைது செய்தனர். பின்னர் நீதிமன்ற காவலில் கூடலூர் கிளைச் சிறையில் இருவரும் அடைக்கப்பட்டனர். கோடநாடு வழக்கில் கூடுதல் விசாரணைக்கு பின்னர் முதல் முறையாக இருவர் கைது செய்யப்பட்டு இருப்பது பரபரப்பை ஏற்படுத்தியுள்ளது.
இது தொடர்பாக மேற்கு மண்டல காவல் துறை ஐ.ஐ. சுதாகரிடம் கேட்ட போது, “கோடநாடு கொலை, கொள்ளை வழக்கில் ஆதாரங்களை அழிக்க தனபால் மற்றும் ரமேஷ் உதவியது தெரியவந்ததை அடுத்து இருவரும் கைது செய்யப்பட்டுள்ளனர்” எனத் தெரிவித்தார்.
இந்த கைது குறித்து காவல் துறையினரிடம் விசாரித்த போது, “முன்னாள் முதலமைச்சர் ஜெயலலிதாவின் கார் ஓட்டுநராக இருந்த கனகராஜ் கோடநாடு கொலை, கொள்ளை வழக்கில் முக்கிய பங்காற்றியவர். கோடநாடு கொலை, கொள்ளை வழக்கில் ஆதாரங்களை அழிக்க தனபால் மற்றும் ரமேஷ் உதவி செய்துள்ளனர். அது கூடுதல் விசாரணையில் தெரியவந்ததை அடுத்து இருவரும் கைது செய்யப்பட்டுள்ளனர். கனகராஜ் விபத்து என்பது வேறு. அதற்கும் இந்த கைதிற்கும் தொடர்பில்லை. கோடநாடு வழக்கில் மேலும் சிலர் கைதாக வாய்ப்புள்ளது” எனத் தெரிவித்தனர்.