குலாப் ஜாமுன் ஆரோக்கியமாக செய்தால் நன்றாக இருக்கும் என்று நினைக்கிறீர்களா? இதோ சர்க்கரை வள்ளிக்கிழங்கு வைத்து செய்து அசத்துங்க. 


சர்க்கரை வள்ளிக்கிழங்கு குலாப் ஜாமுன்:


என்னென்ன தேவை?


வேக வைத்த சர்க்கரை வள்ளிக்கிழங்கு - 3/4 கப்


துருவிய பனீர் - 1/2 கப்


அரைத்த ஓட்ஸ் - 1/2 கப்


நெய் - 1 டேபிள் ஸ்பூன்


உப்பு - தேவையான அளவு


செய்முறை:


தேவையான சர்க்கரை வள்ளிக்கிழங்கை வேகவைத்து எடுக்கவும். பனீரை துருவி வைக்கவும். அரை கப் ஓட்ஸ் மிக்ஸி ஜாரில் போட்டு நன்றாக அரைத்து எடுக்கவும். 


இப்போது ஒரு பாத்திரத்தில் வேகவைத்த சர்க்கரை வள்ளிக்கிழங்கு, துருவிய பனீர், ஓட்ஸ் பொடி உப்பு, நெய் சேர்த்து நன்றாக குலாப் ஜாமுன் தயாரிக்கும் அளவிற்கான மாவாக தயாரிக்கவும். இதை சிறு உருண்டைகளாக உருட்டி, ஏர் ஃப்ரையரில் 170 டிகிரி வெப்பநிலையில்15 நிமிடங்கள் வைத்து எடுத்தால் தயார். 


இதற்கு நாட்டு சர்க்கரை பயன்படுத்தி ஜூரா தயாரிக்கலாம். ஒரு பாத்திரத்தில் முக்கால் கப் நாட்டு சர்க்கரை சேர்த்து, ஒன்றரை கப் தண்ணீர், 5-6 ஏலக்காய், சிறிதளவு ரோஸ் வாட்டர் எல்லாவற்றையும் நன்றாக கொதித்ததும் அதில் குலாப் ஜாமுன் உருண்டைகளை சேர்த்து, இனிப்பில் நன்றாக ஊறியதும் சுவையான குலாப் ஜாமுன் தயார்.






கேரட் குலாப் ஜாமுன்


என்னென்ன தேவை?



  • கேரட் - 6

  • சர்க்கரை - 2 கப்

  • ஏலக்காய் - 2

  • நெய் - ஒரு கப்

  • பால் - ஒரு கப்

  • ரவை - ஒரு சிறிய கப்

  • பால் பவுடர் -ஒரு கப்

  • எண்ணெய் - பொரிப்பதற்கு

  • பிஸ்தா - சிறிதளவு


செய்முறை:


முதலில் குலாப் ஜாமுன்களை ஊறவைக்க சர்க்கரை பாகை தயாரித்து ஆறவைக்க வேண்டும்.  ஒரு டம்ளர் தண்ணீரை அடுப்பில் கொதிக்க விட வேண்டும். கொதிவந்ததும் அதில் ஒரு கப் சர்க்கரை மற்றும் ஏலக்காயை பொடித்து சேர்க்க வேண்டும். சர்க்கரை கரைந்து பாகு போல பதம் வரும்போது அடுப்பிலிருந்து இறக்கி தனியே ஆறவிட வேண்டும். 


இப்போது ஜாமூன்களை தயாரிக்கலாம். கேரட்டை தோல் நீக்கி சிறிய துண்டுகாளாக்கி மிக்ஸியில் கொரகொரப்பாக அரைத்து எடுக்க வேண்டும். அடுப்பில் ஒரு கடாயை வைத்து ஒரு கப் நெய் சேர்த்து அதில் கேரட் சேர்த்து நன்றாக வதக்க வேண்டும். 5 நிமிடங்கள் கழித்து ஒரு கப் பால் சேர்த்து அதில் கேரட்டை வேகவிடவேண்டும். இப்போது ரவையை சேர்க்கலாம். நன்றாக கிளற வேண்டும். கேரட், ரவை இரண்டும் நன்றாக வெந்துவிடும். உதிரியாக இருக்கும்போது பால் பவுடரை அதில் சேர்த்து கிளற வேண்டும்.


பால் பவுடர் சேர்த்ததும் அது நன்றாக இறுகிவிடும். உருண்டைகளாக உருட்ட ஏற்ற அளவில் மாவு இருக்கும். அடுப்பிலிருந்து இறக்கி நன்றாக 10 நிமிடங்கள் ஆறவிடவும். 


இப்போது, அடுப்பில் கடாயில் எண்ணெய் ஊற்றவும். எண்ணெய் நன்றாக சூடாவதற்குள் குலாப் ஜாமூன்களை சிறிய உருண்டைகளாக தயாரிக்கவும். எண்ணெய் சூடானதும், உருண்டைகளை அதில் போட்டு பொரித்து எடுக்கவும்.கொஞ்சம் சூடு ஆறியதும் ஜாமூன் உருண்டைகளை சர்க்கரை பாகில் சேர்த்து 1-2 மணிநேரம் ஊற வைத்து எடுத்தால் சுவையான கேரட் குலாப் ஜாமுன் தயார்.