நடிகர் கமல்ஹாசனின் பிறந்த நாளை முன்னிட்டு கோவையை சேர்ந்த யு.எம்.டி. ராஜா என்ற தங்க நகை வடிவமைப்பாளர் முத்தங்களால் கமல்ஹாசன் உருவத்தை உருவாக்கி ஆச்சரியத்தை ஏற்படுத்தியுள்ளார்.
கோவை குனியமுத்தூர் பகுதியை சேர்ந்தவர் யு.எம்.டி. ராஜா. தங்க நகை வடிவமைப்பாளராக பணி புரிந்து வருகிறார். இதனிடையே ஓவியங்கள் மற்றும் தங்கத்தில் சிலைகள் வடிவமைப்பதில் பல்வேறு புதுமைகளை புகுத்தி பல்வேறு கலை படைப்புகளை உருவாக்குவதை வழக்கமாக செய்து வருகிறார். அதேபோல இவர் மக்களிடம் விழிப்புணர்வை ஏற்படுத்தும் வகையில் தங்கத்தில் சிற்பங்கள் செய்வது, ஓவியங்கள் வரைவது போன்ற வித்தியாசமான முயற்சிகளை செய்து மக்களின் கவனத்தை ஈர்த்து வருகிறது. தங்க கட்டிகள் மற்றும் அரிசி, முட்டை, மாம்பழம், உள்ளிட்ட பழங்களிலும் பல்வேறு ஓவியங்களை வரைந்து அசத்தியுள்ளார். அண்மையில் நாட்டின் 76 வது சுதந்திர தினத்தை முன்னிட்டு சீத்தாப்பழங்களில் மகாத்மா காந்தி, பாரதியார், சுபாஷ் சந்திரபோஸ், நேரு, கட்டபொம்மன், வேலுநாச்சியார் உள்ளிட்ட தலைவர்களின் ஓவியங்களை சீத்தாப்பழங்களில் தேசிய கொடி வண்ணத்தில் 76 தேச தலைவர்களின் உருவங்களை ஓவியமாக வரைந்து கவனத்தை ஈர்த்தார்.
இந்நிலையில் நடிகரும், மக்கள் நீதி மய்யத்தின் தலைவருமான கமல்ஹாசன் பிறந்த நாள் வருகின்ற நவம்பர் 7 ம் தேதி கொண்டாடப்பட உள்ளது. நடிகர் கமலஹாசன் பிறந்தநாளை முன்னிட்டு, அவருக்கு வித்தியாசமான முறையில் ஒரு பரிசை வழங்க வேண்டும் என கமல்ஹாசன் ரசிகரான யு.எம்.டி. ராஜா முடிவு செய்தார். கமல்ஹாசன் என்றாலே பலருக்கும் முத்தம் என்பது நினைவுக்கு வரும். அதனால் முத்தங்களால் கமல்ஹாசனின் உருவத்தை வரையலாம் என முடிவு செய்துள்ளார். அதன்படி முத்தங்களால் கமல்ஹாசன் உருவப்படத்தை யு.எம்.டி. ராஜா ஓவியமாக உருவாக்கி அசத்தி உள்ளார். உதட்டில் சாயத்தை பூசி முத்தமிட்டே நடிகர் கமல்ஹாசனின் முகத்தை உருவாக்கி யு.எம்.டி. ராஜா ஆச்சரியத்தை ஏற்படுத்தியுள்ளார். இந்த முத்த பரிசை கமல்ஹாசனின் பிறந்த நாளான்று அவருக்கு பரிசளிக்க யு.எம்.டி. ராஜா திட்டமிட்டுள்ளார்.
இதுகுறித்து யு.எம்.டி ராஜா கூறுகையில், ”நான் சிறு வயதில் இருந்தே கமல்ஹாசனின் தீவிர ரசிகர். அவருக்கு பிறந்த நாள் பரிசளிக்க சுமார் 8 மணி நேரம் செலவளித்து இந்த கமல்ஹாசன் உருவத்தை உருவாக்கியுள்ளேன். வருகின்ற நவம்பர் 7ம் தேதி கமலஹாசனின் பிறந்தநாள் அன்று, அவரை சந்தித்து இந்த உருவ படத்தை பரிசளிக்க விரும்புகிறேன். எனது பெயருக்கு முன் உள்ள யு.எம்.டி என்பதை கமலஹாசன் நடித்த உன்னால் முடியும் தம்பி என்ற திரைப்படத்தை பார்த்து தான் வைத்தேன். இதற்கு முன்பே நீரில் உருவாகும் பாசியில் கமலஹாசனின் உருவத்தை உருவாக்கி அவருக்கு பரிசளித்தேன்” எனத் தெரிவித்தார்.