புதிய தமிழகம் கட்சியின் இரண்டாம் கட்ட வேட்பாளர்களாக 27 பேரை அறிவித்த அக்கட்சி தலைவர் டாக்டர் கிருஷ்ணசாமி, வரும் ஏப்ரல் 2 ம் தேதி 3 ம் கட்ட பட்டியலையும் அறிவிக்க போவதாக தெரிவித்துள்ளார்.
கோவை குனியமுத்தூர் இல்லத்தில் 2ம் கட்ட வேட்பாளர் பட்டியலை டாக்டர் கிருஷ்ணசாமி வெளியிட்டார். ஏற்கனவே முதற்கட்டமாக 43 பேர் கொண்ட பட்டியல் அறிவிக்கப்பட்டிருந்த நிலையில் இரண்டாம் கட்ட வேட்பாளர்களை அறிவித்துள்ளார். பின்னர் செய்தியாளர்களிடம் பேசிய அவர், வரும் 6ம் தேதி அனைத்து வேட்பாளர்களும் வேட்பு மனு தாக்கல் செய்யவுள்ளதாக தெரிவித்தார். போட்டியிடும் தொகுதிகளில் நிச்சயம் வெற்றி பெறுவோம் என நம்பிக்கை தெரிவித்தார்.
பெரிய திட்டத்துடன் களம் காணும் புதிய தமிழகம்
இதேபோன்று, தேர்தல் அறிக்கை வரும் 3ம் தேதி வெளியிடப்படும் என தெரிவித்த அவர், புதிய தமிழகம் போட்டியிடும் தொகுதிகளில் திமுக மற்றும் தேசிய ஜனநாயக கட்சியை தோற்கடிப்போம் என கிருஷ்ணசாமி தெரிவித்தார்.
புதிய தமிழகத்திற்கு வெற்றி வாய்ப்பு அதிகம் இருக்கும் தொகுதிகள் குறித்து தற்போதைக்கு எதுவும் கூற முடியாது என கூறிய கிருஷ்ணசாமி வித்தியாசமான முறையில் புதிய தமிழகம் கட்சி களமாடுவோம் என தெரிவித்தார். 3 வது வேட்பாளர் பட்டியலும் வெளியிடவுள்ளதாக கூறிய அவர், மேலும் 10 தொகுதிகள் வரை போட்டியிட வாய்ப்புள்ளதாகவும் புதிய தமிழகம் கட்சி தலைவர் டாக்டர் கிருஷ்ணசாமி தெரிவித்தார்